Dream Car

東瀛超級國寶  Honda NSX

贊助商連結

「超級跑車」一詞,唔係咩車都受得起,唔係話你有幾百匹馬力、賣幾百萬、限量幾多部,就可以自稱「超級跑車」。日本車多年嚟都未有量產車可以被車迷公認為 supercar,你可能話:「 Nissan GT-R唔係勁到天下無敵咩?」都話勁係冇用,你睇一街都係 GT-R,就嚟多過 Corolla嘞!你仲會唔會望?現代日本車之中,稱得上 supercar嘅日本車只有兩部,分別係 Lexus LFA,同埋眼前呢部 Honda第二代 NSX。
581匹馬力、 2.9秒完成 0-100km/h、車價估計超過港幣$4,000,000、訂車要等一年以上,夠「超級」未?




軚盤尺寸剛好,而且由啞色碳纖與真皮包裹,靚仔!

車廠之所以夠膽為新一代 NSX日本定價去到$23,700,000日元起,接近買到 2.5部 GT-R,最大原因係上代 NSX停產十二年兼已上神枱,車迷自然等到頸都長,再加埋新一代用上前所未有新科技,單係開發成本都夠嚇人,絕對有條件提升身價同意大利超跑睇齊。

超級造型

唔少對 supercar有情意結嘅車迷,到死嗰日都認為「中置引擎、後輪驅動」先係正宗,睇唔起 GT-R嘅「前置引擎、四輪驅動」。原因係中置引擎嘅車外形比較特別,車頭及車尾長度接近,而更重要係雙座位,駕駛者坐正全車中央。 NSX之所以被車迷封聖,好大因素係堅持「中置引擎」原則,就算新一代外表已作出翻天覆地轉變,但仍有 supercar應有嘅車身比例。
當然, NSX唔會得個樣,全車都有複雜嘅氣流學設計,為咗令車頭風阻減低,採用細長嘅明燈設計,頭泵把兩側有巨型入風口供水箱及前軸摩打冷卻。車身方面,開門手枕採用類似 Aston Martin嘅拉桿式開啟方法,令整個車門表面相當平滑。緊接門邊就係所有中置引擎跑車都有嘅主要冷卻引擎入風口,而最特別係入風口同碳纖車頂構成一個中空橋位,作用係將車身氣流引至車尾加強高速下壓力,因此 NSX根本唔需要什麼大尾翼來鎮壓車尾,簡單一個微微上揚嘅車尾冚即可。密封嘅車尾底部當然都有整流器,可以有效高速帶走車底氣流, supercar必備!




頭泵把兩側嘅巨型入風口,主要作用係為前軸摩打提供冷卻效果。


遠望以為排氣喉係倒立梯形,但其實只係外框,內裡收埋四條喉至真!


車頂由光面碳纖製成,大大減低車重及降低全車重心。


隱藏式門手抽及中空擾流設計,都係新 NSX車身一大特徵。


座位尺寸比較大,仲要全電動調校坐姿,有相當高舒適性。 高級車廂

NSX擁有 supercar外表,但車廂其實相對低調,係低調中見高級感覺,唔會好似其他 Honda Type-R車系咁簡約及賽車化,畢竟車主付出超過$4,000,000車價,點可以過份地簡單?跨過碳纖門檻,坐上真皮與猄皮混合而成嘅桶形座位,會發覺 NSX嘅乘座感覺竟然似跑房車多過 supercar,或者因為座位比較大張及全電動操作,總之就豪味多過跑味。唔好以為 NSX貴為日本新世代 supercar,車廂就會用上複雜嘅設計,剛剛相反至真。中控台上方嘅 touch mon.已經操作大部分系統,包括音響、導航、電話及系統設置,而關乎到行車嘅操作,就全部歸納晒喺波檔操作平台上,最上方有 Dynamic Mode設定扭掣,可以非常方便地切換 QUITE、 SPORT、 SPORT+及 TRACK四種駕駛模式,絕對好過按掣設定,完全唔使望住個掣,一扭就會見到表板顯示都轉埋。
NSX因為車廂細,所以唔會有太多花巧嘢,但坐於駕駛席上所睇到嘅,反而因應實際需要而變得唔簡單。除表板可變更顯示外,軚環及表板台都由真皮混合啞色碳纖製成,軚環上加咗好多唔同用途控制按鈕,連音響同定速巡航系統都有,對比上代 NSX真係兩個世紀嘅產物。




四種唔同嘅駕駛模式都有唔同特性,彩 mon.表板可顯示出細緻分別及改變圖案。











中控台嘅 touch mon.主要負責控制音響、電話及系統設定。 極級性能

老實講,市場上咁多 supercar之中, NSX嘅外表及車廂都未算誇張,但講到性能及機械結構, NSX唔單只先進,更甚係前衞!大膽!驚世駭俗!仍堅持「中置引擎、後輪驅動」嘅粉絲,新 NSX或者挑戰你底線,因為新 NSX已變成「中置引擎、四輪驅動」,以為好似林寶咁?錯嘞, NSX係用電動四驅系統,車上共有三組摩打,一組較大型嘅連接 3.5公升 V6 twin turbo引擎及 9速波箱,負責為後輪提供額外動力,另外兩組較小型摩打置於駕駛艙前,分別為左、右前輪提供純電動力。因此,新 NSX雖然用上四驅系統,但冇舊式嘅傳動軸,駕駛艙底部就只有電池組,令車重平均、低重心地分佈。
綜合引擎及摩打輸出, NSX總出力達到 581匹馬力及 65.9kgm扭力,用於只有 1,780kg車重上,廠方公佈佢 0-100km/h加速只需 2.9秒!由於用新式 SH-AWD四驅,個別車輪嘅扭力分佈更加細緻,可以用切換駕駛模式嘅方法去調節,因此唔少外國車評都大讚新 NSX操控一流,完全可以拍得住意大利 supercar。講咁耐,眼前呢部 NSX係由平衡進口商引入,唔使好似行貨咁訂車等餐懵,由於極為罕有,未有提供試車,有興買嘅朋友,買咗通知筆者一聲,分享下。




單係全新設計嘅 3.5公升 twin turbo引擎都有 507匹馬力,加上摩打輔助更可令 NSX整體輸出達 581匹!


唔好以為 NSX車頭內會有儲物空間,其實已塞滿水箱及其他冷卻系統。


NSX冇波棍設計,所以操作 9速波箱+/-模式就只有靠軚盤背後嘅撥片。


中控台下方就係駕駛模式設定扭掣及按掣式波箱。


全車共有三組摩打,一組設於引擎後方,另外兩組於車頭同前軸連接。


現貨 NSX喺市場上極為罕有,而且仲要係別具標記性嘅紅色車身,相信好快被搶購。

Honda NSX Spec.
引擎形式: 3,492c.c. V6 twin turbo
引擎馬力: 507ps/6,500-7,500rpm
雙前軸摩打馬力:各 37ps/4,000rpm
後軸摩打馬力: 48ps/3,000rpm
引擎扭力: 56.1kgm/2,000-6,000rpm
雙前軸摩打扭力:各 7.4kgm/0-2,000rpm
後軸摩打扭力: 15.1kgm/500-2,000rpm
系統總馬力: 581ps
系統總扭力: 65.9kgm
傳動: 9前速自動、附+/-模式
0-100km/h: 2.9秒
極速: 308km/h
車身: 4,490× 1,940× 1,215( mm)
軸距: 2,630mm
車重: 1,780kg
耗油: 12.4km/L
車價:未定
查詢:金國汽車( 2111 3332)

撰文:袁國基
攝影:葉偉豪

 

文章標籤

全站熱搜

tvb4life 發表在 痞客邦 留言(0) 人氣()