壹號幹線

2017年到港新車預算案

贊助商連結

回望剛過去的 2016年,車市仍然持續低迷,個別品牌錄得雙位數下滑幅度,代理叫苦連天;賣到車、交到數的其實亦要大劈價才保得住江山,整個行業冇啖好食。新一年開始,情況仍未見有改善跡象,不過汽車始終要推陳出新,縱然經濟差,不過車迷始終會「身痕」,一系列海量新車,仍然恭候各位大駕光臨,早些儲錢,揀定心頭好。

BMW 5 Series

平治「新 E仔」叫人眼前一亮,寶馬全新 5系自然要還以顏色,採用同一炮製手法,將源用於旗艦 7系的先進技術直接下放到 5系身上,車廂氣氛及設備都同時提升至更高豪華層次,縱使沒有採用造價高昂的碳鋼複合車架技術,車重一樣可大減 100kg,風阻更是低得誇張的 Cd0.22,即係話,新車更歎更靜更舒服更慳油,至於駕駛感,拍心口話你知,一定冇問題!

Infiniti Q60

Infiniti車真心有水準,不過仍需時間去令車迷認識及接受。全新豪華雙門轎跑車 Q60大可充當最佳「品牌代言車」位置,外形瀟灑瑰麗,車廂華麗與設備並重, 2.0及 3.0 turbo引擎提供 211匹及 400匹馬力,真正有姿勢,有實際。

Maserati Levante

話晒都係瑪莎首部 SUV,代理亦早已高調輸入左軚版收訂,據聞反應相當不俗,而首批右軚版亦鐵定年頭抵港,早早落訂的買家自然早買早享受,還在猶豫的則話你知,意大利 SUV的確有與眾不同之處,最辣的 S版,馬力高達 430匹。

Audi Q5

SUV熱潮毫無減退跡象,第二代 Q5更是充當「撥行火」的重要角色,睇落似係 Q7 80%縮水版本,外形誠意得分只一般,但同樣轉用 MLB新車架技術,軸距增長至 2820mm,意味着後座有更多伸展雙腿空間;招牌 Virtual Cockpit自然少不免, B&O音響系統亦可出現於車廂之內,主及被動安全大幅提升, quattro四驅亦有所改良,增強越野能力之外,兼有更出色耗油數字。

Alfa Romeo Giulia

面對眾多德國強敵同一貫的「慣性收視」,大可以幾肯定去判斷: Giulia冇可能大賣,不過好車未必一定好銷路;大賣車一樣可以好多缺點。話 Giulia屬於好車相信冇人會反對,整部車俾到你就是品味同獨特,最高性能的 Quadrifoglio馬力高達 510匹,創下的 7分 32秒最快紐布靈圈速紀錄,已經是最夠照的賣點。

Porsche Panamera

歷史早已告訴我們:凡係有四隻門以上嘅保時捷,必定好賣。長賣長有的高性能房跑車 Panamera亦昂然進入第二代,設計理念以「四門 911」為開發核心,轉用全新 MSB車架及 8前速波箱;昔日大量按掣的車廂亦已被輕觸屏幕取代及簡化,而且後座空間亦一併擴闊,注定大賣。

Land Rover Discovery

大型 SUV幾乎個個牌子都識造,但要同時具備真正越野能耐的話, Land Rover認第二,恐怕冇人敢認第一。第五代 Discovery轉用全新鋁合金車架及驅動系統提升越野性能之外,車廂豪華程度及空間都有大幅躍進,廠方強調七張座椅都屬 full-size adults尺碼,可全電動甚至用手機控制收摺。同級 SUV自然驚驚,從來河水不犯井水的 MPV亦都會腳震。

Mazda CX-5

預言總有錯失,我上年便估錯 CX-3可於 2016年出現,結果到目前仍是音信全無。而在廣島廠房那邊,第二代 CX-5已下線出廠,體積雖與上代相若,但賣相更為討好,據聞會加入 GVC重心轉移技術,其他細節,唔講太多,嚟到先再算。

Mercedes-Benz E-Class Coupe

新「 E仔」無疑係正到爆,但話晒都屬於不羈的你又點會甘心揸四門房車呢,所以採用相同機械布局,減省兩道後門的「公子專用 E仔」便顯得好有存在價值了。外形剛剛好就在 S與 C Coupe中間,雙芒當然唔少得,戰機式噴射器冷氣出風口更成為獨有設備。

Honda NSX

「日本超級跑車」正式回歸,說的是備受萬人敬仰,有日本國寶之稱的全新本田 NSX,外形極具侵略性,面對歐洲對手更是毫不輸蝕。性能更加唔講得笑, 581匹綜合馬力由一台中置 3.5公升 V6雙 turbo引擎結合三馬達組成的油電裝置產生,三秒內踩至 100km/h,極速高達 308km/h,四驅系統備有多種不同模式選擇,就算車價高達四球,一樣大把識貨人士爭相搶配額。

MINI Countryman

一如其他 MINI車系,第二代 Countryman亦愈來愈與「迷你」兩字背道而馳,外形大概是前作的「更有型」版本,重點是改用源於寶馬 2系 Active Tourer的 UKL1車架,車長及軸距均再度發育,意味着乘坐空間更為舒適。

Volkswagen Golf

第八代 Golf還未有動靜,廠方先以小改款七代紓解民怨。外觀改動算做輕手,但車廂卻加入了 12.3吋全數碼 Active Info Display;全線版本馬力均向上調,其中新增的 1.0公升版強調好力兼異常慳油,期待期待。

Mercedes-AMG GT Roadster

開篷車要搞選美比賽的話, GT Roadster唔係坐亞望冠,都一定贏到最上鏡大獎。
要輕,自然要用軟篷結構, 11秒完成開合,同部車一樣咁快;頭冚下是 4.0 V8孖 turbo引擎,「係咁意」 462匹馬力,未夠喉? 510匹的特辣版 GT C,隨時恭候大駕。

Ford Fiesta

歐洲小車從來難挑戰本地市場,不過 Fiesta卻以高質車架技術,加上一台估唔到咁好力嘅一公升 turbo引擎,成功改寫歷史。踏入小改款周期,外形只係循例小執,不過車廂就大幅升級,塑膠味大減,亦新增了 8吋大 mon輕觸屏幕,搖身變成豪華小車。

Toyota C-HR

豐田行貨中小型 SUV從未正式於香港開賣過,全新作品 C-HR自然令人期待,線條凹凸分明,充滿大隻佬肌肉感,車廂大玩科幻感,又有隱藏式 coupe後門,擺明取悅年輕用家,預計以 1.2公升 turbo引擎打頭陣。

Audi Q2

係人都話奧迪設計冇乜新意,不妨睇睇 Q2再作定斷吧。主打年輕人市場的 Q2以全新品牌設計理念打造而成,任何角度睇都可帶俾你新鮮感,體積介乎 A1與 A3之間,空間未稱得上寬敞,不過豪華設備極之齊全,更有多種引擎及驅動模式選擇,本年度黑馬之一。

Lexus LC

對上一次凌志推出雙門轎跑車已是 N年前,相信採用 2+2布局的 LC定可為車迷挽回不少美好回憶。外形、線條、輪廓都可用靚到震去形容,車廂更是美不勝收,混能版 LC 500h綜合馬力達 354匹, 5秒內可加速至 100km/h,相信會好靜,亦相信會好快。

Nissan Serena

2016年日產喺本地市場可謂「靜到痺」,代理話佢哋都唔想,幸好新一年終於有重頭戲上畫。講嘅係第五代 Serena,重點是 MPV中首次安裝的 ProPilot自動駕駛技術,但預計到港版本將全部被「閹」。不過講實用仲有好多 talking point,包括同級最長的車內長度及闊度,以及更靈活的「八變七」座椅變化,心水 gimmick是首度出現的「掃腳式」側趟門設計,媽咪手抱小孩,一樣可以輕鬆上車。

Suzuki Ignis

香港好需要小車,尤其是賣得平,樣子又可愛的就最受歡迎。繼 Hustler之後,新作 Ignis就是一部充滿陽光氣息的小車, 1.2公升引擎配 CVT波箱,注定「大食極有限」,估計懸掛會刻意硬朗化,操控會有驚喜。

撰文:廖宏俊
mailto:features@nextdigital.com.hk

 

tvb4life 發表在 痞客邦 留言(0) 人氣()