坊間一致裁定,此為「七代半」 Golf,其實,外形上都有「做到嘢」,換上全新 LED燈,指揮燈採用走馬式,霧燈外觀亦有改動,雖然改得細眉細眼,不過依然一眼認得出,任務完成,期待第八代。

壹號幹線

show在骨子裡  Volkswagen New Golf 7 1.5 TSI BMT

贊助商連結

2013年, Volkswagen推出第七代 Golf,四年過去,以汽車生產周期來講,絕對夠時間推出一部全新型號,當人人期待等睇新車, Volkswagen亦順應民意,推出「 New Golf」,之不過十個人睇完新車相,正常都會一臉疑問,到底「 new」喺邊?其實,想 show off新車,只要帶親戚朋友坐上車,就自然會 feel到朕「 new」味。

 

歐洲限定
售價:未定
引擎: 1,498c.c.,直 4,渦輪增壓;前置,前輪帶動
馬力: 150匹/5000-6000rpm
扭力: 25.5kgm/1500-3500rpm
波箱: 7前速自動
長/闊/高: 4258mm/1790mm/1492mm
重量: 1317kg
耗油量: 5.0-5.1L/100km(公路及市區綜合計算模式)
0-100km/h: 8.3秒
極速: 216km/h
查詢: Volkswagen HK
網址: http://www.vw.com.hk


全新 1.5公升引擎,容積比現時 1.4公升引擎增加 103c.c.,雖然馬力無大躍進,但神奇地方是耗油量竟比 1.4公升引擎更低,原因在於定速巡航時,其間會自動關閉兩個汽缸,兼且作出不少精細改良。睇數據,行 100公里只需要 5公升汽油,的確令人流晒口水,不過此偈暫時只屬歐洲限定,香港依然配備 1.4 turbo偈,抹番你啲口水先喇。
整體沿用上代內籠布局,無驚喜?其實細心睇,車壁及前座乘客席前的裝飾物料,都改用新 pattern。再坐上司機位,睇睇儀錶板上的 12.3吋 active info display,肯定大滿足。



中控台大改革,用上名為 Discover Pro車機,實用面積達 9.2吋,繼而再一開三同時睇地圖、天氣及多媒體資訊,甚至轉做 turbo錶都得。最重要是創新手勢操作,撥左撥右轉歌轉電台,雖然玩法無聊,不過叫做新元素,廠方自然要力谷。可惜輸港版本無得玩,但亦都會全線加大車機屏幕尺寸,無個橙都有個桔。


新 Golf配備多種安全系統,例如主動巡航、盲點顯示、行車線偏離、司機疲勞警示等,統統都可透過 active info display顯示。講開安全,特別要講新加入的 precrash系統,當系統偵測到汽車即將失控,就會將天窗、車窗關閉,並自動拉緊安全帶,講完,知道就夠,應該無人想試。


變化多端的 active info display,想睇邊種資料,用軚盤上的按鈕,就可以隨時轉換,睇地圖、歌名統統都得,夠實用。將來港版的 Golf GT及 GTI,都會列為標準配備。


歐洲人的皮椅情意結,其實無香港人咁嚴重,之不過測試車用上布料加 alcantara,一樣好舒服,無論承托力同包圍感,絕對屬上乘質素,話晒 Golf絕非等閒小車,一張座椅,點會難倒佢。


收埋條尾喉,再加上電鍍邊,感覺即時高貴咗,兼且尾燈同頭燈睇齊,轉用 LED同走馬式指揮燈,以小改款來講,已經做足指定動作。
GTI同步升班


全線小改款,當然不少得 GTI,輸港版本將為 GTI Performance,馬力微升 5匹達 245匹,改用七前速 DSG波箱,今次馬略卡之旅未有現身,只提供 GTI作測試,馬力為 230匹,波箱依舊是 DSG六前速,不過加速力依然勇猛,波箱表現流暢利落,是絕對夠 hot的 hot hatch。
飄遊雪地
今次西班牙之旅,壓軸項目是飛到瑞典北部小鎮阿爾維斯堯爾,參加三日兩夜的雪地飄移駕駛課程,期待心情絕對比試新 Golf更興奮…"
到埗後,領隊告知因天氣回暖(其實只有攝氏 3度)飄移之旅被迫腰斬,原來玩雪地飄移,並非有塊雪地就得,皆因要四野無人兼空曠,所以每逢冬天,想搞雪地飄移的車廠,都要向當地政府「租湖」,待湖面結冰,並且冰塊達至一定厚度,教練 Anton Marklund話厚度甚至足夠飛機降落,再加上鋪滿雪(由於融雪,積滿水,所以無得飄移),先可以進行雪地飄移。
Volkswagen在瑞典的飄移場地,賽道長達十公里,是阿爾維斯堯爾最長的冰上飄移場地。除了場地,車都好重要,所以要玩雪地飄移,四輪驅動絕對不少得,「落場車」全部用上 4Motion的第七代 Golf R,早前更由 6前速手波版本,引入首批 DSG波箱的 Golf R。此外,輪胎亦要裝上特製的「窩釘胎」,以增加雪地上的抓着力,平均一條胎,多達近 400粒釘,絕非隨便就玩得。雖然今次未能一試雪地飄移,不過有興趣的話,其實可以向廠方報名,四日三夜課程收費 3,690歐元(約 HK$31,000),費用不但包車費、汽油、教練講解、指導費之外,仲包括來回德國慕尼黑機票及住宿,幾乎帶個人去就得。
網址: http://www.volkswagen-driving-experience.de

90後教練 Anton Marklund,「正職」為越野賽車手,現屬 Volkswagen RX Sweden車隊。

雪地駕駛跟雪地飄移,其實是兩回事,一般雪地駕駛,如果四輪驅動,大可使用一般輪胎,但雪地飄移就要用上裝滿釘的輪胎。

雖然無得飄移,不過都可以揸住部最新 DSG波箱的 Golf R四圍去,初步感受雪地駕駛。
撰文、攝影:劉耀祥(西班牙馬略卡)
features@nextdigital.com.hk

文章標籤

全站熱搜

tvb4life 發表在 痞客邦 留言(0) 人氣()