鄭世豪受屈辱流男兒淚

贊助商連結

啱啱喺港台嘅《十大中文金曲》 拎咗新人銅獎嘅鄭世豪,自細愛唱歌,參加過無數歌唱比賽,最威係喺《星夢傳奇》攞亞軍。輾轉之下,佢去年簽咗畀星娛樂,再自資六位數出碟。首張專輯《仍堅持》終於喺月中面世,而佢嘅母校「中華基督教會扶輪中學」就掃咗二百隻碟嚟支持佢,認真撐到行。

日前,世豪帶埋老婆返母校出席四十五周年校慶活動,以示謝意。期間,又喺禮堂搞咗個新碟義賣簽名會,瞬間引嚟成班校友排隊幫襯,而善款將會作為改善低收入家庭學生嘅學習環境之用。事後,世豪同東姑講,話當年佢喺中四聖誕聯歡會時,參加咗人生第一個歌唱比賽,當時獻唱古巨基嘅歌曲,又係攞咗亞軍,自此就激發佢不斷參加歌唱比賽,而體育老師林sir就爆料:「當時覺得佢潛質唔錯,係有少少多口,但愈大愈生性。」

見氣氛融洽,東姑乘機追問世豪,點解喺微博上載咗張落淚照?原來,佢之前拍《翻生武林》時,因為企位嘅問題,有工作人員令佢感覺到受屈辱,「佢講咗一句全世界都聽到嘅說話,『世豪,攰就唔好撈啦!』大家即時都呆晒,之後我冇講過任何嘢,自己承受咗,我好唔開心。嗰晚我收工落妝,我望住番塊鏡,就忍唔住真係喊咗出嚟。」世豪表示,佢之後返電視城都成日撞番嗰位工作人員,但自己就當冇咗件事,努力做好本份,正如林sir所講:「愈大愈生性。」

簽名會一開波,歐陽校長率先畀咗千五銀掃咗兩隻碟,為支持舊生世豪及做慈善,當然冇計。

 

林sir話早喺校慶前已買咗世豪集新碟,又向世豪「投訴」好多間CD舖都清晒貨。

 

鄭太(圓圖)全程充當老公嘅私人攝影師,成晚舉高部手機狂影老公,默默做佢背後嘅女人。

    全站熱搜

    tvb4life 發表在 痞客邦 留言(0) 人氣()