坦白講

是誰在謀殺誰?

贊助商連結

為了子女的將來,父母無止境的威逼;有小朋友為換自由,竟預謀殺死父母。猶幸,這只是一個故事。然而由一六年至今,約五十名學生輕生,年紀最小只得 11歲。趙羅尼 Ronnie, 33歲,現職網絡廣告導演。曾做過新聞工作,拍過《公屋•居屋•私樓》、《雨傘飯局》,今次《我的生涯規劃》借用小學生預謀殺死父母的誇張台詞,冀社會反思學生壓力爆煲問題,家長不要謀殺小孩子的童年。他回想自己小時候,老豆會幫他錄低卡通片,雖然未成為大導演,但拍網片都拍出自己一片天。

我細個嘅年代,點唔開心都好,從來冇諗過自殺,點解呢代會變成咁?呢代細路同我想像中好唔同,快熟又冇童真。拍《我》片嘅時候,喺街見到個細路,佢竟然問我,拍片搵到幾多,自資兼冇錢賺點解要拍。
好多家長都話依家嘅細路冇得抖。功課十幾份,放學後補習、上興趣班,夜晚要溫書,無娛樂。我嘗試代入班細路,每日不停做啲唔鍾意嘅事,一星期做足七日,返工衰極都有一日休息,自己一日都冇,人生有咩意義?為人父母都係愛錫子女,但係我覺得咁嘅方式係錯。要求佢哋上幾十種興趣班,有啲興趣班係本末倒置,個細路有咩長處,咪專注發展嗰一方面。有父母話:「你唔逼佢試,點知佢鍾唔鍾意。」學埋好多奇怪樂器,好似《我》片個細路學非洲鼓,逼佢學嚟有咩用呢?俾佢玩一星期,你就知佢鍾唔鍾意。有啲細路,開到口話累,仲逼佢哋?
我老豆信體罰。佢覺得自己嘅品格,係嫲嫲打出來,於是將呢套放喺我身上,少少唔順佢意,就狂打我。寫手冊,就算得一樣功課都要寫。試過冇寫但做齊功課,他都打我。愈打我就愈對抗,我專登整個學期都唔寫,企定定俾佢打,被打到成腳藤條印,打到佢驚。老豆雖然好嚴,但從來唔逼我讀書,會俾我玩。我會抽閃卡,睇完卡通片先開始做功課。有時太多功課,佢仲會幫我錄低,剪埋廣告留俾我睇。玩,好重要。中五畢業,佢叫我讀埋預科,諗番轉頭我仍然覺得係浪費兩年時間,讀書真係冇得逼。最後我去讀電影,入咗 IVE。父母冇反對,亦冇逼我入大學讀電影,爸爸仲好支持我拍網片。
話學生抗壓力低,尋死因為生涯冇規劃。人生冇得規劃,好似之前讀印刷,今日紙媒已經沒落。我讀 IVE電視電影,嗰科都摺咗。學生壓力大到連聽日都唔想過,仲點敢諗將來?今次拍呢條片,想用學生荒謬嘅對白,令大家反思呢個問題。點知有人話我知係真有其事,仲已經喺五年前發生,話要殺死父母先有覺好瞓。現實荒謬到咁,究竟社會出現咩問題?係唔係淨係學生出問題?
撰文:黎雅婷
攝影:胡智堅
news@nextdigital.com.hk

    文章標籤

    坦白講 是誰在謀殺誰?

    全站熱搜

    tvb4life 發表在 痞客邦 留言(0) 人氣()