坦白講

親親我好媽

贊助商連結

每個母親都想自己仔女行一條平坦的路,呂小玲把兒子朱俊匡供到外國讀名牌大學,阿仔畢業後開 IT貿易公司,早前回流返港,媽媽建議他考政府工。不過阿仔的夢想是開茶記,阿媽當然擔心又肉赤,但只要阿仔鍾意,便全力支持。她認為人生不只是為了搵錢買樓。
阿仔頂手茶記後,呂小玲發現自己患上胃癌,晴天霹靂,化療令她身心俱疲,但有時間她亦會落茶記幫手收銀,一顆撐阿仔的心,永遠不變。

阿仔

十六歲那年,父母供我出國,細個已經去加拿大做交換生。畢業後,搞 IT貿易公司,主要對美國客,日間都幾得閒,時差問題,夜晚先開始忙。我媽想我考政府工,穩穩定定。不過,我嘅夢想,係開茶記。
在外國生活,只係得快餐店、咖啡室,冇乜地方俾大家聚腳,大家 Say Hi-Bye,唔會噓寒問暖。每次返香港,都會陪阿媽去屋企附近間幫襯咗好多年嘅茶記,去到唔使出聲,伙記會俾個卡位我哋。阿媽唔只鍾意飲奶茶,仲有嗰份感覺,上至老闆、下至伙記,好似老友咁,天南地北乜都傾一餐。過時過節,阿媽又會送禮物俾佢哋。
有個舊街坊退休,想搵人頂手佢間茶記。阿媽話我傻,但又支持我為夢想進發,得佢咁講,我決定拎咗七十萬出嚟頂手。茶記唔走高檔、價錢公道,最好五十蚊食到三餐,令大家負擔唔好咁重。以為一切順利,點知媽媽患上胃癌。好想放棄茶記去照顧她,但她叫我堅持。我搞茶餐廳,唔係為發達,或者最終都會失敗收場,胃癌令她好辛苦,但她仍然鼓勵我,多謝媽媽陪我撐。

媽媽

接手後,我發現我有胃癌。阿匡想即刻撻訂,因為想陪我多啲。我叫佢唔好,機會唔係成日有,而且承諾咗接手,舊老闆會失預算。唔好理我個病,陪我對我病情冇幫助。我知佢好擔心我,但唔可以要佢放棄夢想。其實留喺屋企會好悶,對住四面牆會亂諗嘢,落嚟見到街坊傾吓講吓先正常,又可以見到個仔。
我有三個仔女,我乜都以佢哋為先,將自己放到最後。我只希望佢哋開心,諗清楚想做咩,阿媽都會支持。阿匡其中一個夢想係開茶記,可能自細聽我同佢舅父話當年,耳濡目染。未搞呢間茶記前仲係茶客時,已經問過我:「如果喺西環開茶記,唔知街坊會點睇?」我答佢:「除咗人情味,仲要平。」西環區主打街坊客,唔好以為啲樓三萬蚊呎,消費力就一定高,始終供樓負擔大。呢區唔係個個有錢,伙記都係搵萬四五蚊一個月,生意唔使賺到盡,唔蝕就夠。
有時都肉赤阿仔咁忙,天未光就開鋪,收鋪仲要清潔。返屋企又要搞 IT公司,瞓得四粒鐘,踩足七日。不過,做呢行,就係要親力親為。
雖然有病,但有時間我會落鋪頭幫手,不過只會俾意見,唔會幫佢做決定,佢先係老闆,佢要為自己嘅事情負責。媽媽嘅事,不用擔心,做化療,唔會做一世,完成我就會冇事,面對事情要堅持同堅強,因為有阿仔陪我撐。

撰文:黎雅婷
攝影:胡智堅
mailto:news@nextdigital.com.hk

 

文章標籤

全站熱搜

tvb4life 發表在 痞客邦 留言(0) 人氣()