短篇小試

今年限定  BMW 520d Saloon Sport

贊助商連結

全新第六代 BMW 5系推出只有兩個多月,真正出咗牌、交咗車嘅數目唔多,可以話未親眼見到新車嘅認受性有幾高。不過筆者收到風, 540iA xDrive、 530iA及 520d三大型號當中,以柴油版 520d嘅反應最好。其實一啲都唔出奇,多得政府要喺今年 10月 1日開始收緊柴油私家車廢氣排放標準至美國加州 LEV III,預料全港柴油私家車都會暫別市場。咁即係代表 520d由即日起賣到 9月底,本刊出版之日甚至已不能訂車,代理只有現貨提供,見貨買貨,你仲等咩?

Sport Line更吸引

今次測試嘅 520d,可以話暫時係新款 5系嘅入門版,不過其實都有分普通版本同今次嘅 Sport Line版本。咁 Sport Line版同普通版有咩大分別? Sport Line版賣$599,000,比普通版貴$30,000,先唔好嗌貴住,呢三皮嘢係物有所值嘅。外裝用上比較運動化車身包圍、多處以黑色點綴,甚至輪圈都由 17吋款式升級至 18吋款。車廂方面,分別裝咗專用金屬門檻、真皮 Sport前座及真皮 Sport軚盤,單係內外睇得到、摸得到嘅升級都唔只三皮嘢啦!仲未計套 M Sport避震呢!所以,好多車主都寧願畀多少少錢,更精明。




Sport Line版本已將輪圈由 17吋升級至 18吋,並且於前輪沙板後加上「 Sport Line」金屬章。


金屬門檻都係專用款式,而且滲出橙紅色光芒。 標準設備眾多

520d雖然係 5系入門車,但其實去到 5系呢個級數,基本設備已經可以好豪,以往只會係加錢先有嘅系統,如越線警告、盲點車輛警告、自訂行車距離巡航系統等,已被「標準化」,大大加強行車安全性。此外,測試車亦已備有車廂氣氛燈,低調地由門板、首飾櫃及中控台滲出光芒,令乘坐感提升。車廂用料都高級,測試車用啞色原木裝飾,配米白色及棕色真皮,帶來溫暖感覺,十足北歐傢具咁簡約。 Sport軚盤就係用棕色真皮包裹,由於直徑較粗關係,握持感覺相當好,而軚環後嘅+/-模式撥片都有防滑膠,細心!不過測試車嘅 Sport前座用白色真皮實在係難搞,靚就好靚,但極易整污糟,平時以牛仔褲當制服嘅朋友要小心。
眾所周知新 5系有唔少高級設備都係由 7系移植過嚟, 520d都有承繼咗部分高級嘢,好似 10.25吋巨型 touch mon.及手勢操作音響都係基本嘢,甚至 Display Key都可以選配。




車廂以啞色原木配米白色及棕色真皮,有屋企客廳感覺。


Sport Line版嘅尾喉改用電鍍黑色,配喺灰色車身嘅測試車非常好睇。


後座空間寬敞,就算中間位地台有傳動軸凸槽,但對乘坐性影響唔大。


Sport前座係就係好坐又靚仔,但白色皮幾考用家打理功夫。


Display Key屬於 option設備,可以顯示多項車輛知資訊。


Sport軚盤直徑剛剛好,有非常出色嘅握持感。 最後慳油機會

我哋先唔討論柴油私家車嘅廢排問題,點解柴油私家車嘅定位雖然唔算好高級,但可以一直不乏捧場客?原因好簡單,睇睇 520d嘅廠方耗油數值就知。 2.0公升 turbo引擎輸出 190匹馬力及高達 40.8kgm扭力,耗油只係 4.5L/100km,加上香港嘅柴油係冇稅,令到車體大如 520d,平均油費都只係$0.5/L,而且仲係以冇折扣油價計算,可見 520d嘅平均油費或比 hybird車更便宜!單係呢個理由就已經夠晒啦!
筆者試車發覺, 520d嘅早段出力表現其實比 530iA更有勁度,只係當車速遞增至超過 100km/h,先察覺加速減弱,但所謂減弱都只係比較 530iA而言,並非冇力。此外,喺車外都聽到 520d擁有獨特嘅柴油引擎運作聲,但車內隔音水準極高,寧靜度同 530iA及 540iA xDrive冇分別。總括而言, 520d集低油費、豪華、舒適及高科技於一身,雖然車價$599,000起(普通版$569,000起),車價比同級貴少少,但考慮到車款非常新,如於 10月絕跡新車市場實在好可惜,有心入手真係要快。




軚盤背後嘅+/-撥片已作防滑處理,手感比以前更好。


三種行車模式 ECO PRO、 COMFORT及 SPORT當中, ECO PRO及 SPORT可再獨立設定轉向、引擎及波箱反應。


柴油引擎本身已相當慳油, 520d仲要用埋 8速波箱,令耗油低至 4.1-4.5L/100km。


引擎可以輸出 40.8kgm扭力,起步加速反應爽朗都不得了。 

BMW 520d Saloon Sport Spec.
引擎: 1,995c.c.直四 diesel turbo
馬力: 190hp/4,000rpm
扭力: 40.8kgm/1,750-2,500rpm
傳動: 8前速自動、附+/-模式
0-100km/h: 7.5秒
耗油: 4.1-4.5L/100km
車身: 4,936× 1,868× 1,479(mm)
軸距: 2,975mm
車價:$599,000起
查詢: BMW HK( 3129 9000)

撰文:袁國基
攝影:葉偉豪

    文章標籤

    BMW 520d Saloon Sport

    全站熱搜

    tvb4life 發表在 痞客邦 留言(0) 人氣()