新車激試

定位明確  M-Benz GLA 200

贊助商連結

現今車廠為求節省新車開發成本,都好興用同一個底盤,演變出多個型號。最佳例子有第三代嘅 M-Benz A-Class( W176),除咗本身揭背型號,仲有多咗個車尾嘅 CLA同埋迷你 SUV GLA。 GLA由推出至今,可能因為同普通 A-Class一樣採用五門揭背佈局,加上車身升高唔算誇張,令車迷覺得兩者定位有點重複。最近車廠為 GLA進行小改款,雖然改動唔大,但足以令 GLA SUV味更突出,令定位更加明確。

重溫一吓先, 2014年推出嘅 M-Benz GLA,屬於 A-Class同 CLA之後,第三架由 MFA底盤演變出嚟嘅 M-Benz NGCC新世代小車。驟眼睇初代 GLA外型同「 A仔」好似有八成相似,不過細心留意, GLA四邊輪拱改為黑色塑膠物料,前後泵把亦都加入金屬保護底板,頭燈比「 A仔」更加向上翹起,引擎蓋上更多咗兩條骨線,加上升高咗嘅車身,其實唔難分辨。




加高後車身離地距明顯增加,不過 GLA屬小型 SUV,車身唔算高,所以上落車仍然方便。


鬼面罩上嘅方形縷空裝飾,配合更粗壯泵把金屬保護板, man味十足!


尾泵把金屬保護板加深咗導流板輪廓,而且改為包住雙出尾喉嘅一體化設計。 外表更加剛強

今次 GLA嘅 facelift,外形唔算改頭換面,但相比之前 A-Class同 CLA嘅 facelift都要明顯。最易察覺就係全新鬼面罩,三角星兩側銀色欄柵中,加入縷空嘅黑框方格,配合頭、尾泵把底部更浮凸嘅金屬保護板,加上懸掛升高了 30mm,外觀整體比初代粗獷唔少,就好似有種扎實咗嘅錯覺。除此之外,頭、尾燈組改用新款設計,頭燈由 Bi-Xenon改為 LED款式,尾燈則由類似潛水眼罩平面,變為更圓渾設計。以上嘅外型改動,除咗為 GLA帶來新嘅視覺效果,風阻系數更由 Cd0.29下調至 Cd0.28,並唔係單單為改而改。
可惜車廂改動相對較少,改動同 facelift後嘅 A-Class及 CLA幾乎一樣,主要優化咗表板、改用新款軚盤、中央屏幕升級為 8吋款式同加入 Dynamic Select駕駛模式按鍵,改動唔似外型一眼就可以睇得出,少啲玩「 Photo Hunt」嘅技術都睇唔出!




表板改用全黑底色,顯示溫度、時間嘅銀框變得更長更尖。


中控台變化不大,最明顯分別係改用更大中央屏幕以及死火燈一排按鈕轉用金屬銀色。


尾座頭部空間比 A-Class優勝,令 GLA有更佳乘坐舒適性。


電動前座具三組記憶功能,更有電動腰部承托調校。


摺平後座尾廂容量由 421L增加至 1,235L,不過車身離地高咗,放行李就要用多少少力抬高啲嘞! 車身視野更高

換咗更剛強嘅新包裝, facelift後 GLA最重要改動當然仲有升高 30mm嘅車身,車身提升主要增加離地距,懸掛行程並無增加,軟硬同 facelift前分別唔大,加上廠方未有刻意調校至極度舒適,微震並未完全過濾,所以仍帶少許運動感覺。試車出入飛鵝山路時,可能車速唔快,出入彎路並未覺得車身傾側增加,反而升高嘅車身更有利出入壆位同斜坡,而且視野明顯更高,睇位上亦都有幫助, SUV嘅優良特性終於都走晒出嚟,令 GLA定位更加獨立,喜歡得閒去吓郊遊嘅車迷,唔使再喺 A-Class同 GLA之間心大心細。




車身高咗,但冇影響入彎嘅馬步,功架保持到「 A仔」嘅八成。


引擎同傳動冇任何改動, 1,595c.c.直四 turbo引擎馬力維持 156匹。 入門力量平平

Facelift後 GLA動力維持不變,同樣提供 GLA 200、 GLA 250、 GLA 45 4MATIC三個型號,其中 GLA 250取消咗 4MATIC四驅系統。測試車屬於最入門嘅 GLA 200,配 1,595c.c.直四 turbo引擎,最大馬力維持 156匹,峰值扭力同 facelift前一樣有 25.5kgm,並喺 1,250rpm全數釋放,配 7前速 DCT雙離合器波箱同前驅佈局,呢個 spec.唔算差,不過推動比 A 200重 70kg嘅 GLA 200,起步比 A 200遲鈍些少,實際 0-100km/h時間上亦比 A 200慢 0.3秒, 8.4秒先完成。試車時筆者都需要踩深油門至 2,000rpm先覺得有力到,導致引擎聲浪比較大,所以如果 budget許可,建議畀多$50,000選擇 GLA 250,馬力增至 211匹,而且牌費一樣,力量充足好多!




加入 Dynamic Select按鈕,有別之前嘅 E/M/S駕駛模式選項,多咗一個個人化模式。


個人化模式可以獨立設定軚盤扭軚力度、冷氣強度、停車熄匙系統開關同動力反應。


其餘仲有 Eco、 Comfort同 Sport模式,主要改變轉波轉數同軚盤扭軚力度,不過扭軚力度一如 M-Benz其他車款,都係偏向舒適。 M-Benz GLA 200 Spec.


車身升高後,車頭、車尾進入角度大咗,上落斜都唔使就住,咁先係揸SUV。

引擎: 1,595c.c.直四 turbo
馬力: 156hp/5,300rpm
扭力: 25.5kgm/1,250-4,000rpm
傳動: 7前速自動,附+/-模式
耗油: 7.4L/100km
車身: 4,424× 1,804× 1,494( mm)
車重: 1,440kg
車價:$389,000起
查詢:仁孚行( 2895 7339)

撰文:黃德禹
攝影:林文樂

文章標籤

tvb4life 發表在 痞客邦 留言(0) 人氣()