Daniel指近年香港的糖果店選擇種類不夠多,不能帶給客人新鮮感,故希望開設以糖果為主題的零食店,為客人帶來快樂和選擇。

創業通

飛外國糖果展入貨 攻街坊客人

贊助商連結

糖果深受大人細路的歡迎,現時每走進不同的屋苑商場,看見的都是千篇一律的大型連鎖零售店,當中大部分也售賣一式一樣的貨品,種類和選擇也不夠多,要有特色又有多選擇提供的糖果店已買少見少。
80後的 Daniel在去年開設了 SWEET & SOUR味之堂,親自從世界各地搜羅超過 60種的糖果,為客人帶來更多新鮮感,從乏味的生活中,增添一點新意!




今年初, Daniel飛往德國參加 ISM糖果展覽,尋找更多不同款式的糖果。

經過 SWEET & SOUR的店鋪,即被粉色系的裝修吸引眼球。在只有約 140呎的空間內,已提供超過 60種類的糖果,甚至是坊間少見的食品,創辦人 Daniel表示:「我哋嘅裝潢採用粉紅色係想吸引人注意,店內有一半以上嘅糖果都係直接喺外國入貨,我成日會去唔同國家參加糖果展覽,好似去巴黎及上海嘅 SIAL、德國嘅 ISM和泰國 Thaifex等,可以緊貼家嘅市場潮流,為香港客人帶嚟更多從未見過嘅產品,好似網球造型嘅糖都好多人買。」
Daniel原本任職社工,月薪 2萬多,但他去年毅然放棄穩定收入的工作,一心一意創業,「始終打工前景有限,以前做社工有句俗語係『餓你唔死,但唔會發達』,見自己做咗 10年都想改變。屋企人係做軟糖批發,佢哋都想盤生意有新發展,就決定開糖果零售店,我仲可以親自接觸到唔同嘅客人,了解佢哋嘅口味。」

做區內客生意

去年 12月, Daniel在將軍澳新都城中心二期商場開設 SWEET & SOUR,「我哋批發嘅 office喺觀塘,最初開鋪嘅目標係想揀喺附近,易啲管理及減少運輸交通嘅成本,咁啱將軍澳新都城有鋪招租,見人流幾多,交通好方便,港鐵站一出就係,地理位置都近觀塘。」
今年 3月, Daniel再在秀茂坪商場開分店,「始終有兩間店係會易啲入貨及散貨,入貨價錢又會平啲。其實喺搵鋪時,我都有去過銅鑼灣等消費旺區睇過,但見到好多係空鋪,加上家成日講香港嘅零售市道差,反而我覺得啲人會留番喺本區消費,做街坊生意好過做旅客。」




Fini bubble gum(左)$5@2/ Fini Giant Tennis Ball bubble gum(右)$22


Bulgari棉花糖$18.8


Daniel表示香港人很愛吃酸糖,故店內提供多款酸糖,迎合香港人的口味,$9.8至$17.5不等。


Tornado Shooters Sour$7@1$15@3 秀茂坪客大不同

Daniel指出很多人誤以為秀茂坪屬消費能力低的地區,但經過他實地考察後,卻出乎意料之外,「新都城屬於中產,客人反而會考慮好多嘢,試過有客人問我邊款糖果會健康啲。相反,我見到秀茂坪冇乜同類型嘅糖果店,人流又多,加上消費模式比較簡單,唔會諗咁多,想買就會買,秀茂坪店試過只計夾糖,一日之內做咗$6,000生意。」
做零售店最重要當然是貨品的質素和種類,除了會參加不同糖果展外, Daniel還會親自飛往台灣、意大利及西班牙等地搜尋產品,選購合適香港人口味的糖果,「香港人最鍾意試新嘢,包裝得意有趣就會買,例如意大利 Bulgari棉花糖嘅造型設計好可愛,有花形、黑莓、磨菇及笑哈哈等,經常賣到斷貨。此外,香港人都好鍾意食酸糖,試過有客人一走入嚟問邊款最酸,所以我哋都會入多幾款。」




當有貨品運到店鋪時, Daniel也要幫忙上貨。


秀茂坪店位於秀茂坪商場,佔地約 150呎,客人和將軍澳店一樣,以街坊客為主。


將軍澳店位於新都城中心二期商場,佔地約 140呎,兩間分店同樣售賣超過 60款糖果及零食。 入貨量試過先知

Daniel表示最困難的地方是入貨的數量,「之前入過一款朱古力糖,點知冇乜人買,因為唔係獨家貨,同其他店鋪售價相約,客人未必會喺我哋度買,最後惟有以入貨價賣出去,打咗個和。至於有時就係入得太少,原來 Bulgari棉花糖好多人鍾意,成日賣到斷貨,我哋就要即刻補貨,每樣貨都要試吓先知好唔好賣,有時真係好難預測要入幾多。」
SWEET & SOUR現時設有兩間分店,現屬發展階段,當然要落足力去宣傳, Daniel說:「我哋有職員管理 facebook page,有咩新貨都會即時 update,除平時有提供學生優惠外,啱啱過去嘅復活節都有期間限定,吹波糖買一送一,銷量多咗 3倍。」




除主打糖果外,店鋪亦有售賣其他零食。LOVE FARM酸甜檸檬乾(左)/ LOVE FARM酸辣檸檬乾(右)$14.8@1$25@2


店內有售賣夾糖,超過 60種軟糖供客人選擇。$8.9@100克 入史蜜夫糖果


Daniel會與職員了解當日店中的銷售量,從而再調整入貨量。facebook@sweetandsourhk

Daniel還會睇準傳媒報導的新動向,借媒體來宣傳,如早前有報導介紹過香港製造的「史蜜夫糖果」,「睇到有報導介紹後,我哋立即同對方聯絡,之後再喺 facebook page宣傳我哋有得買,咁啱食到個勢,有客人知道呢度有得賣都會專登嚟買。」
雖然開業只有短短半年時間,但 Daniel已計劃向多方面發展,「唔想局限喺鋪頭入面,我會試吓同婚禮及酒店等活動合作,供應糖果。我最初 send email逐間去問,家都同兩間酒店傾成咗合作。至於零售店就會睇定啲先,但會試吓喺唔同商場租車仔檔試水溫,要了解到當地嘅消費能力,先決定租唔租,風險就會低啲。」



客人 Janet
呢度嘅糖好特別,喺坊間好少見到,而且仲有得夾糖,好有兒時回憶,加上有學生優惠提供,價錢好抵買,會叫埋身邊嘅朋友嚟幫襯。



客人林太
一家大細嚟過買幾次糖,呢度有好多選擇,每次嚟到小朋友都好開心,樣樣都叫我買。

開業成本(將軍澳店)
租金:$90,000( 2按 1上)
裝修:$200,000
入貨:$60,000
總投資:$350,000

每月開支(將軍澳店+秀茂坪店)
營業額:$200,000
租金:$50,000
人工:$50,000( 2名員工+1名老闆+5名兼職員工)
入貨:$70,000
盈利:$30,000

撰文:林依炫
攝影:林文樂
部分圖片由被訪者提供

 

    tvb4life 發表在 痞客邦 留言(0) 人氣()