壹號幹線

無知跑車遇着佢,死咗都唔知發生乜事……  INFINITI Q50S 3.0t Red Sport 400

贊助商連結

INFINITI近期最新動向就係「極度進取」,繼 50萬有找可以擁有「公子型轎跑車」 Q60之後,用 60萬有找車價居然可以買到部輸出高達 400匹的高性能後驅房車 Q50S。
而且,呢部車快到癲之餘,仲估唔到係鬼咁好揸,大可以形容為,披住羊皮嘅速龍……

原裝車架質素高,毋須任何補強都能承受龐大馬力,只加入了電子避震調校(油壓式), 7速波箱源於 370Z,沒有「雕咳廚」,但拖波識自動補油,亦沒有電子差速鎖、主動扭力分配等流行設備幫手,但得出來卻是完全「估你唔到」的駕駛快感。它有非常濃烈的 FR味道,入彎已經快,點知出彎仲快,避震似法國車長而柔韌,吸震與抗傾兼備,而第二代 DAS轉向系統不單快而準,轉向比率跟溝通感都有顯著改良。較奇怪是尾胎闊度只有 245mm,操控上的確有利於提升靈活度,但就難以完全消化路面磨擦,不諳 FR操控人士便易出洋相,換成 265mm,似乎會合理好多。

400匹馬力大傾銷!

售價:$599,800
引擎: 2997c.c., V6;前置,後輪驅動;雙渦輪增壓
馬力: 400匹/6400rpm
扭力: 48.5kgm/1600-5200rpm
波箱: 7前速自動(附+/-模式)
長/闊/高: 4800/1820/1445mm
重量: 1751kg
耗油量: 9.6L/100km
0-100km/h: 5.1秒
查詢: Infiniti HK
網址: http://www.infiniti.com.hk 

讚一讚:全新 VR30引擎實力驚人;第二代 DAS轉向系統大有改進。超濃烈 FR車架操控樂趣,慢慢揸又係舒適行政房車。

彈一彈:大辣版 Q50外形低調過低調,一時間難以燃燒起購買慾望;坐姿稍高,座椅包覆性未足以抗衡高速走彎 G-force。

驟眼睇就係一部好典型的 Q50,車尾設計仲斯文過我結婚時嗰套「踢死兔」,單靠「紅 S」徽章當然難辨別身份。代理亦深表認同,所以交車版本將會獲贈原廠尾翼(中圖示)一小塊,好過冇囉!










從多方面探索,都實在難以聯想到是屬於 400匹房跑車的車廂。個人建議,最「快靚正」的改善方法,係將全部白線變為紅色繡線。


轉波撥片一件過以鎂合金製造,還包覆真皮提升觸感。外形熟口熟面?唔出奇,睇吓 GT-R嗰塊自然明白。


雙圓儀錶沒有因應特別身份作絲毫改動,可是真正的最大分別,是轉數及速度指針攀升幅度會特別生猛。


前擾流直接從 Hybrid版移植過來,霧燈位及裙腳都較普通版有型,不過還是太低調,日後嗰筆改裝錢,似乎慳不得。


19吋輪圈造型略嫌太斯文,就算前制動轉用鮮紅 4活塞卡鉗,亦只像第一次食酸辣米線的初哥:「唔該,一碗 10小辣!」


繼 Q60之後,第二款採用 Bose Performance音響的汽車,喇叭數量多達 14隻,音色有 details、低頻夠動態,同性能好襯。


峰值扭力輸出高達 48.5kgm,於 TCS全關模式下可將動力向後輪盡情釋放,隨時隨地都可以造出畫面絢麗的「 burn胎」效果。不過 19吋車胎唔算平,無謂同荷包鬥氣,兼且奉勸一句:「吸煙危害健康!」


從舒適角度論,前座設計得分甚高,用料又厚又靚,電動調校亦算細緻,但估計因要顧及美國市場,剪裁明顯為「肥大肉厚」人士悉心炮製,高速跑山兩側承托稍遜,建議增磅遷就。


上下 touch mon(附設導航), AVM視像鏡頭亦對應鳥瞰視點,高級車嘛!


相比同級車,後座空間對得住天地良心,車廂隔音能力亦唔錯(正常使用下),但話晒都係後驅車,中間乘客雙腳就要騎住轉動軸位坐,長途車幾難頂。


阿爸教落,有尾車除咗大方得體,另一個好處係尾箱必定見使,容量足足 500公升,可惜不設後座翻摺功能。 

這台 400匹引擎表現可謂意想不到的厲害,低至 1600rpm已可將峰值扭力 48.5kgm全數釋出,起步彈射反應凌厲,力氣結實兼且一氣呵成,油門反應又快又直接,高轉升檔有強烈推背感,普通跑車完全「埋唔到佢身」,大可視為四門版 GT-R。唯一批評是運轉及喉聲都太 smooth,刺激性要打九五折,不過計落每匹只不過$1,500,真心抵買!



日產 turbo技術從不叫人懷疑,全新研製的 VR30 V6 twin turbo引擎便首次應用於 Q50之上。結構上應用了輕量化物料,淨重只 194.8kg,減重達 19%;大量先進科技包括:缸內直噴、進排氣活瓣升程技術、中缸內壁鏡孔塗層,而且進排氣歧管行程極短,配合兩組獨立水冷 intercooler及光學渦輪葉片監察器,進一步將 turbo-lag降至最低水平,並同時帶來更廣闊的扭力帶輸出,難怪甫推出便獲得( Ward's 10 Best Engine)殊榮。



DAS全寫 Direct Adaptive Steering,為 INFINITI獨門開發的先進轉向系統。有別於傳統的液壓或電軚裝置, DAS軚盤與前輪間僅得電線連接,扭軚時系統產生的信號會傳送至三部運算器,連同鏡頭偵測路況及車速,從而作出最準繩及快捷的轉向角度。 DAS另一個好處是不受外界環境影響,當車輛處於顛簸或非水平路面時,可成功阻隔傳往軚盤的不安回饋。而萬一系統失靈,備用傳向軸內的離合器會立即連接,變為純機械、無輔助轉向裝置,大可安心使用新科技。

撰文:廖宏俊
攝影:方保山
mailto:features@nextdigital.com.hk

    文章標籤

    INFINITI Q50S 3.0t Red Sport 4

    全站熱搜

    tvb4life 發表在 痞客邦 留言(0) 人氣()