眾志上週六晚舉行黨慶,並笑稱以「唔甩轆」為目標。

八卦陣

眾志黨慶 林淳軒逃過一「劫」

贊助商連結

眾志上週六晚舉行一週年黨慶,成班年輕人都嚴陣以待,因為好驚重演上年創黨發布會甩轆事件,好彩最後無驚無險!唔少民主派政黨或組織搞晚宴,都會揀旺角倫敦大酒樓,不過眾志就揀咗喺土瓜灣嘅 ClubOne婚宴場地開騷,部分成員仲著晒西裝、連身裙喺門口招待嘉賓,搞到好似擺酒咁。




民主黨、公民黨均未有派出星光熠熠的「大佬」出席眾志黨慶,不過眾志似乎不介意,繼續走非一般泛民路線。

有別於一般政黨揼心口拍賣籌款,眾志就以表演為主,包括羅冠聰唱歌、黃之鋒拉小提琴,不過兩個都好似好緊張,走晒音咁囉。至於周庭就變身做結衣 BB跳戀舞,將全場氣氛推到最高。後來之鋒同林淳軒一肥一瘦喺台上 rap歌, rap完之後之鋒聲都沙晒,睇嚟仲辛苦過喺街頭嗌咪。台下嘅嘉賓就笑稱呢個其實係謝師宴加 O Camp遊戲,不知幾青春。
唔講唔知,原來佢哋本來有個壓軸節目,就係由林淳軒表演掌上壓,嘉賓捐廿蚊佢就做一下,不過最後因為時間關係要交場而冇表演,有緣就下年黨慶再加番呢個環節。大家如果見到林淳軒,記得提佢唔好走數!

黨慶冇大明星撐場又如何

眾志嘅黨慶冇乜星光熠熠嘅政商界中人參加,公民黨、民主黨同工黨分別派出黨魁楊岳橋、超區議員鄺俊宇、主席胡穗珊出席晚宴,各人都係買番自己個位;至於成日都要籌款支援抗爭行動嘅社民連,都包咗一張枱,都算唔話得。
不過眾志就回應話佢哋黨慶目標唔係為籌款,扣除成本後大約籌到三萬,算係打個和。出席黨慶嘅大部分都係公民社會嘅人,唔少係以前支持學民反國教嘅阿太,眾志本來預咗開三十圍,結果都要加到三十二圍,仲要每圍都加一、兩個人,走嘅路線的確同傳統泛民有啲唔同。




周庭表演跳戀舞,台下男女老幼都 high到爆,大讚周庭 BB好萌。


之鋒(左) rap歌 rap到聲都沙埋,非常落力。 薯片叔叔收無字天書

做特首夢碎,薯片叔叔靜咗一排,呢個星期又再活躍。上星期五( 21/4)係佢 66歲生日,佢除咗出 post晒生日蛋糕之外,原來前一日亦出席由一班薯粉搞嘅生日會,仲同田北俊、曾鈺成合唱,遲吓仲會搞個「沙龍」組織,討論時事。
薯片叔叔人緣好,同佢合作過嘅,似乎都有讚無彈,响競選時幫佢影相嘅「 ATUM Images」,亦專登整咗本相集俾佢做生日禮物。團隊中嘅林亦非及羅國輝話,呢本相集係無字天書,全球限量只得一本,二十頁、輯錄咗 48張相。
羅國輝話,上星期佢哋約咗薯片叔叔去灣仔動漫基地睇 2017 WMA Masters Exhibition大師攝影獎作品展,順便送上生日禮物,佢哋一齊喺茶餐廳逐頁逐頁揭,回味競選時嘅每一個細節。「好多地方佢都記得,佢仲好回味每一個細節,呢度喺天水圍……呢度喺獅子山……呢次選舉真係帶俾佢好多回憶。」




薯片當日收到禮物後,已經忍唔住即刻喺茶餐廳揭嚟睇。


選戰曲終但人未散,幫薯片影相嘅團隊,趁佢生日送上呢一份特別賀禮,絕對用錢都買唔到。


生日蛋糕都別具心思,有晒薯片造型。 戴耀廷做天氣先生 新搞作又同天氣有關


雷動計劃跟風雲計劃都跟天氣扯上關係,戴耀廷就話係因為同雨傘運動有關,仲認個名老土,但勝在易入腦。

政圈呢期吹出大和解風,中聯辦法律部部長王振民又打晒開口牌,話未來五年唔適合重啟政改,但一直堅持爭取真普選嘅戴耀廷( Benny)就有理冇理,繼續搞風搞雨,最近提出咗個「風雲計劃」,瞄準兩年後 2019年區選繼續抗爭,但點解由雷動到風雲,無獨有偶都同天氣有關?
提完佔中再提雷動,已經被標籤係搞事分子嘅戴耀廷,仲有個「戴妖」外號,最近佢仲做埋天氣先生,戴耀廷就話,自己諗呢啲行動代號時,係一脈相承雨傘運動,「因為雨傘同香港民主已經扣連一齊,既然有雨,自然就有雷,咪提出雷動推動策略投票」,用咗雨又出咗雷,剩低風同電,佢因為比較鍾意風,於是用風去起名。
咁點解最終叫風雲,原來係關集體回憶事, Benny話計劃嘅目標受眾,係三十幾歲以上中年人,因為八○年香港有套電視劇叫《風雲》,由劉松仁、馮寶寶、任達華、黃杏秀等主演;另外又有套大家耳熟能詳港式漫畫《風雲》,班中年人一聽「風雲計劃」已經入到腦,咁推銷計劃時咪會易啲囉。

撰文:巫不言
mailto:news@nextdigital.com.hk

 

文章標籤

tvb4life 發表在 痞客邦 留言(0) 人氣()