長期測試

潮韓混能深體驗  Hyundai IONIQ Hybrid

贊助商連結

揀混能車,大家第一個印象都會即刻浮現 Toyota Prius,冇辦法,始終 Prius係混能車始祖,已經入晒腦。相比推出已二十年嘅 Prius,去年抵港嘅韓國混能車 Hyundai IONIQ,就只屬入門初哥,面對咁強勁嘅對手, Hyundai一定要搏到盡,咁先至有一線希望,所以呢架 IONIQ可以話係 Hyundai嘔心瀝血之作!
雖然 IONIQ一到港已經試過,但得半天試車時間,講真用一陣梗係好,用多一陣先知有冇問題。今次問代理借嚟 IONIQ測試四日三夜,試真啲睇吓係咪可以 K.O.日本對手!




車身應用低風阻數據而設計,車頭設計就用咗類似 Elantra嘅家族式六角形鬼面罩。

Hyundai IONIQ Hybrid Spec.
引擎: 1,580c.c.直四
馬力: 105ps/5,700rpm
扭力: 15.0kgm/4,000rpm
摩打型式:永磁同步摩打
摩打馬力: 43.5ps
摩打扭力: 17.3kgm
傳動: 6前速自動、附+/-模式
軸距: 2,700mm
車身: 4,470× 1,820× 1,450( mm)
車重: 1,370kg
0-100km/h: 10.8秒
耗油: 3.4L/100km
車價:$258,000
查詢: Hyundai HK( 3428 8288)

採用五門揭背、斜尾設計嘅 IONIQ,佈局都有幾分似 Prius,尤其用咗上下兩截式尾玻璃。不過 IONIQ並唔係抄 Prius,因為外形經電腦計算,為咗令車身有更低風阻,先至計算出呢個形狀,市場上唔少低風阻車款都用類似設計,最近例子就有 Tesla Model X。而 IONIQ確實同 Prius及 Model X一樣,擁有 Cd.0.24嘅低風阻系數,所以呢個形狀已經成為低風阻指標。
筆者用車多日都冇人認錯佢係 Prius,反而一睇個鬼面罩就知係 Hyundai出品,證明 IONIQ已經成功為 Hyundai打開新一頁。




鬼面罩內設有開合風閘,有需要時先開啟,有助保持 Cd0.24低風阻。


車尾採用上下雙玻璃設計,但不設尾水撥,落雨時就會上玻璃濛、下玻璃清,影響車尾視野。 設備性價比超高

韓國車一向以物超所值而見稱, IONIQ貴為首款到港韓國混能車,一定落足料。車價廿六萬有找,唔好期望車廂有幾豪華,不過以多種可再循環再造物料包裹嘅車廂,一啲都唔「膠」,尤其覆蓋中控台嘅彈性物料,唔會有硬梆梆嘅感覺,加上冷氣出風口以藍圈裝飾,扇頁更以金屬物料製造,同接近呢個車價嘅 Prius C比較, Prius C絕對叫簡陋,要比較,唔該拎貴近十萬嘅 Prius比較!




真皮前座加入藍線裝飾,電動記憶調校更包括兩方位背部承托。


後座空間不俗,有後座冷氣出風口,夏天快到,非常有用。


中控台雖然冇用到金屬裝飾,但所用嘅物料都唔係硬梆梆,加上代表環保嘅藍色點綴冷氣出風口,直迫車價更貴嘅 Prius。

至於 IONIQ嘅設備,可以話齊到嘩嘩聲,而且每樣都用得著,唔會多餘,單係冷氣系統,已配備雙區獨立恆溫同後座出風口,級數已直迫中型房車。為咗令冷氣更節能,廠方特別添加「 Driver Only」模式,啟動後冷氣就會單獨為司機位輸出冷氣,減低喺冇乘客之下,冷氣對動力嘅負擔,呢個模式 Prius都有,不過重覆一次,車價貴近十萬。除此之外,電動調校司機位具備記憶功能,更配備自動頭燈組連 LED日行燈、前後泊車感應連後鏡頭、 Keyless無匙引擎啟動、定速巡航系統、更貴嘅 Prius都冇嘅天窗,講真如果 IONIQ車價提高至三十萬,相信對 Prius都有一定威脅。




按下冷氣「 Driver Only」按鈕,雙區冷氣就變為單區顯示,只為司機提供冷氣。


前座手枕儲物位,近乘客一方設有平板電腦安放格,手枕內有 USB充電插槽。


即使後座出風口,扇頁都以金屬物料製造,感覺高級、耐用。


中控台設有手機安置平台,附近更有兩組 12V( 180W)電源,非常靈活。


車尾視野同 Prius有幾分相似。


尾廂提供基本 550L容量,摺下 60:40尾座,尾廂容量可提升至 1,505L。 上乘操控能力

用料上乘嘅 IONIQ,點只玩設備? Hyundai喺 IONIQ車架都落足料,車架花上 53%超高拉力鋼製造,剛性非常足夠,駕駛起來車身有股實在感,即使懸掛同輪胎設定都以舒適為主,但配合尺寸剛好嘅多功能平底軚盤及唔算虛浮嘅軚感,操控完勝已經改善咗操控感嘅第四代 Prius,所以揀 IONIQ原因唔一定只為抵買,當你想要一架好玩而又實用嘅混能車, IONIQ一定會係 wish list之一。
不過, IONIQ都有一點不及 Prius,即使 Hyundai廠方已強調為 IONIQ各區加強隔音能力同喺表板用上三重隔音墊,但試車多日察覺懸掛跳動時,車尾不時都會傳出輕微雜音,車底傳出胎噪亦都明顯,車廂寧靜度未必及得上 Prius,都係嗰句,咁你畀多十萬囉!




除咗尾玻璃佈局,其實冇一部分似 Prius。


呢副 Kappa 1.6 Atkinson GDi引擎,最大馬力輸出 105匹,最大扭力輸出 15.0kgm,配合 43.5匹馬力同 17.3kgm扭力嘅摩打輔助,於普通模式時輸出過於保守,需於 sport模式時才能大放異彩。


多日來使用 IONIQ,絕對令筆者充滿驚喜,日本混能車似乎要小心啲,以免步入日本手機同電視品牌嘅後塵。 過車要入 Sport模式

IONIQ貴為首架韓國獨立混能型號,所用嘅混能系統不容有失。 IONIQ配備 1,580c.c.直四自然吸氣引擎,最大馬力輸出 105匹,最大扭力輸出 15.0kgm,再以 43.5匹馬力同 17.3kgm扭力嘅摩打輔助驅動,動力上 IONIQ引擎馬力比 Prius多 8匹,反而摩打馬力就比 Prius少咗 28.5匹。輸出加起上嚟比 Prius少,而 IONIQ車重又只比 Prius輕 5kg,似乎 IONIQ一定輸梗,但 IONIQ所配備嘅 6速雙離合器波箱,足以令 IONIQ加速比 Prius爽快得多!
試車多日行過山路同高速公路後, IONIQ喺普通模式下,其實相當滋油,感覺比 Prius更甚,有啲似 Toyota Sienta Hybrid嘅力度。不過 IONIQ設有 sport模式,將波棍從「 D」推至「 S」進入 sport摸式,表板即時由速度表轉為轉數表,引擎轉數亦即時上升至 3,000至 4,000rpm,架車即時醒晒。想上斜爬頭?推入 sport模式一定萬試萬靈,如果你揸 Prius?最快方法都係換車。




筆者多日嘅駕駛 style唔使多解釋,自己睇啦。


最後電腦計算出平均耗油為 4.8L/100km,即大約$0.7/km,同 Prius差唔多,但 IONIQ加速反應就肯定快過 Prius。


波棍可作+/-轉波,不過波箱保護性都幾強,你唔會踩得高過 6,000rpm。


經過氣動力設計嘅低風阻 15吋合金輪圈,加入碳纖花紋蓋,配 Michelin Energy Saver厚車胎。


彩 mon.表板顯示清晰,更可調至混能狀態版面。值得留意右方有電池電量顯示,在多日使用中,未試過充滿電,最盡只試過 80%。


進入 sport模式,表板中圈刻度即時由速度轉為引擎轉數。

撰文:黃德禹
攝影:林文樂

    文章標籤

    Hyundai IONIQ Hybrid

    全站熱搜

    tvb4life 發表在 痞客邦 留言(0) 人氣()