最初 Susan想製作一些奪目的飾物來自家穿戴,從而誕生香水飾物,其後更成立品牌 MS.Chic,發展成事業,「想個品牌更多元化,除咗香水樽外,我都嘗試緊有冇其他化妝品可以整到飾物,例如唇膏,𠵱家喺構思階段。」

創業通

香水樽變飾物 靠寄賣起家

贊助商連結

不少女士都有使用香水的習慣,適宜的香味的確容易令人留下好印象,但有沒有想過香水除了氣味外,也可製成飾物,成為時尚配搭。 80後的 Susan覺得迷你香水樽的外形精美,於是製作成不同的飾物,她更成立品牌 MS.Chic,專售自家製作的香水頸鏈、手鏈等飾物,不但受港人喜愛,並透過寄賣點成功進入內地市場,成為不少女士的心頭好。

MS. Chic是一個香水飾物品牌,創辦人 Susan表示香水除了香味外,香水瓶的設計也十分精美,設計成飾物受不少女士的歡迎,「用嚟造飾物嘅香水都係 5ml或 1.5ml版本,都係睇個樽靚唔靚,客人預咗唔會用,有啲樽嘅設計會易漏啲,我就會用膠水封住佢。客人嚟訂飾物,多數會揀 Chanel、 Miss Dior、 Salvatore Ferragamo、 Valentino等品牌嘅香水樽。」
現時 MS.Chic在香港及內地均設有寄賣點及用網上平台出售產品, Susan說客人以有經濟能力的女性為主,「喺長沙、重慶、上海及北京都有店鋪寄賣。我哋提供頸鏈、耳環、鎖匙扣、手鏈及戒指等款式,售價由$800至$1,300;我仲有客製服務,睇番材料及設計複雜程度,收費$1,000至$3,000都有,幫襯嘅客人多數係打咗幾年工嘅女仔或者係年輕媽媽。」 Susan表示現時平均每月售賣五十多件產品。
Susan在英國修讀心理學, 11年畢業回港後,她發現本科的工作機會不多,在尋找工作期間,她卻造起手作飾物來,「之前讀書放暑假時,我去過當地一間首飾店做文書,期間老闆教我串珠穿珠等整手作飾物嘅基本技巧。之後返嚟香港喺屋企游手好閒,想搵啲嘢消磨時間,我就想整 eye catching嘅飾物自用。見到媽咪收藏唔少 5ml嘅香水,外觀好靚,我見反正都係擺喺度,不如善加利用,就萌生用香水樽做飾物嘅想法。」




珍珠白水晶畫框香水頸鏈$1,150


黑珍珠香水頸鏈$850


布藝花朵香水鎖匙扣$580


珍珠香水手鏈$940


蝴蝶圖案薄紗香水頸鏈$820 到上海鋪頭自薦

11年, Susan成立品牌 MS.Chic,她表示初次創業行事只靠一個勇字,「初時要諗點樣將個香水樽吊喺條鏈度,試過係樽身鑽個孔加扣,但香水會漏出嚟,經反覆試驗後,知道點用線綁住樽頸位。我主要用珍珠、天然石及水晶等去配襯唔同嘅香水樽,整咗幾條頸鏈出嚟,其實自己用唔晒,就諗不如拎去賣。當時咁啱要去上海探親戚,我帶埋啲鏈過去,衝咗入間服飾店,直接問負責人我有呢啲作品,擺喺度寄賣得唔得,估唔到佢好快就答應咗, 1、 2日就有人買我嘅作品,真係好開心。」
看見作品得到支持, Susan決定放膽發展 MS.Chic,但當初也吃了不少苦頭,「 Sales、 marketing、入貨、設計及製作都係自己一腳踢,最初乜嘢都唔識,好似入香水樽,初時係去化妝品店嘅香水池度揀,搵店寄賣都係逐間拍門。雖然開始時有 blogger及時裝版記者問我拎貨影相,會有客人幫襯,但係唔多,一個月扣埋成本賺得 2、 3千。當時做嘢做到下午茶時段就落樓下茶記食隻滷水雞脾頂一日,加錢飲凍飲都唔捨得,都捱咗一段時間。」




Susan不時會到香港的寄賣點 Amelie Street,與店員了解顧客對自己作品的評價及客人喜好,在設計時作出調整。


13年, Susan租下一個八十多呎的小單位作為工作室,「配件及香水愈嚟愈多,屋企唔夠地方擺,有個工作室可以專心創作之餘,又方便工作。」 要揀啱客路

MS.Chic沒有實體店,銷售渠道主要依靠寄賣店及網上商店, Susan認為當中大有學問,她亦花了不少時間去學習,「喺香港及內地合作過嘅寄賣店及網店大約有二十多間,初時會覺得同愈多店合作愈好,多個售賣點,但之後發覺要留意佢哋嘅定位。試過間店賣嘅服飾多數係$200至$400,客人未必會花$800買一條頸鏈,真係得個擺字,𠵱家會搵客路相同嘅店去合作。」
在內地寄賣, Susan表示要留心合作細節,「最初喺上海間店寄賣,當地朋友同我講番間店私自幫件貨嘅售價標高咗約 20%,有欺騙成分,但當時我個品牌仲新,冇咩議價能力,就扮唔知,品牌發展穩定後就冇同佢合作。𠵱家內地嘅寄賣點多係買手主動搵我,佢哋喺其他平台見到我嘅作品,覺得唔錯就向我提出合作,會喺網上傾好細節,之後再約出嚟簽約,但簽合約前注意條款,例如拆賬幾多、維修服務嘅安排、點會構成違約等。」




Susan會到寄賣店巡視,留意要補充的貨物,「睇吓邊啲款好賣啲,可能嗰款貨就造多幾件。」


上年 Susan與硬膠花癡的設計師合作,以繡球花及玫瑰花製成的樹脂立體花與香水樽設計成頸鏈,因是限量品,現時已經售罄。$ 986


Susan製成的香水飾物,不但得到女士喜愛,也吸引到香水品牌 Guerlain找她合作,讓她開設工作坊,幫香水作推廣。 與香水品牌合作

慢慢 MS.Chic累積了一班支持者,同時亦吸引到香水品牌與 Susan合作,「始終啲飾物唔平,靠時間去儲客及建立品牌形象。到 15年, Guerlain推出新香水時搵我合作搞工作坊,教參加者整頸鏈,同時又畀佢哋認識到支香水,之後都有合作。」
MS.Chic發展踏入第 6年, Susan希望作品有更多的變化,「之前同過硬膠花癡及 Blind by JW嘅設計師合作出過花嘅主題頸鏈,反應都唔錯,會想同更多本地設計師 crossover,擦出新嘅火花;同時我都想同多啲香水品牌合作,長遠嘅目標係儲錢開一間實體店。」



客人  Fion
朋友介紹下留意到 MS.Chic嘅 instagram,見到佢整嘅香水樽飾物好特別,有買佢嘅頸鏈,仲訂製咗一條送畀嫲嫲,好滿意個設計,加上品質好好,會繼續幫襯。



客人  Jennifer
喺 facebook見到 MS.Chic嘅產品,覺得好靚,自己都鍾意靚嘅香水樽,但香味未必夾自己就冇買。𠵱家可以整成飾物用喺身上,完全啱我嘅需要。

開業成本

租金︰$0(home office)
入貨:$2,000
總投資︰$2,000

每月收支

營業額:$54,800
租金︰$4,800(工作室)
人工:$15,000
入貨:$15,000
盈利︰$20,000

facebook@infomschic
http://mschichk.com/ 

撰文:曾志恒
攝影:林文樂、部分圖片由被訪者提供

文章標籤

tvb4life 發表在 痞客邦 留言(0) 人氣()