上個月十九號,亦即係夏佳理買入空殼公司嗰日,《壹》仔直擊林鄭去咗空殼公司嘅所在大廈,仲逗留咗個半鐘先走。

八卦陣

偷步!林鄭鬼祟巡視「競選辦」

贊助商連結

林鄭究竟入閘未?直到今個星期一都仲未有聲氣,但政圈就盛傳佢會响禮拜四辭職,甚至有人話同佢拍住搞西九故宮嘅夏佳理,會係佢嘅競選班底。

《壹》仔做過查冊,夏佳理喺舊年十二月十九號,買咗間叫「偉億發展有限公司」( Wellink Development Limited)嘅空殼公司,而三十會召集人、大律師李律仁就係公司嘅秘書,佢兩位都係傳聞中林鄭競選班底嘅核心成員。
呢間疑似競選辦公司,註冊地址係夏佳理喺和記大廈十九樓嘅 office。林鄭上個月十九號,亦即係夏佳理買入呢間公司嗰日,竟然咁啱喺和記大廈出現。當日傍晚五點半左右,林鄭收工後坐佢架「 CS」專車,由政總直駛和記大廈。樓下保安見到佢,隨即幫佢㩒𨋢,當時部𨋢只有佢一個人,最終停咗喺二十樓,而佢就前後逗留咗足足個半鐘先至離開。
點解係二十樓,而唔係十九樓?究竟嗰日佢係咪為咗掩人耳目,鬼祟行一層樓梯去巡視呢間疑似競選辦呢?《壹》仔問過政務司司長辦公室,當然佢哋係無回覆啦。







同林鄭拍住搞西九嘅夏佳理,盛傳係林鄭嘅競選班底。 林鄭無知獻媚力撐 懶理故宮黑歷史

西九故宮文化博物館風波愈揭愈多臭史,林鄭今鋪一手搞出個大頭佛,自然要瞓身力撐。佢上星期五喺立法會內會解畫時,幾肉麻嘅獻媚說話都講得出口,話大家可以批評抹黑甚至侮辱佢都冇問題,但唔可以矮化故宮博物院啲珍藏。
林鄭講到故宮咁威威,但可惜共產黨同毛澤東就唔識貨,曾經喺六十年代想拆咗故宮,改建做黨中央大樓,呢個改建北京城計劃仲有晒圖則,連強國官媒都有報導過。又係嘅,故宮就如同封建帝制嘅圖騰,共產黨當然要破四舊啦!
支持西九起故宮可以顯示自己夠愛國,所有一班建制中人之後就急急腳整咗個「支持興建香港故宮文化博物館大聯盟」,成員之一嘅前政協李國強星期日出席《城市論壇》時,就話故宮係世界四大博物館,但《壹》仔搵過中外傳媒近年報導,都冇見過有呢個排名,反而強國百度就話四大係法國羅浮宮博物館、英國大英博物館、美國紐約大都會博物館同俄羅斯國立埃米塔什博物館,總之就冇天朝故宮份,就算世界十大,北京故宮都唔係個個榜上有名囉。




林鄭處理鉛水事件時,發晒惡鬧居民叫官員飲啖水係令官員屈辱,但今日為咗獻身幫西九護駕,就話侮辱佢冇問題,真係幾「毛管戙」嘅說話都講得出。


故宮在網上有個電子藏品目錄,報稱單係書法就有七萬五千件,陶瓷更加超過三十六萬件,但故宮有近半地方未開放,每年只展出萬多件藏品,計吓數,分分鐘要百幾年先可以展出得晒全部展品。 【阿媽我好亂】朱凱廸?朱凱迪?


阿廸話,用邊個廸其實佢無乜所謂,不過為免混亂,所以惟有統一用呢個「廸」。

朱凱廸以票王姿態當選立法會議員之後,人氣急升,仲幾乎日日見報。不過,點解佢個名,直到現在都仲係咁多人寫錯。有人寫「迪」,有人寫「廸」,究竟係邊個廸先啱呢?
朱凱廸話,由細到大佢自己習慣用呢個「迪」,不過,佢出世紙同身份證,就係用呢個「廸」,佢一直唔覺得有乜大問題,不過舊年佢選立法會,選舉事務處話佢個簽名同身份證個名唔同,要佢搞清楚先。為免麻煩,佢於是就改變自己習慣,統一用呢個「廸」。
香港中文大學前教務長何文匯話,傳統辭典裡面,「廸」其實係錯字,係一個俗字,正字應該係「迪」先啱,解作道理,開導意思。佢估計「廸」呢個字,係以前啲人寫錯咗字衍生出嚟。
之但係,近年上海、北京出嘅辭典,又竟然將「廸」呢個字,記錄成係「迪」嘅繁體字。咁即係點?阿媽,我真係好亂。

咩玩法?買報紙送 Indomie

唔少人都話紙媒已死,但今個星期,竟然又多一份收費報紙;不過今次玩法有啲唔同,佢哋唔係用內容吸客,反而係用贈品搶灘。新出嘅《 e+都市》係都市集團旗下,老闆又係黃浩 Kenny,佢前排先因為廣告收入唔夠,搞到《 E週刊》一年裁員幾次,但而家竟然又出收費報紙,莫非搵到水魚投資?
Kenny同《壹》仔講,佢話今次玩法有啲唔同,佢係「睇餸食飯」,用緊《都市日報》同《 e+娛樂》嘅資源,再加小量 freelance人手去出一份收費報。佢話頭一個月會咁樣運作,之後就睇吓有幾多收入同埋有幾多廣告客,先決定會唔會再請人。
佢話,呢份報紙而家每日印二萬幾份,逢星期一至四出版,隨報紙有贈品送,第一個星期送姐姐嘅至愛 Indomie,第二個星期送飲品,第三個星期送清潔用品,佢話呢啲都係廣告客戶嘅貨,唔係佢出錢買,所以成本有限,蝕都唔會蝕到入肉喎。
一包 Indomie最平可能兩蚊有找,究竟大家肯唔肯俾四蚊「買麵又買報紙」,就要自己衡量喇。







諗頭多多嘅 Kenny覺得,免費報紙已經飽和,希望用「半賣半送」形式搞收費報,殺出條新血路。

撰文:巫不言
mailto:news@nextdigital.com.hk

 

    tvb4life 發表在 痞客邦 留言(0) 人氣()