瑞典人對汽車性能一樣有要求, Polestar便是隸屬於 Volvo的賽車部門,活躍於 WTCC房車賽,並將有關技術投放於民用車上。限額生產的 S60 Polestar機械布局極之特別,兩公升四汽缸、雙增壓、四驅更是只此一家,量產車搵多部都冇,同朋友吹車經,無疑係絕佳話題。

壹號幹線

我冷傲,但我好熱血! Volvo S60 Polestar

贊助商連結

驟眼睇,再圍住呢部四門房車行個圈,發現離地距未算特別低;車身包圍又唔係特別誇張,除了隻鮮藍色真係幾 sharp之外,正常睇未必會聯想到同「高性能」三個字有關。
但要搞清楚,辣車並無民族國界之別,冰天雪地的瑞典,一樣有人對汽車性能有好高要求。
於是,一部由 Polestar賽車部門主理的特強版 Volvo S60,隆重登場。

低調快車

售價:$749,800
引擎: 1969c.c.,直 4;前置,四輪驅動;渦輪增壓、機械增壓
馬力: 367匹/6000rpm
扭力: 47.9kgm/3100-5100rpm
波箱: 8前速自動(附+/-模式)
長/闊/高: 4635mm/1866mm/1484mm
重量: 1751kg
耗油量: 7.8L/100km(公路及市區綜合計算模式)
0-100km/h: 4.7秒
極速: 250km/h
查詢: Volvo Cars HK
網址: http://www.volvocars.com.hk 

讚一讚:全城獨有高性能機械配備;底盤、懸掛調校上乘,強調駕駛質感;引擎輸出豐厚,潛力無窮。

彈一彈:駕駛模式選項太少;同級對手太多;車較重;唔係最快亦唔係最平,知音人另類選擇。



兩公升引擎要增強輸出,加 turbo已經係大趨勢,不過 Polestar部門還嫌未夠完美,索性加埋 super-charged機械增壓,連同全面改良的連桿、凸輪軸、進氣系統及油泵,馬力提升至 367匹,平均油耗才不過 7.8L/100km。個人意見,引擎膠蓋一樣太內斂,睇見唔興奮,建議向 Audi、 Benz取經。



車架結構強,開多個天窗位都無損剛性,面積只一般,但閒時曬太陽點都係有益,無謂抗拒吧。



Polestar專用鴛鴦皮桶座,重視兩側承托, driving position極理想,座墊厚又兼具支撐性,集 sport與 comfort元素於一身,劈住都咁歎。



後座都係鴛鴦皮加藍繡線,乘客一樣坐到血脈沸騰,而且空間合理又舒服,若然前面嗰位揸得斯文,其實仲好靜添。



波棍頭玩半透明水晶 feel,係靚係好有藝術氣氛,但個人認為,同高性能車不太搭配。



話晒都可以 4.7秒踩到 100km/h, S60 Polestar無疑係高性能車種,但調校上同德國同級車完全不同。力量上引擎 power好夠,任何轉數下都俾到豐厚扭力輸出,油門反應凌厲,加速力急激中保留線性層面,喉聲沉實不擾人。更特別在於操控,離地距雖然稍高,但避震 setting確係超班,柔韌中不失支撐,控制重心俯仰自然流暢,車架路訊亦高度傳真,四驅感強又大大提升攻彎信心,可惜車實在偏重,山路快劈會輸蝕點。



車廂布局仍停留在 S60於 11年投產時階段,自然不及「新鮮出爐」的 S90 high tech。但留心睇,碳纖修飾係 100%堅料;軚盤亦包上 Alcantara皮,又有藍繡線處理,識貨嘅,自然知非一般貨色。



三隻腳踏(連同 foot rest)都是鋁合金製,表面還鋪上大量防跣膠粒,自動波車,一樣好有 heart。



「單眼仔」儀錶大致維持原狀,轉速顯示加入紅光托底,務求增強辣味。



四支吸震筒由同鄉 Ohlins提供(非電子式,但可用工具調校硬度),識貨嘅人必定知係好嘢;唔識,唔緊要,話你知,過千萬嘅 Pagani所有車款都係使用呢個牌子避震。



原廠配 20吋輪圈及 Michelin Pilot Super Sport組合,煞車系統由 Brembo度身訂造,抓地性能及減速效能均正到冇得彈,若卡鉗噴成藍色的話,賣相會更討好。



據聞瑞典人性格內斂,睇嚟都似層層,尾翼及導流器造型都係點到即止,功能為重,浮誇免問。



尾箱 380公升容量,可翻低後座;還嫌未夠用的話,大可轉軚買旅行版 V60 Polestar。



醒多句: Volvo曾於 90年代以 850 Estate征戰 BTCC賽事,所以旅行車款一直深受車迷愛戴。除 S60外, V60 Polestar亦一併輸港,尾箱為更實用的 430公升,個人認為更加有型,俾多 5萬,依然值得。

撰文:廖宏俊
攝影/攝錄:方保山
mailto:features@nextdigital.com.hk

 

文章標籤

全站熱搜

tvb4life 發表在 痞客邦 留言(0) 人氣()