新車激試

美型車系  Audi A5 Sportback 40 TFSI

贊助商連結

大概 2004年, M-Benz推出咗 CLS四門跑房車,以 coupe嘅車身線條套用喺四門房車上,即時得出好效果,靚樣遠近馳名。好嘢自然多人追捧,不過真正將跑車線條房車發揚光大嘅,係 2007年推出嘅初代 Audi A5 Sportback。 A5 Sportback之所以被車迷追捧,主因係唔單只用跑車線條,更加上五門揭背設計,實用性更高!今日 Audi終為大受歡迎嘅 A5 Sportback轉款,維持五門揭背之外,整體線條更流麗,可能係現時最靚嘅 Audi出品。




頭冚面積比上代大,覆蓋至前輪沙板與車身腰線連接,令車頭更簡潔。

當德國三大車廠不斷擴張車系同時,三間車廠都正設法整理原有嘅車系名稱,希望可以更有系統,令人更易入腦。 A4只有四門房車及旅行車,而 A5嘅原意就係雙門嘅 A4,所以 A5分別有 coupe版及開篷版, A5 Sportback最踩界,雖歸入 A5車系內,但又偏偏似 A4車身有四隻車門上落,但呢樣正正係 A5 Sportback爆紅嘅原因。

Audi A5 Sportback 40 TFSI spec.

引擎: 1,984c.c.直四 turbo
馬力: 190hp/4,200-6,000rpm
扭力: 32.6kgm/1,450-4,200rpm
傳動: 7前速自動波、附+/-模式
車身: 4,673× 1,846× 1,371( mm)
軸距: 2,764mm
0-100km/h: 7.3秒
耗油: 5.2L/100km
售價:$468,000起
查詢: Audi HK( 2528 1862)

車身更緊湊

現今世代嘅新車,都只會一代比一代大部,睇睇現時嘅 A4,車身已經追貼十幾年前嘅 A6。不過凡事都有例外,新一代 A5 Sportback車身比上代短咗 39mm、窄咗 8mm及矮咗 20mm,而雖然係同新 A4一樣用同系列 MLB底盤,但 A4嘅底盤經過改動,令新 A5 Sportback竟然比 A4仲要細部,所以唔好再以為 A5個車名好似好大,其實同 A4係兩類嘢。之所以將 A5 Sportback同 A4比較,係因為 A5 Sportback車身同樣有四隻門,後座乘客都可以自由上落車。上代 A5 Sportback有好好銷售成績,全拜有 A4近似嘅用途,但又有靚仔外表。
今代又靚仔在那?首先係四隻車門維持採用冇窗框設計,開門就會睇到有型之處。此外,新款車頭冚零舍大塊,覆蓋至前輪沙板上方,邊緣位置剛好與車身骨線連接,令車頭冚同車頭好似一體化咁,先唔好理有冇實際減低風阻作用,但肯定更美觀。車身及車尾方面,冇乜浮誇設計,一條鋒利腰線由頭燈貫穿至尾燈,而尾冚末端又向上揚起,整體非常簡潔,大概呢個就係代理選白色車作測試車原因,好 pure、好 elegant。




Sporkback當然最重要係個車尾,新款尾門設電動開關,方便用家。


同 A4最大分別就係四隻車門都採用冇窗框設計,瀟灑!


車身長度只有 4,673mm,比現行 A4甚至上代 A5 Sportback都要短。


採用新世代家族式面譜,已大幅減少圓渾線條,取而代之係鋒利嘅線條。 型格家族成員

A5家族大大話話都有三大車身型號,除五門揭背嘅 A5 Sportback外,仲有 A5 Coupe及 A5 Cabriolet。 Coupe及 Cabriolet都已到香港,代理將會安排同時登場,據知連高性能 S5 Coupe都包括在內,買家可以慢慢揀到啱心水為止。

雙門正宗  A5 Coupe

A5車系誕生之始,根本就係雙門跑車,所以 Coupe版先係 A5車系元祖。新一代 A5 Coupe車身及軸距都同 Sportback版本一樣,不過車廂空間相比較狹窄,但正因為少咗兩隻後座門,所以車身剛性更好,可以承受更大馬力輸出,最強、最堅、最喪嘅 450匹 RS5都只會出現喺 A5 Coupe之上。

堅守軟篷  A5 Cabriolet

雖然開篷車大潮流係電動硬頂,但 Audi工程師認為如四座位嘅 A5 Cabriolet好似 BMW 4系開篷咁改用沉重嘅硬頂,會嚴重影響行車表現。為此新一代 A5 Cabriolet堅持用電動軟篷,而且可以喺車速 50km/h之下開閂,使用上比硬頂更靈活。此外,由於篷頂機關負載低,令開篷只需 15秒,閂篷都只係 18秒,完勝硬頂。

車廂源自 A4

老實講,只要試過 A4,入到 A5 Sportback車廂就會有熟口熟面感覺,全因百分之九十似樣!但似樣冇罪,好用最緊要!中控台用咗最新式設計,冷氣設定最靚仔,溫度調節扭掣就已經有埋溫度顯示,醒目!如果用 TT嘅冷氣出風口顯示溫度就更好。此外,中控台上嘅按鈕唔多,大多數操作都歸納到波棍台上嘅 MMI扭掣操控,作用當然係令駕駛艙更簡潔,但用家就要依賴顯示屏。波棍操作都電子化,短小波棍轉波後會回到置中位置,用家唔可以好似以前舊式波棍咁憑波棍位置去知道入咗咩波,一定要睇表板或波棍旁嘅紅色字。仲有係 P波已經變成一個按掣,而且仲要喺波棍表面,唔好以為將波棍推到最高就係 P波,實情係後波嚟,要小心。
今代 A5 Sportback其實已經可以選配 virtual cockpit屏幕表板,但測試車並未裝上,只用返最普通指針表板,好嘥料!不過作為駕駛者, A5 Sportback嘅原裝軚盤及大天窗實在比上代更吸引。作為後座乘客呢,乘坐舒適性都有所提高,空間同上代差唔多,唔及 A4闊落,中間位地台仍然有大大嚿凸槽,但冷氣出風口新增溫度調節,高級咗!







駕駛艙同 A4有九成相似,盡量簡化中控台上嘅各式按鈕。


後座空間同上代相若,而中間位前方嘅冷氣出風口則新增溫度調節。


前座未有用上 Sport line款式,承托力及賣相當然冇咁好。


尾廂空間達到 480L,如果摺平後座背,更可貫穿成一個 1,300L嘅儲物空間。


雖然未有採用天幕車頂,但電動天窗面積已比上代大約五分一,為車內帶來更強空間感。


新一代 A5 Sportback其實已可選配 virtual cockpit屏幕表板及 head-up display,可惜測試車冇裝,只用傳統指針表板。 定位較斯文

今次測試車為前驅嘅 A5 Sportback 40 TFSI,可以話係入門型號,配 2.0公升 turbo引擎,馬力輸出比較中庸,只有 190匹馬力,對比同樣用 2.0公升 turbo引擎嘅 VW Golf GTI,輸出明顯低一截。 Audi之所以咁做,當然有其理由,主要想令引擎輸出較為平順,低轉扭力豐裕先可以帶嚟有勁度嘅起步表現,太大馬力對一般斯文用家嚟講,實在得物無所用,所以索性將整體輸出調整至更平均,令用家更易拿捏加速感。然而, A5 Sportback 40 TFSI嘅扭力一啲都唔弱,低至 1,450rpm就有 32.6kgm最大扭力,令用者偶發性加速更有信心。
波箱方面,就算係入門版嘅 A5 Sportback都配 7前速 S-tronic波箱,喺雙離合器發功下,轉波表現比 tiptronic更爽快,冇咗以前嘅遲緩感覺,而且比以前更慳油,耗油表現得出 5.2L/100km,比上代嘅 1.8T更慳!或許因為 A5 Sportback 40 TFSI只屬斯文入門車,懸掛表現同引擎取向相似,冇乜強烈跑車味,舒適性有餘,好適合只玩外表唔玩性能嘅「真正用家」,「玩家」就要睇下 S5或 RS5嘞!







相信未來兩、三年 Audi嘅新車都會用上類似嘅波棍,要留意 P波喺波棍上,要撳掣嘅!


除波棍可操作+/-模式外,軚盤撥片都可以,但 Audi一向嘅設計都比較細小,使用起嚟唔夠爽快。


中控台設有一排按鈕,分別操作駕駛模式、停車自動熄匙系統及 ESP行車穩定系統。


2.0公升 turbo引擎採用相對保守方法調校,最大馬力「只有」 190匹,集中令整體輸出更平順。

撰文:袁國基
攝影: Tedd Choi

 

    文章標籤

    Audi A5 Sportback 40 TFSI

    全站熱搜

    tvb4life 發表在 痞客邦 留言(0) 人氣()