短篇小試

新版新優勢  Honda Odyssey Supreme

贊助商連結

仲記得以前嘅 Honda Odyssey都可算係豪華 MPV嘅表表者,不過近幾年冇咗呢個優勢,上有 Alphard及 Elgrand、下有 Noah及 Serena,再加上 Honda自已又將 Odyssey獨有嘅跑車化優勢淡化,取而代之係首次用趟門,跑車味銳減。
既然回唔到頭,倒不如喺現有做到更好,為此出現眼前嘅 2017年新版,外表改少少,但就加上幾項新設備,令豪華感覺更強烈,而最重要係車價只係貴咗少少,就已經有齊更多新設備。

Honda Odyssey Supreme spec.

引擎: 2,356c.c.直四
馬力: 185ps/6,400rpm
扭力: 24.0kgm/4,000rpm
傳動:無段變速自動、附+/-模式
車身: 4,830× 1,820× 1,695( mm)
軸距: 2,900mm
耗油: 13.7km/L
售價:$459,990
查詢: Reliance Motors Ltd.( 2380 2231)

改動唔少嘢

代理講明呢個唔係 facelift版,只係 2017年加強版,所以唔好期望外表有大改動,而事實上主要係車頭鬼面罩及泵把射燈罩由銀色電鍍改為黑色款,叫做有少少新鮮感。最多改動其實全部喺車內,與其話「改動」,其實用「加料」嚟形容更適合。首先係前乘客座位加設電動調校,而駕駛席則由電動調校升級成有兩組位置記憶,方便唔同駕駛者。中排都有新嘢玩,車廂頂加上九吋 mon.,而且仲有埋 HDMI輸入,以後後座乘客唔怕悶。作為駕駛者,除座位加咗位置記憶外,中控台上嘅原裝 touch mon.加咗香港地圖導航系統,以後載住一家大細遊車河更方便。




前乘客座都加入電動調校,令方便性倍增。


Odyssey嘅中排已用上最頂級商務位設計,設有手枕及小腿墊,甚至背部角度都可調節。


原裝日本機頭,仲要有埋香港地圖, Honda行貨車少見。


駕駛席增設兩組位置記憶,方便轉換唔同駕駛者。


車廂頂增設九吋 mon.可以播放影碟外,更有 HDMI輸入。 港產電尾門

舊版 Odyssey早已將後座兩隻側門設定為全電動操作,方便中、後排乘客上落,不過 Odyssey一直欠缺電動尾門,令到冇乜人用佢嚟行走中港,而且巨大尾門亦令女士們難以操作。為此代理特別為新版 Odyssey加裝電動開關尾門,可以撳尾門掣或軚盤旁嘅掣開閂,而且仲要有位置記憶,方便用家喺樓底較矮嘅停車場使用。動力方面, Odyssey維持 185匹馬力、 2.4公升引擎,雖然未至於非常大力,但夠用之餘最重要係慳油,配合 CVT波箱可以做到 13.7km/L耗油量,即大約$1.1/km,都算唔錯嘞。




今代 Odyssey中控台以簡約為主,少按鈕之餘,仲要全部按鈕都用輕觸式設計。


引擎規格全冇改動,仍然係 2.4公升引擎輸出 185匹馬力。


由於 Odyssey採用 2+2+3座位佈局,所以後排坐三名乘客,滿客時難免有啲迫。


由香港加工嘅電動尾門,唔只有一鍵開閂功能,仲有開啟角度設定。

撰文:袁國基
攝影:葉偉豪

    文章標籤

    Honda Odyssey Supreme

    全站熱搜

    tvb4life 發表在 痞客邦 留言(0) 人氣()