80後的阿龍,從事洗衣業已有 12年,他認為洗衣業有其專業及技術,而且發展空間不俗,希望能有多些年輕新血入行。

青雲路

由司機做起 洗衣集團總經理機械化行業吸新血

贊助商連結

洗衣業給人的印象是古舊、工作簡單、沒有前景,但 80後的阿龍加入遠東乾濕洗集團有限公司後,他認為洗衣業有不錯的發展空間,他由運輸司機做起, 5年時間已升為總經理,管理集團員工共 100人。阿龍決心扭轉外行人對這行的印象,致力改善公司的工作環境,工序逐漸機械化,並建立管理制度,成功吸引了不少年輕人入行。

今年 35歲的阿龍現為遠東乾濕洗集團有限公司的總經理,他表示現時洗衣程序加入了不少機器輔助,與以前的工作環境已大有不同,「我哋個工場有一半已經機械化,好似有摺毛巾機、自動分衣機等,全工場亦設有冷氣,盡量令同事做嘢冇咁辛苦。𠵱家公司有十幾個 80後嘅後生仔,平均年齡算拉低咗唔少。」

老闆跟出車

中五畢業後,阿龍便投身社會工作,做過廚房、 sales、地盤及物流等工作,直至 05年,他加入遠東當運輸司機,每日收衫送衫,「當時成間公司得十幾人,直接教我嘢係老闆彭生,佢仲跟埋我一齊出車。佢同我講公司嘅發展藍圖,係想培訓啲人幫手管理,呢行少後生仔加入,我係全公司年紀最細,佢話想重點栽培我,聽到有呢個機會,我都想努力向上爬。」
有機會亦要懂得把握,阿龍為了學習,每天都花費不少時間去了解公司的運作,「當時送完貨,自己就上工場學洗衣工序,洗衫、摺衫、熨衫及包裝,所有崗位都做過,慢慢熟悉成間公司嘅業務係點運作。公司之後慢慢發展,司機由 2個變 4個,去到 08年我就升咗做物流部主管,出車之外仲分配司機工作;工場亦多咗新人,我又會去帶新人做嘢,每日工作 10個鐘以上,有時工場要趕工,我都會留喺度 OT,試過做到夜晚 12點。」




工場在今年增設自動分衣機,機器會檢測衣物上的條碼,再根據資料庫將衣物以分店地址或公司分類,方便之後的運輸工作。


為了減輕工人重複性的工作,工場引入自動摺毛巾機,工人只要將原條毛巾放入機中,機器就會將毛巾摺疊好。





阿龍表示現時工場約有 50%的工序由機械化處理,「洗乾摺熨都有機器輔助,希望令員工做嘢唔好太辛苦,𠵱家工場每日最多可處理三十多噸嘅衣物。」 被客人看輕

隨着努力,阿龍由物流部主管升為見習廠長,然後廠長。 10年,阿龍更升任為總經理一職,他表示最多的質疑是來自外部,「除咗管理工場外,我平時都要出去見客報價傾生意,初時會同彭生一齊見,但升咗做總經理後,自己都做咗一段日子,要獨自去見客,啲客見我後生,會質疑我能力,聽過佢哋話:『唔係呀嘛,總經理?』『你對洗衣有幾熟悉呀?』惟有做好自己,另外外觀上我開始戴眼鏡,見客時會着恤衫,想畀人穩重及唔好太𡃁仔嘅感覺。」
為了吸引新人入行,阿龍致力將工序機械化,減省員工所需的體力勞動及重複性工作,「我同老闆每年會去唔同嘅洗衣展覽會,之前去過日本、上海、德國,睇吓有咩機器適合我哋用。好似今年我哋就引進咗自動分衣機,我哋喺每件衣物貼上條碼,同事將洗好嘅衣物掛上部機後,佢會跟據資料庫將衫分門別類,例如以分店地址或公司去分,唔使同事再逐件去核對,快捷方便咗好多。」




雖然阿龍身為總經理,但有時工作多起來,他亦會落場幫忙。


每天阿龍會與各部門的主管開會,了解工場的運作及員工狀況。


阿龍的外貌年輕,所以出外見客時會穿恤衫,「平時會戴眼鏡,望落斯文穩重啲,有時第一印象幾重要,當然資料都要準備充足。」 申請 ISO認證

現時公司約有 100名員工,全由阿龍管理,公司與酒店、餐廳及健身室等合作,每日處理多達 25噸的衣物。他的目標是改變別人對洗衣業的刻板形象,「想建立洗衣業嘅專業形象,每個工序都需要一定嘅技術。最近我哋為公司成功申請咗 ISO管理系統認證,想建立形象,畀人知呢行係有規有矩,而且品質監控亦有要求,令人唔好看輕呢行。」
阿龍期望可以與各位同事一同將公司的規模發展得更好,「今年公司租多咗層單位作廠房及買多咗機器,令到我哋可以同時處理更多衣物,部署緊與更多嘅客戶合作,呢方面我就要更加努力,希望接到多啲業務返嚟。」




阿龍認為要管理好員工,最重要是以身作則,「其他人見你點做,就會跟住做,所以工作會跟足標準,做個好榜樣,啲人先會服你。」


阿龍不時會巡察工場內不同的地方,檢查衣物處理的狀況,確保交貨時達到客人的要求。 遠東乾濕洗集團有限公司總裁 彭耀光


對阿龍來說,老闆彭生是他的伯樂,「會想盡量打理好間公司,唔好辜負佢嘅期待。」

阿龍入嚟時我有觀察呢個後生仔,覺得佢做嘢好扎實、學嘢快,自己都想培養員工幫我管理公司,於是畀個機會佢。工場內每個崗位佢都做過,對內對外嘅表現都好好,希望嚟緊有更多新血入行。

點入行?

阿龍表示公司正處於發展期,有推出培訓計劃,希望吸引年輕人加入,「洗衣業嘅發展穩定,但肯入行嘅年輕人始終唔多,我哋正處於青黃不接嘅階段,於是我哋推出一個股東培訓計劃, DSE畢業就可以入行,我哋會經過面試,睇番應徵者係咪有心想做。我哋會安排佢由低做起,熟悉公司嘅運作,培訓期約 2年,之後視乎表現,會晉升為部門主管或者經理,成為管理層;另外,我哋亦會派發股分畀佢哋,公司業績好會有花紅,希望藉此吸引到更多後生仔入行。」
有意入行的人士可將履歷寄去: mailto:admin@fareastlaundry.com

晉升階梯

部門經理
$20,000至$23,000

部門主管
$14,000至$17,000

技工
$10,000至$13,000

後記:洗衣不易

工場添置了不少機器,但阿龍表示人力始終才是根本,「𠵱家好多工序可以機械化,但有啲始終要人手處理,好似機器熨唔出西裝嘅骨位,要人手先熨得靚;啲襪面積細,難用機器包裝,都要用人手去摺。」訪問期間,記者親身嘗試不同崗位,蒸熨衣服的位置雖有冷氣,但仍感受到撲面而來的高溫;摺毛巾看似簡單,但要摺得又快又好也有它的竅門,能把一件工作做好,都有其可取之處,洗衣業其實絕不簡單。

撰文:曾志恒
攝影:林文樂、部分圖片由被訪者提供

 

    tvb4life 發表在 痞客邦 留言(0) 人氣()