壹號幹線

新手•好身手  Jaguar F-PACE Prestige

贊助商連結

SUV熱潮都興了最少十年以上,每個牌子都總有一兩部看門口。
反觀積架,其開發 SUV步伐確實同英國人處事作風一樣慢條斯理,要到 2013年才鐵定有關方案,之後再等多兩年,終於,品牌建廠 70年以來,首部 SUV F-PACE正式面世。
然而,失先機兼夾遲起步的 F-PACE,雖然在 SUV界確係新手上路,不過認真揸落,原來分分鐘仲正過好多老前輩,遲來,或許可以先上岸。

SUV喺設計上好多規範,形態上點搞都好難同「有型」兩字扯上關係, F-PACE也不例外,其外形源於概念車 C-X17, 90%移植成為量產版,車頭是積架新家族面譜,車尾更有類似 F-Type的線條,第一眼望落確實係比時下主流車種多一份特殊優越感,足叫人心動,然後乖乖(俾錢)行動。

入門好跑得

售價:$698,000
引擎: 2995c.c., V6,機械增壓;前置,四輪驅動
馬力: 340匹/6,500rpm
扭力: 45.9kgm/4500rpm
波箱: 8前速自動(附+/-模式)
長/闊/高: 4731mm/2070mm/1652mm
重量: 1820kg
加速: 0-100km/h, 5.8秒
極速: 250km/h
耗油量: 8.9L/100km(公路及市區綜合計算模式)
查詢:積架汽車
網址: http://www.jaguar.com.hk 

讚一讚:睇樣已夠品味;身懷跑車引擎,出奇跑得,走彎姿態毫不累贅,一直嫌 SUV操控乏味的,試完保證你另眼相看。

彈一彈:設備未算極豪華,前座不設氣壓微調,兩側偏闊;後座舒適,不過空間並非同級最強。



廠方決心要將 F-PACE打造成「好飛得 SUV」,所以入門型號已經採用這台 3.0公升 V6 supercharged引擎,輸出是有震懾力的 340匹, 0-100km/h加速更加是跑車級別的 5.8秒。這台機器最叫人佩服是力量來得快而狠,扭力遞增富有刺激性,頭中段加速力尤其凌厲,而且喉聲 tune得十分進取,愈踩愈過癮。



積架無錯係 SUV新丁,不過同集團 Land Rover早已有能力造出「好揸好 feel高身車」,問題不難克服,但為了讓新車揸落零舍與別不同, F-PACE車架 80%為鋁合金製,前懸掛更是採用只常見於跑車的雙搖臂,配合全電子化的四驅分布系統(可從 0:100調至 50:50),可感覺到車架異常硬淨,有恰好的抗傾能力,在窄彎中既有後驅車的靈活,亦帶有四驅車的高速穩定性,路感交代清晰,真心有樂趣、真心劈得!

 




前座造型似乎幾辣,可惜只得電控卻欠氣壓微調。我背脊唔夠厚,膊頭又唔夠橫,兩側包身度一般。另外,門窗掣奇怪地安置於門壁頂,操作不太就手,請慢慢適應。


車廂布局似 XE系,入門版用料及設備上未算相當豐富(點都有 touch-mon、雙區冷氣、多功能軚盤、電子手掣、尾 cam……),全黑內籠睇落單調,其實座椅已採用鮮色縫線,英國人,作風始終是含蓄點。


儀錶並非全電子化,「孖筒」設計亦頗悶蛋,好彩中央屏幕提供不少資訊,總好過冇。 

被 F-PACE視為勁敵的包括有保時捷 Macan、平治 GLC、寶馬 X3以及奧迪 Q5等,坦白講部部都有一定實力,要戰勝有難度,不過假如鬥大部的話, F-PACE車長和軸距都全面擊倒對手,心理上總會覺得抵買些啩!



若經常玩水上活動, Activity Key是無可抗拒的窩心項目。當佩戴上「手錶」(實際無任何顯示)後,可將車匙留於車內,然後把手腕貼近車尾 JAGUAR徽章的 J字便會自動鎖車(解鎖方法相同),其設計防水防塵,更毋須充電,實用好設計。

 




後座冷氣風口不設恒溫控制,但下方設有兩組 USB及 12V插座,計落仲有賺。


19吋輪圈(原裝 18吋)要額外俾錢,未必一定改善到操控,不過坦白講, F-PACE襯大軨,無疑係靚仔好多。


天幕面積頗大,但留意電動遮光簾一樣都會透點光,若怕曬,請三思。


後座空間並非同級最強,不過勝在坐得舒服,示範車裝有電動背墊角度調校,坐姿更歎更似大爺。


SUV尾箱最緊要好使好用,正常 650公升容量仲有電尾門,後座能作 40:20:40分割,最盡可擴充至 1740公升,尾簾亦可獨立拆除,要讚。


8速「波餅」操作易適應,下方是行車模式切換掣,飛山抑或撈泥,悉隨尊便。 醒多句:

輸港 F-PACE另有更高級的限量版 First Edition,相同引擎但輸出提高至 380匹,車身內外設備均更為高級,香港配額僅得 17部,售價$1,168,800。
另外,關於後驅版的 F-PACE,代理回覆:不會引入。

撰文:廖宏俊
攝影:方保山
mailto:features@nextdigital.com.hk

文章標籤

tvb4life 發表在 痞客邦 留言(0) 人氣()