吳綺莉中西合璧治療

贊助商連結

吳綺莉同個女卓林嘅關係再度變差,佢仲涉刑事恐嚇被警方調查;而卓林o依家住喺醫院,吳綺莉就連日嚟瞓唔安、食唔落,日日都有傳媒追住佢,難怪身心俱疲,精神大受困擾,情況都幾令人擔心。上周五(七日),佢到警署報到時,仲大呻一日瘦過一日。

東姑早幾日喺中環,就發現吳綺莉嘅蹤影,冇化妝戴住口罩嘅佢,眼睛浮腫、無厘神氣,容顏相當憔悴,一個人泊好架車,就喺附近會合咗一個女性朋友。現場所見,呢個朋友一路行一路似係安慰住佢咁,最後雙雙上咗一幢商業大廈,原來係去嗰度睇精神科醫生。

其實,吳綺莉呢排為個女勞心又勞力,早前就已經自爆身體不適,摸住條頸同記者表示「淋巴腫晒」,因為咁而要睇中醫食中藥,o依家更加進展到要睇精神科醫生添。睇嚟佢嘅精神壓力,真係愈嚟愈嚴重,而佢亦透露係搵醫生開啲放鬆神經嘅藥物畀佢。

不過,講到尾,呢啲心病還須心藥醫,最重要都係卓林生性聽聽話話,兩母女好好溝通,母女重修舊好,咁就一天光晒。始終乜病都好,有親人嘅支持,勝過任何靈丹妙藥嘅!

素顏嘅吳綺莉,難掩一臉憔悴,雙眼浮腫,兼黑眼圈暴現。

 

吳綺莉約埋一位女性朋友,行去一幢商廈,沿途上呢位朋友不停開解安慰佢。

 

早排,吳綺莉喺大埔睇中醫,就透露過身體不適,佢話自己「淋巴腫晒」。

全站熱搜

tvb4life 發表在 痞客邦 留言(0) 人氣()