林鄭喺北京宣布促成香港搞老翻故宮,雖然唔使立法會批錢,但有冇影響其他馬會基金受助機構呢?

八卦陣

老翻故宮太大咬 食盡馬會基金一年收益

贊助商連結

盛傳上京為選特首投石問路嘅政務司司長林鄭月娥,今次上京先獲北京首肯,喺西九整個老翻故宮博物館,仲搵咗馬會慈善信託基金認頭三十五億元資助,可以繞過立法會唔使申請撥款。呢個老翻故宮,實情原來係霸王硬上弓。




馬會慈善基金由馬會盈餘撥捐,所以經濟好時就捐多啲,但一年都係得三十五億,係基金主要收入來源。

馬會慈善信託基金嘅收入,主要來自馬會從盈餘撥出嚟嘅捐款,基金而家有二百六十幾億元;不過睇番馬會年報,過去兩個年度,佢哋每年都只係捐咗三十五億元落個基金度,咁即係話,一個老翻故宮,就用晒基金一年嘅「收入」;更何況,馬會唔係每年都咁好景有咁多錢撥捐,好似一三年度,當時就只係撥捐咗十九億元。
其實,馬會慈善信託基金係唔少機構同組織嘅資金來源,資助緊超過一百四十個慈善團體同機構,惠及社會各階層;之但係過去十年,每年平均都只係撥捐約二十一億元,上年亦只係由信託基金捐出三十九億元。僧多粥少下,今年多咗個咁大食嘅故宮,唔知會唔會令一啲真•慈善團體成為犧牲品呢?

【信不信由你】天空出現彩虹唔係好兆頭


在玄學角度,彩虹的出現,代表不好兆頭。

上星期冬至,唔少人抬頭都見到天空有條好大、好靚嘅彩虹。查實,香港每年平均會出現二、三次彩虹;不過,若果以玄學角度嚟講,彩虹嘅出現,原來唔係好兆頭。
翻查天文台資料,○三、一三同一四年,香港出現彩虹嘅次數特別多,分別有五次、七次同四次,而呢三年,香港亦似乎特別 動盪。
○三年沙士襲港,死咗近三百人;一三年呢,香港電視發牌風波、劏房波囤地、劉夢熊妨礙司法公正被捕、張震遠商交所爆煲、前政府高官麥齊光、曾景文呃房津、前廉政專員湯顯明酬酢醜聞……至於一四年,就有雨傘運動、暴力黑警,仲有 689嗰單五千萬 UGL案。
玄學家周漢明話:「愈多彩虹嗰年,雨水特別多,雨水喺八卦裡面屬水,屬坎卦,坎卦代表不明朗……」不過,都係嗰句︰玄學並不是精準科學,信不信由你。

長毛單挑 胡官投降


毛哥成日挑戰立法會主席,查實十八年前已經喺法庭挑戰胡官,不知幾大膽。

梁振英早前再入稟要求法院 DQ四位民主派議員,包括長毛梁國雄、羅冠聰、劉小麗同埋姚松炎。雖然 689聲稱今屆唔會選特首,但毛哥就話其他候選人包括葉劉淑儀,同埋疑似候選人林鄭月娥、曾俊華,一樣係會聽晒北京話。咁公開講明當選後會將公民廣場鐵欄拆走嘅退休法官胡國興,究竟又會唔會聽民意呢?
經常出入法庭嘅毛哥,原來同胡官有段淵源。話說九八年毛哥喺前特首董建華出席《施政報告》答問大會時,喺公眾席喧嘩,違反《立法會(權力及特權)條例》第十七條,翌年五月法院裁定罪成,判監十四日,緩刑一年。
後來毛哥上訴,好有拉布潛質嘅毛哥自辯時大講偉論,時任高等法院法官胡國興當時截停毛哥,話已經知佢想講乜,叫佢唔使再講,點知毛哥就話佢手上有張紙,寫低咗下一句講乜嘢,如果胡官估到佢寫乜嘢,佢就唔再講。咁樣挑戰法官權威,換轉其他法官,可能已經嬲嬲豬,但胡官就俾毛哥繼續講落去。
不過,有得講都唔代表會贏,事關胡官嘅判辭話,《條例》「確保立法局內言論自由」嘅字句,並唔包括旁聽嘅公眾人士,所以當時仲未做到立法會議員嘅毛哥,最終上訴被駁回。

梁游預咗破產


梁游九月底做咗立法會議員,但幾句宣誓就令佢哋失去議席兼隨時破產。

梁游宣誓案最終上訴至終審法院,單計向終院提交嘅保證金、再加上律師費,同埋之前法庭判佢哋要兼付政府訟費;呢一役,梁游起碼要俾幾百萬。雖然青年新政開始咗眾籌計劃,但到而家都只係籌得四十八萬,距離五百萬嘅目標,仍差一大截。
「贏咗唔等於你一定贏得番個議席;輸,你就一定破產。」原來打從決定上訴,律師一早已經 warn咗佢哋兩個要有破產嘅心理準備。律師仲估計,若果最終上訴失敗,埋單計數應該要五六百萬。
不過,佢兩個心口掛咗個勇字,佢哋同《壹》仔講,話自己係民選代議士,甘願以自己嘅未來,守住香港嘅憲制。「如果我哋首先放棄嘅話,咁個閘門開咗,啲敵軍就會走晒入嚟,基於呢個原因,我哋無可能話因為個人財政、話因為驚破產、唔夠錢,就自己去放棄。」蕙禎 BB仲話,一旦放棄就會令香港政局兵敗如山倒,所以一定要堅持落去。

撰文:巫不言

tvb4life 發表在 痞客邦 留言(0) 人氣()