Dream Car

貴人出門招風雨  Bentley Mulsanne

贊助商連結

貴為英國皇室座駕製造商之一嘅 Bentley,最豪、最頂級車款就係眼前嘅 Mulsanne, 2011年推出至今已有六年,換轉第二啲車款早就準備轉新款,不過 Mulsanne貴為旗艦,當然襟睇過人,只需改動一下外表、升級一下設備,即時有新款一樣效果。新版外表主要加入更多標記性設計,多處展現出 Bentley產品獨特之處,就算係標準版本嘅測試車,行出嚟都有非凡氣勢,非一般百萬豪房可比,畢竟 Mulsanne已走在巔峰之地。

有時唔到你唔信邪,四月上旬持續多日好天,更難得約到最新到港 Bentley Mulsanne試車影相,本應萬事俱備,但試車當日卻遇上橫風橫雨,影出嚟嘅效果當然唔及晴天咁好,不過雨天試 Mulsanne又有另一番體會,平時又未必試得到。




除咗鬼面罩換咗新款外,連泵把兩端嘅入風口都有「 B字」電鍍框。


位於前輪沙板後嘅散熱孔,保持舊有形狀,但就增大咗少許。 顯身價展氣勢

買豪華房車都第一時間諗到德國品牌, M-Benz、 BMW及 Audi,似乎都係呢幾個牌子,就算上百幾二百萬車價,都係買佢哋!不過,天外有天、人外有人,要極盡奢華就唔會揀德國牌子,英國貴族品牌先係不二之選,好似 Bentley Mulsanne咁,入門價係$4,600,000起,行出街嘅台型都巴閉過人。 Mulsanne標準車長 5,575mm,比任何一款常規德國豪華房車都要長,就算係 base on S-Class、再加長咗 207mm嘅 M-Maybach都唔夠佢長!梗係啦!根本唔同級數! Mulsanne單單軸距都已經有 3,266mm,未入車廂都估到會有無敵寬敞空間。
重新修整外表嘅 Mulsanne,最大改動首推車頭,形狀上不變,但鬼面罩及泵把入風柵欄改咗花紋,由以往嘅格仔形改成更粗身電鍍直間,而且內藏三角形網格,望落比以前更閃閃生輝。為加強品牌特色, Mulsanne唔單只車頭有「飛翼 B字」為記,更甚係頭泵把兩側、前輪沙板旁及尾燈內裝飾,都隱藏「 B字」,低調得來顯出不凡身價。此外, Mulsanne都加入咗同廠 SUV Bentayga嘅隱藏式頭燈清洗器,一面行車都可伸出水唧,有型!




車尾改動得最少,尾燈內組合一樣隱藏「 B字」在內,夠晒標記性。


指揮燈首次加入源自 Bentayga嘅隱藏式頭燈清洗器。 車廂無限可能

Mulsanne貴為 Bentley嘅旗艦作,除機械規格可供買家嘅選擇比較少,車廂可以話有無限可能性。除咗今次測試嘅標準版 Mulsanne外,同時更有 Mulsanne EWB及 Mulsanne Speed,主要係車廂有唔同演繹。

全面增長  Mulsanne EWB
長陣版 Mulsanne比普通版軸距增加 250mm,令車長去到 5,825mm,完全係 Rolls-Royce Phantom咁長!而增長後最大得益係後座腿部空間,採用兩張獨立座位及有小腿墊,而且手枕內有更多設定掣及摺合式餐枱,真係可以用嚟做流動會議室,爭分奪秒咁傾大生意就一定要用佢!

更跑車化  Mulsanne Speed
Speed版本顧名思義就係令 Mulsanne更跑車化,先係引擎最大馬力比普通版多 25匹, 0-100km/h加速縮短到 4.8秒。車廂方面就特設大量碳纖裝飾及鮮色縫線,而木料裝飾就改成黑色鋼琴木,高貴得嚟又有跑車嘅辣味。




Mulsanne EWB


Mulsanne Speed 車廂貴氣不凡

車廂一直都係頂級豪華房車顯身價地方, Bentley所有車款都以全人手製作車廂皮革, Mulsanne當然唔會例外。每部 Mulsanne車廂都需要用十七隻牛嘅牛皮製作,而且有多達廿四種顏色選擇,車主可以自由選配。此外, Mulsanne車內共有四十塊木製飾件,全部選用最高質木材再經工匹人手精製,絕非一般車廂嘅木材飾件。對比外表, Mulsanne嘅車廂改動反而嚟得輕微,睇得到嘅改變唔多,反而睇唔到嘅如影音系統,就全面升級至 60GB硬碟儲存,用家可以享用更多、更快嘅車上娛樂。
測試車雖然只係標準車長及配標準設備,但後座都已經有非常寬敞空間,如果係長陣版更會提供額外 250mm軸距,令後座腳位更長,真係 NBA球員都唔覺迫!此外,後座設備都係重點,側窗及後窗都有電動太陽簾,手枕內則設有冷氣及全方位電動座位調校,而且加設背部按摩功能,可以為工作繁重嘅老闆提供片刻鬆弛。後座左邊「皇帝位」額外多出一個前座移動掣,作用就係將前座推前,獲取更多腳部空間,就算唔係長陣版,「皇帝位」嘅乘客都可以翹腳坐。其實,去到 Mulsanne呢個級數嘅車,後座可以有極多 option選擇,如增設顯示屏、雪櫃、香檳杯架及小餐枱等等。




標準版 Mulsanne嘅後座已有相當好空間,而且可載三人,比多陣版較為實用。


前座尺碼比較大,司機長時間駕駛都冇咁易疲勞,而且承托力都充裕,老闆間中揸快少少都撐得住身體。


後座手枕內有冷氣及座位調校掣,舒適性非一般豪華房車可比。


四款駕駛模式以扭掣調校,而且設於波棍旁邊,操作十分就手。


Custom自訂模式可自由設定引擎、避震及轉向系統。 老闆可以自用

或者好多人會話:「老闆只會坐車,部車幾好揸都冇用,佢都唔會揸!」老闆日理萬機,雖然好多時都係坐車,但偶爾享受下駕駛樂趣都係一種舒緩。絕大多數車價上到$4,000,000嘅車都冇乜駕駛樂趣, Mulsanne其實都冇,不過總算係同級中最好揸一部!首先係 Mulsanne並未採用沉重嘅 V12引擎,而 6,752c.c. V8 twin turbo引擎都可以輕鬆輸出 512匹馬力,最吸引人係峰值扭力達到 104.0kgm!低至 1,750rpm就全數輸出,令到重達 2,685kg車重都可以 5.3秒完成 0-100km/h,絕對入跑車之例!
唔係大力就有用,有別於同級車, Mulsanne設有電子升降避震、 8速+/-波箱及四種駕駛模式,完全為駕駛者而設,其中 Custom模式可以讓用者自訂引擎、避震及轉向設定,彈指間已可令舒適房車變成跑房車!你話老闆又點會肯畀個司機咁玩法?係都畀老闆自己玩先!筆者充當司機及扮老闆喺雨中試車,發覺揸落唔似咁大架,軚感比同級車清晰得多,唔會有揸船咁嘅虛浮感,而且引擎出力竟然唔算狂暴,取向屬於沉實有勁,冇可能 feel到佢唔夠力。大雨下坐入後座,車頂及門窗只傳來輕微雨點敲打聲,可以想像老闆可以暴風雨下熟睡。老闆車就係要咁, Mulsanne完全稱職。







駕駛艙同 facelift前轉變唔大,同樣以極高品質示人,根本係精品級數。


6,752c.c. V8 twin turbo引擎唔單只有 512匹馬力,達到 104.0kgm嘅扭力先最驚人!令 Mulsanne可以 5.3秒完成 0-100km/h!


表板中央為彩色顯示屏,可顯示導航等多種資訊,但都唔及以一點位作起點嘅指針表咁特別。


8速波箱只可以喺波棍切換 S Mode,+/-模式就只可用軚盤後撥片操作。 Bentley Mulsanne Spec.

引擎: 6,752c.c.V8 twin turbo
馬力: 512ps/4,000rpm
扭力: 104.0kgm/1,750rpm
傳動: 8前速自動、附+/-模式
0-100km/h: 5.3秒
耗油: 13.0L/100km
車身: 5,575× 1,926× 1,521(mm)
軸距: 3,266mm
車重: 2,685kg
車價:$4,600,000起
查詢: Bentley HK(DCH)( 2890 1918)

撰文:袁國基
攝影:葉偉豪

 

    文章標籤

    Bentley Mulsanne

    全站熱搜

    tvb4life 發表在 痞客邦 留言(0) 人氣()