硬頂結構令車重大增 80kg,對只得 160匹引擎來說的確有所影響,不過廠方總算有 heart,前後懸掛及穩定桿都經重新調校,加速力雖然削弱了,但無損操控樂趣。

壹號幹線

價錢以外,本質不變  Mazda MX-5 RF

贊助商連結

講用途,軟篷( Soft Top)同 RF( Retractable Fastback)其實都冇乜分別,大家都係 MX-5,一樣可以開頂同「陽光玩遊戲」,落雨亦都唔怕淋濕身,不過一部係全手動軟篷,另一部係撳個掣數 13秒就可以瀟灑變身的電動摺頂,值唔值得俾多 5萬?
個人愚見:跑車、兩座位、開篷……
全部都係可列為「任性汽車」的重要元素,既然係任性,就不妨任性到盡,唔諗咁多,一於玩咗至算啦!

聽我講,打死都要買手波

售價:$459,500
引擎: 1998c.c.,直 4;前置,後輪驅動
馬力: 160匹/6000rpm
扭力: 20.4kgm/4600rpm
波箱: 6前速手動
長/闊/高: 3915mm/1735mm/1235mm
重量: 1099-1112kg
加速: 0-100km/h, 7.5秒
耗油量: 14.9km/L(日本國土交通省測計模式)
查詢:宏益汽車
網址: http://www.mazda.com.hk 

讚一讚:依然係駕駛樂趣奇高的小鋼炮,路感溝通充實,手波操作爽勁;高速 13秒摺頂;關頂後線條依然靚爆。

彈一彈:車重大增,揸得出、 feel得到;軚盤僅限高低調校;摺頂車速上限只得 10km/h。



兩公升直四自然吸氣引擎,踩盡就係得嗰 160匹及 20.4kgm扭力,話快,擺明呃你。但請留意引擎呈縱置擺放,令整個驅動系統(波箱、傳動軸、尾牙)都在中央位置,前後比重一樣係完美的 50:50。



好多新一輩人都認為揸手波車好煩,其實返工、溝女、娶老婆都好煩,咁你又做? MX-5的 6速手波無論行程、手感、銜接度都正到冇得彈,每一次轉波都係純機械式的鏗鏘溝通快感,嫌煩?你老婆唔煩咩?



車廂布局同軟篷版 99%相似,唯一分別是多了顆按鈕操作電摺頂,隨車設備唔算誇張,勝在布置恰到好處,紅繡線 Nappa皮革使用量亦算廣泛,對得住 46萬車價。但作為一部好應該高度重視駕駛位置的 driver's car,軚盤只能作上下(不能作前後)調校,實在失策。



MX-5最叫人着迷的地方始終是操控,「增磅」後加速力確實不及軟篷版(其實都唔多刺激),但一樣保留到高度準確的指向準繩度,而且無論快慢車都有忠實的路面回饋溝通。廠方雖沒有裝設駕駛模式選擇控制,但我卻發現於關頂時重心會明顯移向車頂,操控較為中性平衡;而於開頂時重心又會明顯移後,車尾走向會較為活躍,出入彎都較刺激。一部車,兩種玩法,計落有賺!



座椅造型屬「趕絕肥仔型」,塞唔入或者閂頂後頂頭的話,請自行檢討。



整個結構由前、中、後頂及尾窗組成, 13秒完成整個變身過程,廠方話係全球最快,不過或因後頂揭起時會好「食風」令撐架損壞,所以僅限於好慢的 10km/h下行車操作,索性停定好過了。



門壁有疑似碳纖修飾,其實一望便知真偽,好彩摸落有凹凸 texture,唔太 cheap。



RF版新增行車線偏離警示,好嘈好煩,有助安全駕駛。



音響為 Bose度身訂製,細細部車都有 9喇叭,特色是各頭枕內藏一對喇叭,開頂時唔怕被外界噪音干擾雅興,既貼心,又貼身。



轉波時手踭剛好「[!8AD8]」喺中央手枕,操作順手到不得了,因此杯架便要「讓路」擺後,好彩係可拆式,一人駕駛時可裝置於乘客席。



手波版獨有 BILSTEIN吸震筒及 LSD限滑差速器,操控肯定比自動波版更得心應手,價錢仲要平多 2萬,唔係唔識點揀嘛?



左儀錶 4.6吋 TFT屏幕增設「摺頂過程影像直播」功能,亦可切換至行車資訊、指南針顯示。



RF即是 Retractable Fastback,開頂後形態與 targa頂相似,車尾線條同軟篷版截然不同。個人極喜愛這大斜背設計,線條非常流暢,跟車身輪廓好匹配,是市場上少有開關頂都保留美態的開篷跑車,抵俾 like。



頂蓋摺合後藏於座椅背,並不干擾行李箱空間,容量僅比軟篷版少 3公升( 127公升),亦保留小膠籃放雜物,算做實用。



205/45R17車胎係 perfect match,胡亂改大改闊都只會愈搞愈衰,原裝軨亦幾靚幾襯,無謂換。

撰文:廖宏俊
攝錄:方保山
mailto:features@nextdigital.com.hk

    文章標籤

    Mazda MX-5 RF Mazda MX-5 RF

    全站熱搜

    tvb4life 發表在 痞客邦 留言(0) 人氣()