Cola在餵魚時,與魔鬼魚進行互動,用食物將牠由缸底引上來。

青雲路

直擊水族員工作實況

贊助商連結

韓劇《藍海傳說》中,有全智賢飾演的美人魚,在現實中,藍色一片的水族館中,有裝備充足的水族員,同樣浪漫!今年 23歲的 Cola,一向喜歡養魚,於 14年加入了海洋公園,次年他更考取潛水員牌照,跳入魚缸,當上水族員,每天與大魚於缸中暢泳。
水族員需要了解各魚類的特性而預備食材,及負責餵飼大大小小的魚類,並要做清潔及繁殖等工作。
剛考完 DSE的考生,若想與 Cola一樣終日以魚為伴,亦可以考慮當水族員,被這無限溫暖的藍所治癒。

自 15年當上助理水族員後, Cola花了很多時間觀察各種魚類的活動模式及特性,「蘇眉魚好好奇,成日都係望住人;鷹鯆(魔鬼魚的一種)好多時都鍾意伏喺缸底;我哋一陣會餵角鵬(魔鬼魚的一種),佢體型好大,如果全速游過嚟,真係會驚俾佢撞親!」
因為魚不懂說話,所以要靠水族員仔細觀察,才會留意到牠們是否出現問題,「如果佢哋游到側埋一邊,有機會係受傷或內臟出事;鷹鯆平日鍾意伏喺缸底,如果見佢成日游嚟游去,可能係某啲原因導致佢不安,所有異常都需要向獸醫報告。」
除了觀察魚類活動的情況外, Cola還需留意牠們的進食習慣。每天設有兩次餵飼環節,他需要記着不同魚類所需的食物,「每日逢 10am及 3pm,我都會餵魚,錘頭鯊會食杜仲、多春魚、魷魚、花鮫及橫澤;角鵬會食鱗蝦;其他魚仲會食啫喱、蜆肉、帶子及紫菜等食物。」為了確保牠們吸收足夠的營養,水族員會在飼料中加入營養補充丸,令魚類有良好的發展。




除了多春魚、魷魚、橫澤及花鮫等魚餌外, Cola還要準備鱗蝦,「角鵬會食鱗蝦,鱗蝦要放喺 4度嘅雪櫃入面儲存。」


為了確保各種魚類成長健康,水族員於準備食物時,會在魚餌中加上營養保充丸。


準備好魚餌後, Cola會先進行水面的投餵工作,各種鯊魚及其他魚類都會爭相游近,場面激烈。


角鵬游過來後, Cola便將鱗蝦倒進牠的口中,重複幾次便完成餵飼。 自小喜歡魚

Cola自小喜歡釣魚及養魚,養過泰國鬥魚、大型肉食魚恐龍皇及水晶蝦等。他在 HKU SPACE修讀環境科學及地球學副學士, 14年畢業後便加入了海洋公園的教育部,負責推廣海洋生態教育及環保知識。「做咗 1年後,見公園招聘助理水族員,我又幾鍾意游水,就想調過去試試。」
最初 Cola未考獲潛水牌,故只負責準備飼料及清潔的工作,但每天看到同事潛到魚缸中,與魚同游並進行互動,令他急不及待想要下水,於是未等公園安排正式的潛水訓練,他已到坊間報讀潛水課程,並在 16年 4月成功考獲潛水牌。
雖考獲潛水牌,但 Cola仍需接受公園的考核,「要喺 12分鐘內游 400米、踩水 3分鐘、閉氣 25米及潛水點樣清鏡等。」 Cola覺得最難控制是潛水衣的浮力控制裝置,此裝置可令潛水員維持在一定水深,他需要多次練習才熟習使用,「喺水入面好難發力,有時控制得唔好,根本做唔到水底清潔工作。」




Ken(右)是 Cola的上司,在各方面都會作出指導,他表示 Cola很交帶及有責任心,「佢做嘢好主動,最近進行小丑魚嘅繁殖工作,都係佢主動提出要參與。佢好清楚自己嘅工作範圍及有自覺性,希望佢可以愈做愈好。」


Cola性格外向,除了游水及潛水外,他平日亦很喜歡戶外運動,圖為他行山時所攝。 追住搶食

當完成訓練後,第一次潛水餵魚的經驗讓 Cola十分難忘,畫面仍歷歷在目,「第一次潛落魚缸入面餵魚真係好緊張,啲魚幾乎係衝埋嚟搶食,未游到去指定嘅餵魚位置,佢哋已經追住我,佢哋咁『擒青』就搞到我好『驚青』!好多魚都游到好近,望住我眼超超,近距離睇佢哋原來咁大條。」
Cola覺得在魚缸工作比起自己在海域潛水有很大的分別,「比起喺海潛水會凍啲,但呢度能見度高好多,及有好多大型魚一齊游水,感覺好得意。」習慣餵飼工作後,他自言特別偏愛餵虎紋鯊,「佢哋好溫馴,成日都會跟住我游。」




Cola帶同已準備妥當的魚餌,然後打開閘門,潛到水深 12米的魚缸中。


參觀的觀眾看 Cola餵魚時,都興奮得邊拍照邊大叫。 用拳頭拿魚餌

餵魚的體驗很有趣,但 Cola指餵飼時,亦有需要注意的地方,「因為魚食嘢嘅方法大多係吸走魚餌,我哋餵時要用拳頭拎魚餌,收埋手指,為加強保護,我哋仲會戴鋼絲手套,以免手指受傷;鷹鯆尾嘅尖刺有毒,餵佢哋食嘢時,要小心唔好靠近尾部;另外,餵飼時要多啲留意四周環境,大型魚嘅體型及重量都有一定分量,如果佢高速游過嚟又避唔切,有機會被撞傷。」
除了餵魚外, Cola平日的工作還包括清潔魚缸及繁殖魚類,「我哋有時仲會出海收集水草作為裝飾,模仿魚類真實嘅居住環境。」說到繁殖工作時, Cola即露出一副慈父的樣子,「我最近繁殖緊小丑魚,睇住佢哋由零到有,真係好有成功感。同樣,工作上當自己有能力將各種魚照顧得好好,都會好滿足。」 Cola表示未來打算考進階潛水牌,看來他與海洋和魚類是分不開的了。




因為魚類大多不懂控制進食的力度,故餵食時需好好保護自己的手指,以免受傷, Cola表示:「我哋會戴上鋼絲手套,然後再戴潛水用嘅手套,增加保護性。」


Cola最近在繁殖小丑魚,「剛出世的小丑魚好細條,每條大約只有 1cm,𠵱家成日都成群一齊活動。睇住佢哋出世真係好開心,希望佢哋可以健康成長。」


晉升階梯

水族員( 2年經驗或以上)
$14,000至$18,000

助理水族員( 1年經驗)
$12,000至$15,000

合約見習水族員(無需經驗)
$11,000至$13,000(視乎學歷)

點入行?

高級水族員 Ken表示,有興趣入行者,若有修讀生物及有對魚類的基本知識會稍為有幫助,但大前提是要喜歡動物,「仲要細心、觀察力強及有耐性。如果本身有考車牌及潛水牌會更加有優勢。」他表示職位適合修畢 DSE的同學,可留意海洋公園的招聘廣告嘗試應徵。
查詢: careers.oceanpark.com.hk

後記:日日潛水

記者考慮到當水族員差不多每天落水,皮膚不會很差嗎?可能身為男孩子的 Cola並沒有太介意,他笑說:「又唔使日日潛水,每月約 15次,皮膚又唔算太差!」連身旁的高級水族員 Ken亦不禁搭話說:「我啲皮膚仲好幼嫩,你可以睇吓。」比起曬黑,記者比較怕每次上水後的乾燥,所以還是在陸地上工作好了。

撰文:霍芷晴
攝影:林文樂
部分圖片由被訪者提供

 

文章標籤

tvb4life 發表在 痞客邦 留言(0) 人氣()