壹號幹線

我俊俏也風情  Infiniti Q60

贊助商連結

有興趣成為 Q60車主的男士或女士們請注意,由於這部美籍日裔豪華轎跑車實在太靚太迷人,好容易吸引途人目光,特此建議任何一位座上客最好事先悉心打理儀容才上車,冇錯,自己醜係唔緊要,最弊「影衰」部車事大嘛……




2.0 turbo引擎及 7速波箱都由平治提供,某程度上可以話係 selling point都得。 208匹輸出唔算激昂, 0-100km/h需時 7.3秒亦已經實際反映性能如何,不過話晒都係 Benz機器,運轉係特別寧靜同穩定嘅!

全線 Q60均由日本栃木廠房生產, Infiniti更從廠內 4,500名員工中,選出 216名最高水準的匠人( Takumi)專職負責組裝,質素有保證。更要讚是噴漆處理,示範車所用的為 Dynamic Sunstone Red,是一種帶有銀底的紅色,特別於嬌紅從底層發色至表面,銀粒子超幼,表面光漆厚度一致又平滑,觀感潤澤亮麗。若嫌太搶眼的話, Q60另有 9種顏色選擇,總有一款啱你心水。

讚一讚:線條靚到無得彈,噴漆處理更勝歐洲一線品牌;原裝音響重播效果好有驚喜;價錢合理,同級最抵公子 Coupé。

彈一彈:性能與操控皆欠刺激性;設備未夠豪華貼心;前座安全帶設計莫名其妙。

同級開心價

售價:$499,800
引擎: 1991c.c.,直 4;前置,後輪驅動;渦輪增壓
馬力: 208匹/5500rpm
扭力: 35.7kgm/1250-3500rpm
波箱: 7前速自動雙離合器(附+/-模式)
長/闊/高: 4690/1850/1395mm
重量: 1692kg
耗油量: 7.5L/100km
0-100km/h: 7.3秒
查詢: Infiniti HK
網址: http://www.  infiniti.com.hk



揀得 Coupé自然要將實用環節「擺埋一邊」,而首要條件,係一定要夠靚。從審美標準評分, Q60真心係靚同 charming,無論從任何角度睇都同時下車款好唔同,你可以話佢滿布肌肉線條,形容為曲線玲瓏亦可,正如廠方「 FEEL MORE」宣傳口號一樣,你 feel到乜,就係乜。



車廂設計幾有跑車 feel,駕駛席與乘客席完全分隔,上下各有輕觸屏幕,皮革使用量中上,係全黑內籠觀感較單調,揀白色皮會更有格調。另外,軚盤來自 GT-R,賣相同握持手感都達標,但竟欠轉波撥片,有冇公關可以解釋吓?

 




19吋軨玩 two tone撞色設計,係幾靚但柱位好密,將來肯定「洗餐飽」。


Q60為首部使用 Bose Performance音響的汽車,全車配有 13組喇叭,擺位、擴音機、安裝皆為 Q60度身調校,保留品牌一貫勁低頻特色之餘,分析力、人聲定位、平衡度、弦樂重播多方面都有大幅躍進,音質「拍得住」十萬元級改裝,要大讚。


儀錶板設計似潛望鏡筒,得中央小屏幕可切換顯示,冇乜花巧,功能至上。


Q60本來好襯巨型天幕頂,可惜冇,而天窗面積又略嫌孤寒,當通風裝置好了。


可顯示即時橫向 G值,但 Q60性能未算好辣,不要期望有驚人數字出現。


原裝車已內置導航系統,輸入介面反應一般,用 Google Maps好過。


撥向右可用加減波,個人稍嫌波棍造型略大支,操作時手感一般。


話晒都係高級車,欠電子手掣已經要「打 pat pat」,更離譜是實體手掣都竟用 foot brake取代,而且兩隻腳踏又太「塑化」,設計部要大刑伺候。 

後座唔算好窄,但受急墜車頂線條影響,高身人士或會頂頭,而且頭枕高低不可調校,隨時變成頸枕。另外,全車最怪誕位是安全帶,前座乘客使用時已極不就手(易扭傷膊頭),後座乘客進出又易被絆倒,點解唔將安全帶與前座連埋而偏要放於 B柱位,麻煩公關再次解釋。

 




個人幾 buy座椅造型,坐落好厚好舒服,大隻(肥)佬都承托得好穩陣。


Infiniti向來好俾心機「搞 C柱」,線條特斜、電鍍窗框造型又夠特別,好吸睛。


350公升尾箱容量,不設擴充翻櫈,但以跑車計,算好大了。 

車架源於四門房車 Q50,駕駛感傾向豪華車格局,行車寧靜,車廂隔音水平高,亦有 FR車應有「推住入彎」快感,懸掛調校好中性,可歸納為「舒服型豪華跑車」。不過原裝車所配的前後輪胎為 255/40R19,賺了高速穩定性,但就削弱了轉向靈活度,改用前窄後闊胎,操控樂趣將大增。

撰文:廖宏俊
攝影:方保山
攝錄:黎英豪
mailto:features@nextdigital.com.hk

 

文章標籤

全站熱搜

tvb4life 發表在 痞客邦 留言(0) 人氣()