偉立引入 VR預覽靈堂服務,讓客人以第一身去感受多間靈堂的空間及陳設,從而挑選合適的一間,十分方便。

青雲路

三代接手長生店 推 VR預覽靈堂服務

贊助商連結

生、老、病、死是人的必經階段,而最後的儀式,我們總想帶着親人的想念,好好地與這個世界告別。今年 25歲的羅偉立,是永福殯儀館的殯儀策劃師,長生店自祖母一代開始經營,到他的父母接管,現在則由他接手。他的工作是為先人安排殯葬儀式,除了學習傳統的禮儀外,他更希望令這行透明化、現代化及科技化,故他引入了西式靈車及 VR預覽靈堂服務,方便行動不便的人士及老人家,令過程更有效率。




有鑑現時愈來愈多人信奉西方宗教,偉立特地從日本購入西式靈車,讓客人有更多選擇。

年輕一代總對殯儀行業很好奇,卻又很少機會接觸,偉立表示:「最多人問我有冇撞過鬼,好彩咁耐以嚟都冇,加上我信天主教,所以都唔怕。殯儀策劃師嘅工作,就好似婚禮策劃師一樣,要去安排一個活動,我哋仲需要做多少少程序,例如出死亡證、訂火葬爐及出火化許可證等。」另一方面,他引入的 VR預覽靈堂服務可謂一大突破,希望藉此推動殯儀業現代化。
偉立與從事 IT的朋友合作推出 VR預覽靈堂服務,暫時是全行獨家,他覺得時代進步,殯儀行業亦需科技化配合,「我哋以中介形式去幫客人租用靈堂,以往畀佢哋睇唔同靈堂嘅平面相片嚟揀,或者約時間去實地睇,夾好多個單位先約到,好浪費時間。家採用 VR技術,坐喺度已經睇晒咁多間靈堂嘅裝潢,包括世界殯儀館、萬國殯儀館、九龍殯儀館、寶福紀念館、鑽石山殯儀館及天主教墳場禮堂等。」
偉立表示有不少客人是老人家,當中亦有行動不便的人士,「 VR畀到客人第一身嘅感受,感受到靈堂嘅空間大小、燈光及座位數目,節省時間又方便。」

6歲跟爸爸執骨

永福殯儀館自祖母一代開始經營,其後由父母管理,至今歷時 40年。出身於從事殯儀家族的偉立,自小已有相關的工作經驗,「最記得一次係 6歲跟爸爸返內地執骨,我負責用牙擦清走骨上嘅筋肉,但啲骨好脆弱,我未識控制力度,試過扯甩咗出嚟。」因當時年紀尚小,又沒鬼神概念,故偉立沒有太害怕或留下心理陰影。
偉立在內地暨南大學修讀工商管理, 14年畢業後,他決定接手家族生意。「 Last year時,我有去企業做實習,亦有返屋企做兼職,主要做仵工、抬棺及揸靈車等工作。」全職工作後,偉立要學習更多事項,如遺體化妝及行內禁忌,「如果自然去世,用同平日差唔多嘅化妝品就可以;若因意外導致見唔到臉型,咁就要做塑形嘅步驟,即用類似紙皮嘅物料去重新塑造臉型。」
當提到禁忌,偉立表示初入行時,他很少說話,需從觀察中學習,「要少啲講『你好』、『多謝』,仲有唔可以講『下次再見』等。」




偉立計劃日後可用電腦系統開單,並與行政系統連接,「人手寫單嘅出錯機會遠比電腦處理高,我希望將程序電腦化,減低失誤嘅機會。」


為了令殯儀業的透明度增加,讓年輕一代對此行業有更深入的了解,他不時會為各機構進行演講及簡介,從而招攬新血。 處理跳樓遺體

此外,搬運遺體亦讓偉立很難忘,「有一次去檢房拎遺體,嗰次係我第一次處理跳樓 case,喺視覺上真係好衝擊,俾遺體嚇親,呆咗成秒,但之後好快冷靜落嚟,因為要諗點樣搬去棺木度。遺體分開咗兩半,因切口唔齊嘅關係,器官跌晒出嚟,我哋唔可以徒手掂,最終決定連個袋一齊搬走。」
最令他頭痛的是記家族的稱呼及儀式的程序,「花牌上要寫輩份稱謂,例如姨媽個女係表姐或表妹、外甥個仔嘅仔係外甥孫仔。我遇過客戶係海豐人,儀式同平時唔同,好似喺守夜嗰晚唔着麻衣,第二朝要着成服等,呢啲花咗好多時間去記。」偉立表示禮儀、稱呼及儀式上的程序,有很多細節要緊記及需了解背後的原因,如喃嘸師傅的頌經儀式,是替先人積褔及消災解難,在這些題目上,他都花了不少心力。
偉立深明傳統禮儀一定要學,因為是對先人及其家屬的尊重,但在營運及管理上,他希望接手後可以帶來一些改革,令運作更有系統及有效率,「以往我哋喺管理上比較守舊,仲用緊手寫單,甚至行政運作都係手寫,出錯嘅機會較大。我會逐步改用電腦系統,一般文書功能唔會太難上手。」




用電話 app可以控制為 360全景模式及 VR實景模式,因操作方便,殯儀館的員工都很容易上手,並教客人使用。圖為寶福紀念館的 VR實景照。


偉立示範使用 VR技術預覽靈堂,「客人戴住 VR眼鏡,移動身體,就可以睇到靈堂全貌,一次過睇晒世界殯儀館、萬國殯儀館、九龍殯儀館、寶福紀念館、鑽石山殯儀館及天主教墳場禮堂等。」


偉立與從事 IT的朋友合作,推出 VR預覽靈堂,「過程唔會太複雜,我哋會同靈堂約時間去影相,日後會定期更新,同增設新地點嘅相片。」 引入西式靈車

除了引入 VR設施外,他亦從日本引入西式的靈車,「香港愈嚟愈多人信奉西方宗教,所以我引入咗西式嘅靈車,畀客人有多啲選擇。」
當記者問及偉立,經常處於這種離別的傷感環境,會否令自己的情緒受到影響時,他說:「唔同人對錢、面子及權力會有執着,試過有一次,見到個客人表面去好忤逆,但到送先人最後一程時,佢成個人崩潰,睇到好多人性上嘅轉變,我因而思考多咗人生及價值觀,警剔自己。」




雖羅太(右)笑說偉立的表現只屬一般,但其實她感到很欣慰,「我哋對佢都好大信心,引入 VR真係方便咗好多,我哋都諗住做多幾年就退休,由佢全權接手。」


偉立表示替遺體穿衣服、清潔及化妝、主持禮儀等都很多步驟需要注意,「着衫都好講學問,一般要兩至三個人一齊做,着一次大約要 20分鐘。」


信奉道教的先人,需穿上壽衣,偉立表示:「男士要着單數件數,女士要着雙數;西方宗教或者冇信仰嘅就着便服。」 

偉立表示,從事這行後,對不同種類的木及石頭都多了認識,「棺木除咗分中西式外,仲有分用途,土葬用嘅棺木大多採用杉木、檀木、柚木及香木,而火化用嘅會係合成纖維。墓碑用嘅石,會有花崗岩、雲石及麻石等。」

後記:女友唔介意

偉立表示朋友及同學對他從事殯儀業大多感到好奇,並常常問他行業的細節,雖然朋友沒有對此避之則吉,但這會否很難找女朋友呢?「當然會,因為我工作大多只接觸沒有生命嘅女性……但好幸運,家女朋友都唔介意我從事呢行。」其實殯儀業沒有甚麼需要恐懼,只要用心去做,每個行業都值得尊重。

點入行?

現時任職殯儀策劃師的偉立,月賺約$20,000,他表示殯儀業入行相對地難,「一定要識人做呢行先入到,但我都歡迎 walk in嘅應徵者。我最 concern係佢哋對死亡嘅睇法及為咗乜嘢入行,因為呢一行唔係好似大家講咁賺錢,如果係為賺好多錢,就未必啱。」雖然入行難,但他相信未來會有轉變,因這行業的資訊慢慢透明化,坊間亦有開設殯儀禮儀師課程,故他希望日後能夠公開招聘人手,讓更多年輕一代可以入行。他表示初入行的仵工,日薪約為$700至$800。

永福殯儀館
地址:九龍紅磡華豐街 6號
電話: 2303 1089

撰文:霍芷晴
攝影:葉偉豪

 

tvb4life 發表在 痞客邦 留言(0) 人氣()