媽打指早前刨薑煲薑醋導致手指受傷,但見到乖孫,什麼痛楚都一掃而空。

八卦陣

媽打升呢做嫲嫲 百歲大 Sir送金鈪

贊助商連結

媽打李麗娟最近特別心花怒放,事關佢人生第一粒孫仔 Andersen BB,上月尾喺養和醫院出世。媽打話,重七磅幾嘅 Andersen,同佢爸爸劉堃一樣係大頭仔。因為頭仔大,佢媽咪生咗十幾個鐘都未能順產,最終要開刀出世,母子平安。

媽打而家日日忙於湊孫,見到粒孫,佢更加話「兩下就跪低」投晒降,尤其孫仔喊嗰陣,佢就忍唔住抱起佢。佢又話見到新抱餵哺母乳,覺得母愛好偉大。「新抱真係好乖,傷口未復元就餵母乳。我哋嗰時都無餵……原來餵母乳咁辛苦,兩個鐘就餵一次,根本冇得瞓,但係親子關係好好。」
媽打話,另一樣令佢感動嘅事,係今年一百歲、有「政壇教父」之稱嘅大 Sir鍾士元,一早買咗隻金鈪送俾佢粒孫。媽打第一時間將隻鈪仔帶去醫院同個孫講:「阿 B你真係好福氣,一出世就有個咁長壽嘅公公送金鈪仔俾你。」至於媽打自己嗰隻就放埋一邊,留番滿月先送咁話。
媽打而家忙湊孫,但前排佢就忙刨薑,仲一個人刨足幾十斤煲薑醋。佢話佢唔識用力,搞到左手手指發晒炎,變咗彈弓指( trigger finger),而家仲未得閒睇醫生。佢同《壹》仔講,痛係有啲痛,但係而家見到粒孫,乜痛都唔記得喇喎。




被嫲嫲笑指,頭髮濃密的他,跟父親當年出世時一樣,都是大頭仔。


媽打李麗娟抱孫,孫兒更獲百歲「公公」鍾士元贈送金鈪,十分有福氣。


前民政事務局常務秘書長李麗娟的兒子劉堃(右)在一三年結婚,近日終與妻子造人成功,更一索得男。 林鄭選特首勁「豪放」

特首選戰告一段落,選舉事務處公布埋所有候選人嘅選舉開支,林鄭月娥競選時不停強調自己有一套「理財新哲學」,佢就喺自己場選戰示範如何活用,就係實行做個盡情揮霍嘅「大花筒」,唔少開支金額高得令人咋舌,例如佢件震驚七百萬香港人嘅超貴「同行」 Tee,除開平均每件五百五十蚊,《壹》仔問過「偉大的淘寶」,報價一開二十,足夠一件印一批;就算本地廠商,其實整繡字 hoodie都不過百幾蚊。
其實林鄭場選戰唔只豪使,從佢嘅開支申報中,仲見到佢「豪放」一面,因為有幾筆令人摸不着頭腦嘅巨額開支,包括一筆七萬七千多元嘅冷氣費,同另一筆一萬七千多元嘅的士費,背後其實反映佢製造咗大量碳排放。
開冷氣係增加碳排放嘅惡習之一,根據港燈資料,每度電平均產生零點七八千克二氧化碳排放量,由此推算,林鄭競選期間因為開冷氣,保守估計排放出五萬公斤二氧化碳;至於的士,其實係渡輪以外,最高碳排放嘅交通運輸工具,一萬七千多元的士錢,計番足夠來回灣仔同天水圍超過八十次,總共排放近四百公斤二氧化碳……所以話,呢位候任特首,果然夠「豪放」。




林鄭身上呢件「同行」 Tee,除開平均每件盛惠五百五十五蚊,反映佢競選工程豪使嘅「理財新哲學」。


林鄭競選期間勁用冷氣,又勁坐的士,製造了勁多碳排放,有份污染香港空氣。 宣傳效果 有錢都買唔到

究竟邊個肯入熱廚房?上星期就爆出驚人消息,話長居日本嘅七八十年代歌手陳美齡,係教育局局長嘅潛在人選。呢個傳聞究竟有幾真,當事人應該最心中有數,但陳美齡一句「不能置評」,就令傳聞更加甚囂塵上。
陳美齡啱啱搞新書發布會,就傳出呢單消息,令到呢位過咗氣N年嘅歌手,人氣突然急升,新書就算冇多咗人買,都一定多咗人睇,連帶佢上年出嗰本《 50個教育法 我把三個兒子送入史丹福》都多咗人提。難怪有人話,呢個鋪排真係有錢都買唔到,宣傳效果簡直一絕。
熟悉林鄭人士私下指傳言純屬「笑話」一則,而如果熟讀《基本法》,更早應發現陳美齡做局長幾乎係不可能。雖然陳美齡一再強調自己冇入籍日本,但《基本法》規定局長唔可以有「外國居留權」,而陳美齡因為有位日籍丈夫,相信早喺多年前已經拎咗日本「永住權」,即係永久居留權。如果佢真係要做局長,咁首先要放棄好多嘢先囉。




陳美齡忽然成為下任教育局局長潛在候選人,連帶佢上年本「教仔經」都多咗人提,難怪有人話,呢個宣傳效果有錢都買唔到。


陳美齡老公金子力同現任首相安倍晉三(左一)係同學,當年更搵安倍做伴郎,陳美齡仲自爆過對方係自己粉絲。 執三灘入熱廚房 情何以堪?


外界似乎唔多人願意加入熱廚房,但官場上總會有人願意留低。教育局局長人選,早前曾有傳副局長楊潤雄有望「坐正」,但後來又殺出邱騰華同張建宗。真命天子係邊個?林鄭似乎都未諗掂。(《蘋果日報》圖片)

林鄭有意組娘子軍班底,不過近排佢就頻頻食檸檬,本來打晒如意算盤,搵資深大律師鄭若驊做律政司司長、金融發展局主席查史美倫做女財爺、現任環境局副局長陸恭蕙會坐正,結果,三名女將一律 Say No。
近日,邊個坐 CS位又傳聞滿天飛。張建宗延任?搵公務員事務局局長張雲正出任?定係由現任特首辦主任邱騰華空降?律政司司長方面,資深大狀莫樹聯本來係頭號大熱,但佢無意做官,結果前律師會會長王桂壎同現任私隱專員黃繼兒就忽然上榜。至於教育局局長人選,副局長楊潤雄本來有望「坐正」,後來又殺出邱騰華同張建宗。
講來講去,其實無一個司局長人選係落實,林鄭咁樣組班,隨時有司局長係執二灘甚至三灘上任,佢哋到時被傳媒問起,情何以堪呢?

撰文:巫不言
mailto:news@nextdigital.com.hk

 

    全站熱搜

    tvb4life 發表在 痞客邦 留言(0) 人氣()