左起: Aaron Kwong、 Eric Loo、 Henry Lee Jr.

車人一句

打鐵趁熱  SEC超級耐力錦標賽× BMW M235i Racing

贊助商連結

香港嘅傳奇賽車手之中, Henry(李萬祺)可以話係殿堂級, 80後或以上嘅車迷,肯定記得喺 2000年澳門賽車中, Henry以 Peugeot 306與德國車手 Engstler鬥到最後一刻,幾經辛苦最後奪得亞洲房車錦標賽年度冠軍同東望洋亞軍,呢一幕絕對係車壇經典之一!
事隔十七年,曾闊別賽車近六年嘅 Henry,啱啱喺 4月 30日終於出山再戰,帶領同樣闊別賽車活動達十年嘅車手 Eric,仲有新手上場鬥車嘅 Aaron合共三人,參加四小時耐力賽事。筆者賽前落咗廣東國際賽車場,採訪呢班加埋過百歲嘅熱血中佬,開始時以為佢地玩玩吓,點知最後玩到個冠軍返嚟,簡直係個勵志故事。




暫時呢架 M235i Racing嘅表現,三位車手都覺得好滿意,不過因為車重連油同車手已超過噸半,有機會加快車胎、迫力皮同懸掛損耗,所以未來都會用更多碳纖部件偷輕,目標減多 60kg。

有冇試過約朋友食飯約成半年都未食得成?有冇發覺通常朋友聚會都係即興最成功?好多事情,有太多時間考慮,都未必成行!呢三位熱血中佬,兩位好耐冇鬥車、一位從未鬥過車,但決定參加呢場耐力賽事,由組隊、揀車、報名都只係今年 3月開始,時間短得誇張!
點解無啦啦呢三個人會走埋一齊比賽呢?事源由其中一位車手 Eric發起, Eric:「年頭同識咗好耐嘅 Team Master Champ負責人傾開,佢哋啱啱代理咗隻日本 WAKO's偈油,想搞吓宣傳,之後我提意不如鬥吓車,玩耐力賽順便試吓啲產品,講吓講到 3月,咁啱 4月 30日就有一場四小時 SEC超級耐力錦標賽喺肇慶廣東國際賽車場舉行,二話不說就開始埋班、揀車同報名參賽。」

SEC賽事簡介

SEC超級耐力錦標賽屬於國家體育總局同中國汽摩聯批准,係國際汽聯( FIA)登記註冊嘅國內耐力賽事。賽事分廣東、上海、北京、成都、寧波、貴州多個賽區,除咗有分站賽事,仲有單站賽事參加,賽事分為最短嘅一小時賽同最長嘅十二小時賽,屬國內最熱門嘅耐力賽事。

耐力 專用戰車

當決定鬥車, Eric表示佢哋首先揀車,再搵人埋班,「因為今次比賽目的只係想收宣傳之用,所以想件事有型啲,原本諗住用 Honda Integra Type R( DC5)或者 Renault Clio落場鬥,但因為想再有型啲,最後其中一位車隊同事提意不如用 BMW,我哋喺 3月頭又咁啱發現喺日本有架入門鬥耐力賽嘅易手 M235i Racing車盤,車價約$60萬左右,於是就搵日本嘅買手幫忙試車再搞手續運嚟香港,過程一個月都唔使。」
呢架 M235i Racing,屬於 BMW嘅賽車部門專門為德國 VLN耐力賽同紐布靈 24小時耐力賽而改裝嘅入門落場車款。全車由 M235i街車經過偷輕同強化而成,車內除咗拆晒所有乘客座位、音響同冷氣偷輕之外,更加入防滾架等賽車安全裝備,而沿用嘅 2,979c.c.直六 turbo引擎,馬力比街車多咗 7匹即 333匹,制動、懸掛都經過強化, setting主要以應付耐力賽為主。而 M235i Racing最特別嘅地方係沿用由 ZF提供嘅 8前速 Steptronic自動波,波箱機械結構不變,仍然採用傳統扭力轉換器,不過軟件經過升級, Eric表示,呢套波箱仍然提供 D波,不過升檔要手動,拖波就可以全自動搞掂。嘩!落場車都用自動波,各位要好好珍惜你手上嘅棍波車!




2,979c.c.直六 turbo引擎輸出最大馬力 333匹,因為需要可靠性,所以表現唔算好爆炸。


車內所有「享受」嘅設備已經拆除,留意波棍同波棍台都改用碳纖偷輕,而中控台嘅冷氣表板,其實已經冇用。


8速自動波箱仍然有 D波模式,不過升檔需要手動,拖波就會自動完成,當然亦都有+/-全手動。


軚盤改用猄皮包裹,頂部內置轉波提示燈。


懸掛同迫力都有 upgrade,但設定都係偏向舒適,連經常玩 track day嘅 AK都話,呢架車舒服過佢玩 track day啲街車。


性能冇大改,但外形就比 2系街車誇得多,最誇係前輪後嘅大型導風口。 BMW M235i Racing Spec.

引擎: 2,979c.c.直六 turbo
馬力: 333hp/5,800-6,000rpm
扭力: N/A
傳動: 8前速自動,附+/-模式
車重: 1,425kg
車身: 4,468× 1,987× 1,390( mm)
車價:約$600,000
查詢: Chronic HK( 3956 4944)

BMW有歸隊感覺

有咗車款, Eric開始着手搵車手。 Eric:「我哋揀咗揸 BMW落場,所以想搵一位比較具代表性嘅車手,大家都知香港揸 BMW賽車出晒名嘅車手,一係關兆昌、一係李萬祺。關兆昌一早話過唔再賽車,所以就試吓搵 Henry,因為我同佢都好老友。」
當 Henry收到 Eric電話,知道成件事嘅來龍去脈,好快就答允加入車隊。 Henry說:「我對上一次落場鬥車已經係 2010年鬥中國房車賽( CTCC),大家亦唔知道我平時係冇揸車,所以呢六年間,唔好話賽車,連車都冇掂!不過我真係好鍾意賽車,一直都心思思想玩番,但都要等到一個好嘅機會、好嘅車隊、好嘅比賽,我先會考慮復出。收到 Eric通知,知道有呢個機會參賽,我再問一問太太,佢話:『啱晒你啦!你咁鍾意賽車。』所以我好快就應承咗。」
除此之外,對 Henry嚟講,再次揸 BMW落場亦都係復出原因之一,「喺我賽車早期時候,我花咗好多時間喺 BMW之上。雖然之後都有用其他廠牌鬥車,不過始終都係 BMW陪伴我成長,今次知道會用 BMW戰車出戰,我會覺得好正,既有 old school感覺,亦都有重新歸隊嘅感覺,所以今次嘅復出,感覺都好好!」







當年 Henry同 Engstler喺最後一圈鬥到你死我活,最後 Engstler心急撞一撞 Henry車尾,衝線時已經追唔上。


Henry非常懷念奪得 2000年嘅亞洲房車賽總冠軍同東望洋亞軍呢一場比賽,認為呢次係人生賽車事業嘅高峰。 AK新手心理最重要

因為耐力賽唔想揸得咁辛苦,除咗 Henry,都想搵多位車手分擔,原本搵一名日本女車手,但後尾嚟唔到, Eric於是搵埋玩 track day玩到熟晒,但從未賽過車嘅「 track day小王子」 AK(Aaron Kwong)加入。 Aaron說:「原本聽 Eric話冇諗過贏先至參加,點知愈近比賽,見到 Henry喺 facebook知道佢好積極備戰,我就愈大壓力,大佬李萬祺喎!我細個已經睇佢鬥車,對我嚟講係神級車手,所以我勁驚有乜事會佗衰家!好彩 Henry非常 nice,佢同 Eric都教咗我好多嘢,尤其係心理上嘅控制。好似有一次我試車發生輕微碰撞,事後 Henry就過嚟同我分析,『你喺炒車前兩個彎已經甩甩哋,好明顯之後你心急想追返時間就出錯嘞!』呢句令我知道,錯咗就唔好追返之前,要繼續保持自己狀態先至正確。」







今次「轉會」 AK其實有啲唔願意,所以比賽當日佢着住 Alfa Romeo車衫打底出戰。


AK出咗名係 Alfa Romeo die hard fans,落 track day有一半時間佢都係揸 Alfa Romeo車款,呢架 155 2.0SP係其中一架。 當自己係新人

咁耐冇鬥車, Henry話賽前都有做吓運動準備,「我細個成日被父母話我臨急抱佛腳,喺呢六年間,我完全冇掂過車,甚至冇做任何運動。因為今次準備時間唔多,所以我都有特別去跑步、做 gym舉吓啞鈴,仲有控制少少飲食,所以呢兩個月體重輕咗 3kg。仲有比賽幾日前要去香港汽車會拎賽車證,汽車會要求每人都要做跑步測試,好彩有練到可以順利過關。至於駕駛方面,慶幸我都算有天份,我認我係一名神奇車手,平時唔揸車,一落賽場坐上車就可以比賽。不過,今次落場有啲唔同,因為太耐冇鬥車,所以今次我會當自己係新人咁去參與,好似車隊今次安排咗我四次試車,每一次我都好謹慎去試,唔會迫自己做番以前嘅嘢,要慢慢一步一步咁做去拎番個感覺,到咗賽前一刻,我覺得狀態已經回復至八成以上。」
除咗自己, Henry仲分享一件趣事,就係女兒原來係第一次見爸爸揸賽車,「有一次去珠海試車,我帶咗我兩位女兒去,佢從來都冇見過 daddy參加任何賽事,亦唔知 daddy會賽車,覺得好得意好開心。當時我見到佢哋嘅眼神,覺得佢哋會諗,嘩!原來 daddy都好似一個英雄人物咁,所以我自己都好開心。」




呢兩個月 Henry都有保持做運動,一提到佢 pass咗個體能測試,即刻笑到變「四萬祺」。


Eric長途最緊要舒服

今次嘅發起人之一, Eric比 Henry更耐冇鬥車,他表示今次比賽心態都係以玩為主。「我上次比賽已經係 2006年,當時喺澳門用 DC5賽 N2000賽事,今次參賽最主要係想玩返賽車,刺激吖嘛!但起初都怕體能唔掂,所以事前有跑步同踩單車練體能,不過以我經驗,賽車嘅體能要求點都低過踩單車,如果你可以由石崗踩上大帽山頂,你一定夠體力鬥房車賽。其實今次比賽,最辛苦都係要長時間坐喺咁焗嘅車入面,因為車內溫度隨時超過 50度。」
不過 Eric盛讚架車夠舒服,「呢架車似一架 set得好好嘅 track day car,而且用自動波,加上 BMW車架設計優良, handling唔再好似以前啲賽車要 set到好極端先至快到,所以多次試車主要係搵一個我揸得最舒服嘅 setup, Henry同 AK亦都有一致諗法,耐力賽都係舒服最緊要!」




放低賽車十年,用番舊嘅頭盔上陣,別有一番味道,放心!頭盔仲未過期。


復出前 Eric就係用呢一架 DC5,喺 06年最後一次落場鬥車。 耐力賽求穩定

開始時大家都笑言冇諗過贏比賽,點知愈近比賽就愈認真。 Eric表示:「因為係耐力比賽,所以架車唔可以谷到咁盡,尤其要考慮車胎、迫力皮、油溫同水溫,仲要留意耗油,雖然冇限入油量,但太多油車會重,但每次入油都需要時間,所以要計得好準。因為比賽規定一名車手唔可以連續揸超過一小時,所以我哋需要分四節。我哋會先派最有經驗嘅 Henry跑第一棒,希望起步可以殺出重圍,之後就由我盡量將名次慢慢拉開啲,再由 AK保持名次,最尾就睇吓當時情況而定,希望可以上頒獎台。」
至於 Henry,佢就非常信任兩位隊友,「 Eric係一名好穩定嘅車手,而且大家咁老友,一定信得過;至於另一位年輕新車手 AK,我睇佢試車時都好熟路,而且時間穩定,相信只要保持冷靜,可以有唔錯嘅發揮。」
不過 AK就好緊張,佢最終以完成賽事為目標,「比賽先知後台有咁多人,嘩!好大壓力,所以我唔迫自己快喇,目標唔炒車,安全完成賽事。」







耐力賽最緊要穩定,賽前大家搞鬼咁進行「儀式」,希望戰車生性。


每次試完車,除咗諗今晚食乜之外,佢哋仲會研究時間、性能同耗油數據,再計劃戰略。


最終有得上頒獎台,仲要拎組別第一名同總成績第三,各人都非常滿意。


衝線後 Henry即跑到車旁迎接最後一棒嘅 Eric,大家都非常興奮。 慢慢拋離對手


全場冠軍同亞軍都屬 TCR組別,而 Henry足足同頭車相差五圈,相差幾大。

比賽未開始, Henry已經喺排位賽做出比預計快 0.2秒嘅時間,取得第五名起步。正賽起步之後, Henry先揸二十個圈,大約揸咗 55分鐘左右,當中同一架「露筍」格鬥,最後成功過車令名次升至全場第四。之後如計劃由 Eric接棒, Eric將同第五名距離拉開至一圈,再由 AK接手, AK再將後車距離增至兩圈,勁呀 AK!最尾嗰棒就有驚喜,一架穩佔第三名嘅無限級組別 Caterham不停入維修站,最後 Eric過埋佢晉升至全場第三名,至於頭兩架都屬更強嘅 TCR組別,所以大家都冇諗過會追到。最後車隊順利衝線贏咗超級組冠軍同全場第三名。
不過今次比賽只係開始,未來大家仲要鬥多兩場,一場 7月五小時,另一場年尾八小時。最後 Henry話未來佢會繼續鬥車,今年亦有機會再戰澳門,佢仲傾緊,叫大家等佢返嚟!

撰文:黃德禹
攝影:葉偉豪
嗚謝: Team Master Champ

 

文章標籤

tvb4life 發表在 痞客邦 留言(0) 人氣()