新車激試

不可同日而語  M-Benz E400 Coupe

贊助商連結

上一代 M-Benz E Coupe喺 2009年抵港,仲記唔記得當年有咩難忘事?曾蔭權做緊特首?今日成為階下囚啦!港鐵港島西線動工?今日通咗車成年有多啦!可見八年間可以有幾多人和事改變。新一代 E400 Coupe剛剛到港,事隔八年,人事皆變, E400 Coupe又點會例外?不論內外都同 2009年、上一代款係兩個世代產物,如果你最後接觸嘅車係八年前嘅 E Coupe,今日見到新一代 E400 Coupe一定會驚嘆不已。

八年間 M-Benz車系作出翻天覆地轉變,以前邊有咁多車系?而上代 E Coupe聯同 C Coupe一齊入替 CLK車系,正正係車系大革新嘅序幕。新一代 E Coupe與以往嘅 CLK愈走愈遠,車身比上代更大、車廂設備更豪,話佢係 S-Class都有人信。




新一代 E Coupe嘅車長及軸距都比上代開篷 E200(左)長得多,已達豪華 GT級數。


車尾分別非常大,而新 E Coupe嘅車牌位置改至泵把上,比上代(左)更好睇。 M-Benz E400 Coupe Spec.

引擎: 2,996c.c. V6 twin turbo
馬力: 333hp/5,250-6,000rpm
扭力: 49.0kgm/1,600-4,000rpm
傳動: 9前速自動、附+/-模式
0-100km/h: 5.3秒
耗油: 8.4-8.1L/100km
車身: 4,826× 1,860× 1,430( mm)
軸距: 2,873mm
車重: 1,845kg
車價:$958,000起
查詢:仁孚行( 2895 7339)

承襲 Coupe造型

M-Benz嘅雙門四座 Coupe陣容 base on四門房車車系,上有 S Coupe、下有 C Coupe,最後登場就係眼前嘅 E Coupe。 E Coupe總體來自 E Saloon,不過車身大幅縮短 97mm,連軸距都短咗 66mm,令車身只長 4,826mm,軸距 2,873mm,雖然睇數字比房車版短小,但現場睇 E Coupe都頗大架,比同場嘅上代開篷 E200足足長咗 128mm,可以一眼就睇得出同分別到,明顯廠方有意為今代 E Coupe大升級。雖然 size上可以辨認出嚟,但講到底近年 M-Benz新車 design好似懶咗啲,由 S-Class至 C-Class都係一個倒模樣, E Coupe當然唔單只似 E Saloon,更加似 S Coupe!最明顯係由 S Coupe創立嘅橫置尾燈同向上揚起嘅車尾,完全承襲自 S Coupe,而事實上 M-Benz全部新款 SUV Coupe都用上類似設計,好有完整系列感覺。
眼前嘅 E400 Coupe測試車,其實已裝上價值$58,000(未連稅)嘅 Edition 1套件,套件包括有名為 Designo Cashmere White Magno嘅啞白色車身顏色、二十吋合金軨、黑色車側倒後鏡及喺 A-Class上大放異彩嘅 Diamond Grille鬼面罩。老實講除咗啞白色車身外,其他裝備筆者都冇異議,因為啞白色令車身原有嘅美麗曲線完全埋沒,車身冇光澤之餘仲要難於打理。




呢個鬼面罩唔會陌生啩?已成為近年最紅嘅 M-Benz跑車象徵。


E Coupe車尾已與 S Coupe同一套路,但事實上係更簡潔好睇。


Coupe車身最靚就係冇 B柱設計,令車側更靚、後座空間更開揚。 豪華大升級

Edition 1套件其實都包括埋車內指定項目,如測試車嘅紅、黑色 Nappa皮座椅,比一般 M-Benz嘅真皮座位更柔軟。此外軚環嘅三點及九點鐘位都用上特製 Dinamica防跣手猄皮料,係就係比較易污糟,但靚仔又好揸,三兩年後先諗再包過。 E Coupe嘅車廂前半部分可以話同 E Saloon完全一樣,只有冷氣出風口改成飛機噴射引擎咁嘅款,靚仔過房車版。中控台及表板仍然由兩個 12.3吋屏幕組成,可以顯示嘅內容及設定可以話多到無倫!不過 M-Benz有一點非常堅持,就係唔會用 touch mon.!呢一點筆者非常讚成,因為 touch mon.極易令人分神,駕駛時操作易生意外,所以 M-Benz一直強化手枕前嘅 Comand系統,現時已可以用扭掣、 touch pad及軚盤上嘅 touch control掣操作,確保用家雙目可以專注在路面上。
由於 E Coupe嘅車身後半傾斜及冇後座門,所以一如以往用上冇 B柱設計,加上天窗面積都算大,坐入後座所望到嘅視野絕對唔錯。筆者都試過坐入後座,發覺頭部空間充裕唔頂頭,腿部直頭有鬆動,除咗上落車比較煩之外,乘坐舒適性其實有 E Saloon八成表現,以雙門 Coupe嚟講,算係好好嘞。




整個駕駛艙嘅設計都同房車版一樣,最觸目一定係中控台上兩個 12.3吋相連巨 mon.。


測試車裝上 Edition 1套裝,已包括紅、黑色 Nappa皮座椅,比一般真皮更柔軟。


後座不論頭部及腿部空間都充裕,而且乘坐舒適性高,唯一要挑剔係電窗要由前座控制。


冷氣出風口換上全新款,似足飛機噴射引擎咁,襯返跑車造型。


承襲自 E Saloon嘅全數碼化表板,有極多款顯示狀態,有排你玩。


軚盤兩邊有 touch control,輕輕用手指一掃已可操作。


買家可以喺中控台嘅小型儲物櫃內加裝無線充電設備,當然要你部手提電話匹配呢個功能先有用啦。


天窗面積都唔細,可覆蓋至前座乘客頭頂,有助增強車廂空間感。


尾廂容積有 425L,雖然比房車版 540L細一截,但 Coupe嘅後座背預設可以摺疊,可以靈活擴展容量。 舒適性極高

E-Class作為 M-Benz車廠最重要車系,當然用盡法寶將佢搞到最好, E Coupe都一樣高質素。筆者先要強調測試車已加上大量「補品」,據知車價過百萬!當然人人有唔同需要,但有樣設備高度推介,就係價值$22,000(未連稅)嘅 AIR BODY CONTROL( ABC)氣壓懸掛系統。只需將行車模式設至 COMFORT,懸掛即有十分柔順吸震反應,令車內寧靜度都提高,舒適性直迫 S Coupe!此外,懸掛都可以因應唔同駕駛模式自行設定軟硬度,不過要有心理準備就算 set到 SPORT+模式,都唔會好似 AMG車系咁硬橋硬馬。
引擎方面,採用嘅 3.0公升 twin turbo引擎有 333匹馬力及 49.0kgm扭力輸出,表現唔係「嘭嘭聲」一類跑車,但推動 1,845kg車重都綽綽有餘,腳底下可感到佢出力豐厚,有大型 GT車風範。此外,新一代 E Coupe已全線轉用 9G-TRONIC自動波箱,波段比上代更為緊密,一來令轉波時更快、更順暢,二來就算配用上 4MATIC四驅系統,都可以得出 8.4-8.1L/100km嘅出色耗油表現。







引擎其實喺上代尾期已登場, 333匹馬力及 49.0kgm扭力有出色、平穩表現。


Comand扭掣旁可設定駕駛模式、升降車身、 360度泊車鏡頭及停車自動熄匙開關。


全新 9G-TRONIC波箱表現一等一好,轉波快而且順,最重要係幫到慳油。


自定駕駛模式中,可以獨立設置波箱、避震及轉向,令駕駛模式更多樣化。

撰文:袁國基
攝影:葉偉豪

 

文章標籤

全站熱搜

tvb4life 發表在 痞客邦 留言(0) 人氣()