專題 Log In

全面升級  VW Golf 280 TSI GT Sport

贊助商連結

歐洲揭背小車之中,近年一街都係嘅有兩款, M-Benz A-Class同 VW Golf,數量近乎超過日本小車,總有一架喺你附近!兩者之中,筆者比較喜愛 Golf,因為今代 Golf無論舒適性同操控性,水準都非常之高,做到剛柔並濟嘅效果。
第七代 Golf,自 12年推出至今已達五年之久,依照第六代只生存了五年來推算,今代理應將近大轉款之期,但廠方今次選擇先以 facelift形式保鮮,可能呢一代嘅設計實在太好嘞!要超越佢,廠方睇怕都要啲時間諗諗計。

剛收到 Golf facelift嘅新聞稿時,發現一些有趣資料,同大家分享一下!原來推出至今已達 43年嘅 Golf,截至 2016年,全球已經售出 33,312,123架,即係平均每 40秒就有一架 Golf喺地球上賣出,可見 Golf嘅吸引力有幾勁!分享完畢,入返正題,今次廠方為 Golf推出嘅小改款,除咗外形有小改動,設備更有驚喜升級,令 Golf再次比同級走得更前。

VW Golf 280 TSI GT Sport Spec.

引擎: 1,395c.c.直四 turbo
馬力: 150ps/5,000-6,000rpm
扭力: 25.5kgm/1,500-3,500rpm
傳動: 7前速自動,附+/-模式
車身: 4,258× 1,790× 1,492( mm)
軸距: 2,620mm
車重: 1,280kg
0-100km/h: 8.2秒
耗油: 5.2-5.0L/100km
車價:$269,980起
查詢: Volkswagen HK
( 3698 9588)

外表更加剛強

通常 facelift車款,都係改用新燈組、換套新包圍嚟將尾期車款「保鮮」,今次 Golf嘅外形改動亦都只係呢堆例牌嘢,改完之後唔算好新鮮,但一定好睇過以前!新款採用嘅全新燈組,頭燈改用全 LED款式,而且經過重新編排,日行燈由原來「 U」字變為雙「 L」設計,而且設計同鬼面罩上嘅電鍍銀邊一體化,配合全新採用大量橫向線條嘅泵把,為新款帶來更闊嘅視覺效果。除此之外,尾燈亦改用全 LED款式,尾喉更由小改款前嘅圓形雙出款式,更新為與尾泵把一體化嘅「燕子」尾喉,令新款更加時尚、更具跑格。
車廂方面, facelift後設計並未有重大改動,車廂、座椅無論用料、配色同舊款都分別不大。咁即係 hea改?咁又唔係,戲肉其實喺新表板同更大嘅 MIB多媒體控制屏幕上面。




車頭運用大量橫向直線設計,加入雙「 L」線條嘅頭燈最吸引。


「燕子」尾喉同尾泵把合二為一,令新 Golf視覺時尚咗好多。


只配手動調校前座,但首批可以$20,000(原價$40,000)升級至 Dynamic Pack,當中包括電動記憶駕駛席同 Vienna皮座。


後座空間不俗,而且可以作 40:60分割摺下提升尾廂空間。 更強動力齊升級

今次 Golf facelift,除咗外形同設備升級之外,動力都有提升,不過只限以下三款,配 1.4L引擎則一律不變。

失望自動波  Golf GTI Performance
14年推出嘅 Golf GTI Performance,比普通 GTI多 10匹馬力,而且罕有配 6速棍波,屬好玩之作! Facelift後 Performance版馬力再多 15匹達 245匹,可惜已改配 7速 DSG波箱, R.I.P.棍波。

最強多 10匹  Golf R
已達 300匹馬力加四驅嘅 Golf R,其實已經快到癲, facelift後沿用相同 2.0L直四 turbo引擎,但馬力再 tune多 10匹至 310匹, 0-100km/h只需 4.6秒,比 facelift前快 0.3秒。

最強多 10匹  Golf R
已達 300匹馬力加四驅嘅 Golf R,其實已經快到癲, facelift後沿用相同 2.0L直四 turbo引擎,但馬力再 tune多 10匹至 310匹, 0-100km/h只需 4.6秒,比 facelift前快 0.3秒。




Golf GTI Performance


Golf R


e-Golf 表板全面升級

今次 facelift嘅重點,屬 Golf首次配備嘅 Active Info Cockpit Display虛擬表板,表版尺寸為 12.3吋,解像度達 1,440× 540像素,同 Audi嘅 virtual cockpit規格一樣,應該係由 Audi直接移植過嚟。雖然換咗新表板,令駕駛席視覺即時 hi-tech咗,不過相比 Audi嘅設計, VW嘅 Active Info Cockpit Display喺圖像設計方面就比較單調,即使預設咗「經典」、「速度與檔位」、「油耗與續航」及「效能」等版面,畫面變化仍然不大,轉換駕駛模式後亦未有改變畫面色調,似乎有點浪費咗咁好嘅硬件配備。筆者反而期待 Golf R同 e-Golf嘅表板,因為只有以上型號配備導航系統,而導航一向最能發揮虛擬表板嘅功用,希望之後有機會試到。
除此之外,中控台上嘅 MIB多媒體控制屏幕,亦更新至 8吋輕觸式,解像度達 800× 480像素,而且用上光面玻璃面板,兩則亦嵌入輕觸式按鈕,連同虛擬表板,就好似將 Golf帶入咗 IT世代,同級暫時都未有咁高科技。




中控台儀表板仍以鋼琴黑托底,但改用一塊式屏幕及輕觸式按鈕面板,感覺整齊好多。


提供四種預設版面,包括「經典」、「速度與檔位」、「油耗與續航」及「效能」,但變化只限雙內圈嘅資料。


「運動」顯示包括圖中三組儀表,每組可獨立設定為油溫、水溫、 turbo壓力、馬力功率計及 G-force顯示。


「運動」顯示仲有計時碼表功能, facelift前要更高級嘅 GTI先至有。


雖然之前都有呢個「 Think Blue.」介面,但屏幕大咗,可更易閱讀拎咗幾多環保分數。


新增設四組駕駛設定記憶,唔同司機上車可以一指完成駕駛設定,例如音響、引擎自動熄匙系統開關等。 150匹動力不變

屬 Golf 280 TSI GT Sport嘅測試車,沿用 1,395c.c.直四 TSI turbo引擎,最大馬力 150匹,峰值扭力 25.5kgm,配合轉波快速無比嘅 7前速 DSG雙離合器波箱, 8.2秒 0-100km/h加速表現同 facelift前完全相同。雖然數字上只屬一架入門小車表現,但因為波箱反應快、引擎有良好低扭輸出,所以揸起嚟都幾爽快,尤其進入「運動」模式,引擎會攀升至 3,000rpm以上先轉波,配合優秀嘅 MQB底盤,爽快得嚟又好玩!可惜聲線仍然都係冇乜料到,所以想有聽覺刺激,起碼要揀 GTI。




1,395c.c.直四 turbo引擎,動力輸出爽快利落,而且擁有不俗耗油表現。


7前速 DSG雙離合器波箱,轉波反應靈敏已經出晒名!

撰文:黃德禹
攝影:葉偉豪

 

    文章標籤

    VW Golf 280 TSI GT Sport

    全站熱搜

    tvb4life 發表在 痞客邦 留言(0) 人氣()