課程會安排學員在科學園內的數據工作室上課,導師可直接運用工作室內的數據向學生作學術講解,圖為利用觸控屏模展示不同的數據。

學海無涯

DSE畢業生啱讀 學睇數據做分析員

贊助商連結

現今網絡及科技發達,人們很容易搜集到各式各樣的資訊,但巨量的資訊中不一定全是有用,從而產生數據分析員這行業,不少企業都需要這方面的人才,在大量的資訊中找出有價值的東西,幫助制定公司的發展方向、新產品的研發等。有見及此,香港專業教育學院開辦數據科學及分析高級文憑課程,培育懂得數據分析知識的人才,課程適合 DSE畢業生報讀,讓他們裝備自己,發展個人事業。




數據工作室內有行車班次、航班、熱門搜索等即時資訊,導師會教授學員如何在大量數據中找出有價值的訊息。

數據科學及分析高級文憑課程,由有多年教學經驗的導師親自任教,當中的講師曹偉成表示開辦課程目的,是讓學員掌握數據分析的知識及技巧,「課程內容包括程式編寫、統計學知識、數據分析及運用數據分析軟件等。學員最重要係學識點樣將數據轉化為有價值嘅嘢,例如知道某區市民嘅消費習慣,鍾意邊類產品,可以幫助商場劃分唔同種類商鋪嘅大細,引入熱門消費類嘅品牌等。」

與科學園合作


科學園新啟用的數據工作室,內有不同視像化數據的輔助器材,增加學員的上課趣味。

資訊科技學科學術總監梁興邦表示課程會與科學園合作,令學員有更多學習的機會,「可以使用科學園新開設嘅數據工作室,裏面有機場每日客貨運航班嘅資料、公共交通工具喺各時段嘅使用量、空氣質素嘅統計等數據庫。學員均會自動成為會員,可以應用呢啲資訊去完成功課,部分課程亦會安排喺數據工作室內進行,令學員可以直接接觸現時嘅展示數據工具,呢啲都幫到學員更快掌握數據分析嘅技巧。」

市場需求大

曹偉成表示市場上對數據分析人員有需求,是現時不錯的發展行業,課程亦適合 DSE畢業生報讀,成為分析員,出路廣,人工亦不俗。「創新科技及市場推廣都需要數據分析嘅人員,從分析數據中提高服務及產品質素,但市場上呢方面嘅專門人才較少,所以識呢方面嘅技能對搵工作幾有利。初入職做編寫員或市場分析員,月薪約$14,000至$20,000。」




資訊科技學科學術總監 梁興邦

梁興邦:我哋有報告指出,亞太區大數據及數據分析市場喺 15年為 38億美元,去到 19年會增長至 70億美元,表明呢行嘅發展潛力好大。對於 DSE學生嚟講,係一個唔錯嘅出路。




講師 曹偉成

曹偉成:課程會教授工作上應用到嘅分析軟件,例如 Tableau及 IBM Bluemix等。另外,亦會安排學員有 90小時或以上嘅實習,畀佢哋體驗喺實際工作中,點樣運用數據分析,令佢哋畢業後更易投身社會工作。

課程:數據科學及分析高級文憑
機構:香港專業教育學院
對象:中六畢業或同等學歷
學費:$36,000( 1年)
堂數: 2年全日制
內容︰應用統計學、數據庫原理、程式編寫初階、商業智能系統、資料視覺化及網頁分析等。
查詢: 2595 2536

撰文:曾志恒
攝影:林文樂
部分圖片由被訪者提供

 

    tvb4life 發表在 痞客邦 留言(0) 人氣()