始終非真正越野車身份,為免出現尷尬場面,廠方沒有於墨西哥境內安排攀山爬坡環節,但依然提供一顛簸的沙泥路供試車。試駕車款全部設有氣壓避震(最低降 15mm,最高升 45mm),在 comfort模式下能成功過濾路面跳動, quattro系統亦明顯「幫到手」,路噪及車廂肅靜性明顯比上代出色,全新電軚結構轉向準兼富恰好路感,又一好揸 SUV。

壹號幹線

戰略性部署  Audi Q5 2.0 TFSI

贊助商連結

車廠研發新車,從來都並非輕而易舉事情,尤其是當上一代已建立良好口碑,要突破往績,更是難上加難。
第二代奧迪 Q5,睇落同上代差不多,某程度上亦像縮水版 Q7。唔熟車,會認為欠誠意,但廠方的策略其實就是要比「很好」的上代進化成「更加好」,裡外皆為全新設計,無論你是上代 Q5車主,抑或有興趣「過檔」的準買家,只要你踏進陳列室兼試揸一轉,這部車就有辦法,令你乖乖落訂。

快而穩,豪且靜


與上代一樣, 2.0 TFSI將會是輸港主打引擎配搭,馬力從 225匹提升至 252匹,扭力增多 2.0kgm, 0-100km/h加速從 7.1秒縮短至 6.3秒,以 SUV來說,好 X快!

售價:待定(估計約 51萬)
引擎: 1984c.c.,直 4;前置,四輪驅動;渦輪增壓
波箱: 7前速自動雙離合器(附+/-模式)
馬力: 252匹/5000-6000rpm
扭力: 37.7kgm/1600-4500rpm
加速: 0-100km/h, 6.3秒
極速: 237km/h
長/闊/高: 4663mm/1893mm/1659mm
重量: 1720kg
耗油量: 7.0L/100km(公路及市區綜合計算模式)
查詢: Audi Hong Kong
網址: http://www.audi.com.hk 

讚一讚

新車架及懸掛組合大大提升駕駛感,穩定咗又寧靜咗;車廂豪華程度及空間感更勝上代。

彈一彈

外形未算石破天驚,預計亦會比上代稍貴,加上同級對手眾多,突圍有難度。

Audi Q5 2.0 TFSI

奧迪設計團隊從來都喜愛同顧客玩 photo-hunt,第二代 Q5同上代(右下圖)猶如孖胎般相似,一眼亦都認得出與 Q7有血緣關係,但細心留意新舊款側線條,便會發現其實好唔同,車頭拉長一點,車頂又扁一點。再睇數據,車長及軸距增長 34mm及 12mm; 1893mm闊度不變但矮了 4mm,風阻系數是頗出色的 Cd0.30,簡單講,即係尺碼近乎冇變過。







上代 Q5( 2008-2016)


試車地點選擇於周圍都係仙人掌的墨西哥,原因是全線 Q5於投資額高達十億歐元、年產量可達 15萬台的新廠房生產,試車都試得特別新鮮。


中控台設計比上代簡潔,強調更多私人化設定及互聯網連繫,附設 HUD顯示及無線手機充電裝置,想耳朵更好享受的話, B&O音響組合必定可滿足閣下需要。


與 Q7相同的設計詞彙,多邊形鬼面罩與頭燈連成一起,進氣鰓位極有立體感,的確有型過上代。輪圈提供 17至 21吋選擇,愈細愈舒服,愈大愈有型,但緊記有得必有失,針冇兩頭利。


12.3吋高解像 virtual cockpit已成為奧迪新車「招牌菜」,但最好還是配合導航系統才能用盡其縮放功能,話晒,有型之餘都要有點實用價值嘛……


平頭波棍是近年奧迪又一成功設計,造型似「鋸短版」飛機操縱桿,行程短而準,枕手位觸感又正,睇得又打得。


座椅轉用全新剪裁, S-Line版本更採用菱形繡線,好睇亦好坐。


相比起已經唔算窄的上代,正常乘客未必坐得出拉長 12mm軸距後會有更闊落的腳位,不過賣點依然係提供到好舒適的坐姿,若有側簾的話便完美了。


燈組全為 LED設計,亦可額外選配功能更強的 Matrix LED;尾燈亦首次加入「走馬式」指揮燈技術,預計到港車款將會是標準配備。

後座可作 4-2-4翻摺,容量可從 550公升擴充至 1550公升;兩側有雜物格,地台附設軌道,底下亦暗藏儲物空間,加埋電動尾門,實用性俾足 100分。









搞不清新舊款外形唔怪你,但必須知道新車轉用了口碑極佳的 MLB模組車架,剛性大大提升外,新物料結構亦將車重大減 90kg,偉大發明是也。



新 Q5的四驅為最先進的 quattro ultra,正常時間會傾向前驅模式,當系統偵測到路況改變或需要更多過彎抓地性時,會自動透過多碟式離合器將動力傳送至後軸,配合可向獨立輪胎施以制動的主動扭力分布裝置,令新車在毋須配備四轉系統情況下,一樣有穩定及靈活的操控表現。

撰文:廖宏俊
攝影:廖宏俊(墨西哥洛斯卡沃斯)/ Audi Media Service
mailto:features@nextdigital.com.hk

 

    文章標籤

    Audi Q5 2.0 TFSI

    全站熱搜

    tvb4life 發表在 痞客邦 留言(0) 人氣()