劉明慧( Vicky), 34歲,已貴為兩子之母,年輕抑或初老、就如喝可樂還是棗茶,隨心罷了。

年輕有夢 

四季養生茶館 地址:青衣長達路 14-20號偉力工業大廈 13樓 1304

化蝶

贊助商連結

聽說,萬物都有序,譬如蝴蝶。從幼蟲覓食,到脫皮,再作蛹,羽化後,蛹破而蝶出,而人亦然。既然生老病死無法逆序,高飛於繽紛花園抑或簡樸野叢之上,任君挑選。 Vicky一年前放棄美容導師工作,經營網上茶館,求變為興趣、為家庭,但捨棄穩定,未必人人認同。
孰蟲孰蝶,有人執拗,她卻認為經歷過變態,自能化蝶,「好簡單,我只係問自己,你有冇勇氣去改變?」




堅持用新奇士檸檬,切片後去核,塗上蜜糖,放入乾果機烘乾。

有。然後「四季養生茶館」誕生。顧名,賣養生茶。「有自己製乾嘅花果茶包、樽裝燉品,好似南棗薑茶、陳皮燉檸檬等等。」義不必思,從她右邊帶點僵硬的臉,可見痕迹,「經歷病痛,知道家庭同健康幾重要。」原來 Vicky懷第一胎時,肝臟出問題,「爭啲要換肝,醫生話 BB點都出到世,問題係我睇唔睇到。」結果,小寶寶出生,她也還健在。
然而噩夢,遠比想像中長。後遺症令她神經系統出現問題,右邊身體、由頭到腳癱瘓,「我連瞓覺都瞇唔到眼,要用毛巾冚住,嗰吓終於崩潰。」抱着她的,是不離不棄的另一半,「原來老公咁重要,為咗佢同 BB,我要健康。」至於啟發她做健康茶的,是媽媽,「休養加坐月嗰陣,媽咪煲南棗黑糖薑茶畀我飲,連續飲咗一百日,嘩!成個身體好似逆轉咗咁!而家好番七成啦。」黑到盡頭,是光。

雖說生死有序,但意識到病痛可免則免,嘗過良方,她開始研究各種養生茶做法,並傾囊於社交網絡,志在分享,「點知一放上去,有成幾百人問我喺邊度買。」 Vicky一笑置之,畢竟美容品牌事業經營了十來年;另一邊廂,寧願投放時間於家庭;貼地點,還要養家。推她一把的,竟然是家傭姐姐,「佢話可以幫到人,捉住我話會幫我,咁就試吓啦。」
一個月下來,接了近一千樽南棗薑茶訂單。做法易,工序煩,「自己拉車買材料,南棗、薑、黑糖加埋幾十斤重。」南棗逐粒剪、所有材料逐層放上去,燉煮後再入樽,「做到半夜,喺廚房喊,覺得做乜要咁折磨自己?姐姐入嚟話幫我整埋佢。佢根本唔需要幫我,咁我仲點可以放棄?」二人夾手夾腳,棗茶填滿了一千個玻璃瓶,還溢滿腔中的滿足感。
初試牛刀,如潮的好評令 Vicky體會到前所未有的成就感,「係時候改變淨係返工、放工嘅生活。」為兼顧事業、家庭及興趣,她早上起身煮早餐,一家共享早晨後再上班,放工陪老公吃晚飯後哄小朋友入睡,「炒豆、切檸檬、燉茶、包裝,全部嘢都十點後先開始做。」幼蟲無法拒絕過程痛苦的羽化,她卻選擇化蝶。




一見到熟客 Vicky,藥材店老闆娘就把紅棗、桂圓等塞進車仔內。


最令 Vicky快樂就是一對仔女到工場陪她工作,還幫忙貼貼紙。

草木會枯,何況人。不消數月,她瘦了一大圈,「我先生有晚點醒我,佢話:『其實人生得幾十年,你開心健康對我最重要,所以做你想做嘅事,失敗唔緊要,大不了一家人平平淡淡過日子。』」隔天,辭職信放到上司枱頭,「佢話幫我停薪留職,好心動,但點可以留底線畀自己。」伴侶的眷顧令蝶夢不止一霎,破蛹成功與否,只有一搏。
幸而,生意逐步上揚。試過生意太多,她寧願不接,「好多人做生意做到冇晒自己,屋企第一,毋忘初衷。」擁有這份覺悟,她感激不幸,「變數太多,唔使追求大家認為好嘅嘢,行自己嘅路。」
既化為蝶,管翅膀是彩是素,能拍翼穿梭於自己喜愛的叢林間就好。




滋養氣血茶,紅棗、桂圓加乾花,味道微甜帶花香,有補血氣之功效。$8/包


南棗黑糖薑茶是人氣產品,對女士有滋補作用。$75/250g

四季養生茶館
地址:青衣長達路 14-20號偉力工業大廈 13樓 1304
Facebook:四季養生茶館

撰文:黃寶琳
攝影:周義安

 

    tvb4life 發表在 痞客邦 留言(1) 人氣()