今年元旦大遊行只得唔夠一萬人出嚟行,但大家熱情如火,結果撐起捐款數字,其中社記籌得超過四十萬元,冠絕一眾政黨政團。

八卦陣

強國陰司紙特別 cheap 藍絲捐細額冥鈔無銀用

贊助商連結

今年元旦遊行雖然輸人數但就冇輸陣,遊行人數唔算理想,但籌款情況卻反其道而行,埋單計數,守護公義基金單日收到一百四十萬以上捐款,民陣召集人區諾軒計過,除番開等如每個遊行參加者捐咗超過百五蚊,絕對唔係小數目。

市民熱心捐錢俾守護公義基金,有人專登準備定支票,亦有班人有另類準備,就係想用陰司紙塞爆個捐款箱,基金工作人員數過,全日總共收到十四萬零五百蚊嘅冥鈔,比例差唔多係真捐款嘅十分一。之但係,有留意開地府價格行程都知道,冥鈔動輒一張千萬元以上,因乜解究呢班人出手咁孤寒,捐得咁少?睇真啲,似乎係衰在用國貨囉!
話說呢啲由藍絲捐出嘅冥鈔,唔係我哋見慣見熟嘅本土冥通銀行版本,而係「人仔」,用一百蚊人民幣做藍本,發行方由中國人民銀行變咗做天地銀行有限公司,紅白雙色毛澤東肖像亦變成彩色玉皇大帝樣,簡單講,就係大陸版陰司紙;至於另一款就有番啲誠意,抄香港大牛五百元,但銀碼就變咗一千蚊,不過面額咁細,難怪加加埋埋都唔夠香港人嘅真金白銀啦!話時話,香港《刑事罪行條例》裡面,講明任何人將偽製紙幣交付另一人當真紙幣使用係違法行為,唔通呢班藍絲都想試吓公民抗命嘅滋味?




藍絲捐陰司紙都堅持要用國貨,捐大陸人仔版一嚿水冥鈔,出手咁低,唔通因為唔夠維穩費?


守護基金發起人之一鄭宇碩教授在遊行出發前,捧住捐款箱募捐,大家完全冇托手踭,結果為基金籌到超過百四萬;基金家陣有近二百萬,但同五百萬目標仲有段距離。 女人來自金星 林榮基頓悟了

銅鑼灣書店店長林榮基成為二○一六年十大新聞嘅主角之一,呢半年來佢接受訪問,多數都係講政治、時事、文學,但原來佢身為店長,都要睇流行暢銷書,睇完再介紹俾讀者。
其中一本佢印象最深刻,原來係講男女心理學嘅《男人來自火星,女人來自金星:男女大不同》。話說佢同太太有段時間成日嗌交,太太每次提出問題,佢就立即提出解決辦法,但太太都唔收貨,佢一直唔明白呢個枕邊人諗緊乜,「後來我睇完本書先明白,佢嘅目的唔係想我解決,而係話俾我知㗎啫。後期我完全明白,就由得佢講,就知道點應對。」
不過感情嘅裂痕唔係睇完本書就可以修補,加上因為書店事件,林榮基負了內地女友,佢依家感情落空,唔知仲有冇邊本愛情心理學嘅書幫到佢?




林榮基開腔講感情狀況,話佢最唔明白女人心理,所以成日同太太嗌交。(莫智謙攝)


呢本愛情心理學嘅書,教曉林榮基知道女人鍾意伴侶聽佢講嘢,多過鍾意對方幫佢解決問題。 逼上梁山 長毛選特首

星期日元旦遊行,長毛喺集會上講到特首候選人對於 DQ議員嘅取態,值得關注,仲講到如果政府繼續逼佢,佢就出嚟選特首,因為要親口問吓班候選人,根據何經何典去 DQ議員。此話一出,唔少市民拍爛手掌。
毛哥事後接受本刊訪問,提醒民主派三百多名選委喺提名同投票時,唔好有造王心態,亦唔好投票俾其他陣營嘅人。至於毛哥有冇機會做到「長特首」,佢就話若然佢通過公民提名方式取得民意授權,到時就要再睇民主派選委會唔會提名佢。
毛哥俾人逼上梁山先考慮選特首,但查實亦有民主派人士有意參選。《壹》仔上期訪問靠單一議題打入立法會嘅朱凱廸時,佢話其他候選人冇一個講關於環境同土地問題,如果自己有能力,會嘗試爭取提名選特首,用盡方法令市民認識民主,仲講到所有體制遊戲都要參加,既接受遊戲規則,又要改變遊戲規則。呢位立會票王雖然想再下一城,不過佢未夠秤,皆因佢今年三十九歲,選特首要夠四十歲。
喺特首選舉中成為關鍵少數嘅民主 300+,對於如何提名同投票都未有共識,嚟緊民主派選委喺月中開會討論唔同方案,包括是否以公民提名推薦民主派人士參選,不過由於兩名司長都未宣布參選,民主派依家傾向敵不動、我不動。




長毛唔只一次講過,政府再逼佢埋牆角,佢就選特首搞局。不過民主派對於佢參唔參選都有兩極意見。


票王朱凱廸由選立會到考慮參選特首,都係打環保同土地議題。可惜佢未夠四十歲,想選都冇資格。(高仲明攝) 本週圖片

預咗要還 大家睇路
今個星期,特首跑馬仔陷入一片悶局︰薯片叔仲未入得閘,特區奶媽依舊故弄玄虛,葉劉繼續自我陶醉……
網民 Siu Ming喺 Facebook分享一張圖片,仲話「吉之島理貨員咁有心思唔係唔影下嘛」。原來佢喺 Aeon發現貨架上大大隻「林」「鄭」嘅利是封,莫非理貨員真心想林鄭做特首?但睇真啲,旁邊仲有一盒利是封,寫住「預咗要還」,即係話,叫大家睇路呀!

撰文:巫不言
mailto:news@nextdigital.com.hk

 

tvb4life 發表在 痞客邦 留言(0) 人氣()