next1.jpg


17/5落到大堂,謝昭平探頭向外望,確認安全,兩人才行出酒店,尾隨的袁嘉敏就笑得相當開心。

娛頭

飛甩鬼佬 速上金融猛人 袁嘉敏:我同佢冇搞過!

Ads by Google

去年袁嘉敏撻着 37歲有米老外 Kenneth,拍拖八個幾月,上月初她主動攤牌分手。原來男友每次被影到,都會大發脾氣, Candy覺得太大壓力,決絕斬纜。不過,呢頭甩拖,袁嘉敏已同身家億計的金融猛人謝昭平 Kenny約會。
直認與老外分手的袁嘉敏,坦承有唔少追求者,更與前度劃清界線,表示同 Kenneth並無親密關係。「我同佢冇搞過!最多都只係錫嘴!」

酒店開飯好好傾

去年十月,袁嘉敏搭上家族做紡織生意,在歐洲開酒店的有米老外 Kenneth,兩人坐電單車去淺水灣開餐,隔住頭盔嘴,食住飯又不停嘴,相當肉緊。
不過,本刊最近發現,袁嘉敏飛甩男友,與本地投資界猛人、 Aetos Capital中國區負責人謝昭平( Kenny)有來往。上月中(五月十七日),袁嘉敏一個人坐的士到中環,之後上了 Pottinger Hotel三樓一間餐廳,而西裝筆挺的謝昭平早已在座。
晚飯期間,大部分時間也是男方講,女方聽,邊食邊傾到十點幾才埋單。之後兩人同上了一架在樓下等候的七人車,轉場去蘭桂坊。
原來人鬼戀幾個月前已降溫,上月初,袁嘉敏更主動向男友提出分手。




離開酒店,袁嘉敏上了謝昭平的七人車,轉場再玩。


同鬼佬熱戀時,去到邊都狂打茄輪。


拍《鴨王》變性感女神,袁嘉敏稍後會推出超激寫真。 私隱被侵犯

「 Candy本來好投入呢段感情,不過 Kenneth好多生意,又係工作狂,一個月有二十日都唔喺香港, Candy自己亦經常返內地做嘢,大家見得少,感覺愈嚟愈遠!」袁嘉敏身邊人說。
另外, Kenneth也十分大男人,加上外國人作風,認為見報是侵犯個人私隱,久而久之,埋下分手伏線。
「香港拍拖來去都係嗰啲地方,容乜易俾人影到,而家响條街個個都揸住部機㩒㩒㩒;但佢男友好唔鍾意,每次拍拖俾人影到就發老脾。佢唔識睇中文,但身邊啲香港朋友會翻譯俾佢聽, Kenneth覺得自己唔係圈中人,更加不滿傳媒寫嘅嘢,覺得被騷擾,所以成日同 Candy有拗撬!
「 Candy壓力好大,後期連人多地方都唔敢去,出街要揀啲偏僻地方,咁樣拍拖,點可能開心!因為怕 Kenneth唔鍾意,佢連公開活動見記者都唔敢提起男友。」




擅長錢搵錢的謝昭平,話題離不開投資,袁嘉敏呢餐飯,賺晒!


袁嘉敏當晚打扮唔算性感,但不時搔首弄姿,一樣惹火!


本身是馬主的謝昭平,不時現身馬場。 大半年冇搞過

兩個人相處,要步步為營,身心俱疲的袁嘉敏,開始失去耐性。
「其實成個三月 Candy都返咗內地開工,拍咗一部內地電影;四月返香港,同 Kenneth提起傳媒寫佢嘅嘢,兩個又嗌交! Candy覺得好困擾,因為大家文化思想唔同,問題亦解決唔到,佢好辛苦,所以五月初同男友講分手,叫 Kenneth唔好再搵佢!」袁嘉敏身邊人說。
向袁嘉敏求證與男友分手一事,她直認不諱。
「要成日等一個人返嚟,幾辛苦,依家做番朋友,冇咁大壓力!」
不過,袁嘉敏卻強調,自己與前度從無親密關係。
「我哋冇搞過!最多只係錫嘴!佢冇去過我屋企,而我都冇去過佢屋企,大家見面只係食吓飯行吓街,傾偈可以傾幾粒鐘!
「(一齊大半年都冇進一步關係?)佢同我都係比較傳統,會建立穩固基礎先做其他嘢!」
吓!唔怪得嘴都戴頭盔。




25/5袁嘉敏約埋做化妝師的男性友人去剪髮,之後再一同開餐。





鬼佬 Kenneth唔鍾意上娛樂版,但去年十二月卻拖住女友去 Play開幕 party,原來是撐自己生意朋友,雙重標準!


在寓所外接受訪問的袁嘉敏認甩拖,更強調同鬼佬大半年只係去到拖手、嘴嘴,冇上床搞。 有兩個細路


袁嘉敏好搶手,內地登台及商演接唔停。

至於與投資界猛人謝昭平約會,自認多人追的袁嘉敏否認對方是其中之一。
「嗰日只係咁啱一齊食個飯!冇其他嘢!佢屋企仲有小朋友,唔好影響到人!」袁嘉敏緊張說。

無寶不落

袁嘉敏幾年間由劏房住到上半山,唔簡單,所以身邊出現的異性,絕非等閒之輩。



投資界猛人
曾在摩根士丹利擔任董事總經理的 Kenny謝昭平,先後做過唔少大行,是著名房地產分析師,近年他轉到跨國物業投資公司 Aetos Capital擔任亞洲董事總經理,做過百幾億中國樓市房地產對沖基金,擅於投資。謝昭平先後在香港買賣超過十個以上物業,由幾百萬到幾千萬都有,現時手上冇磚頭,但身家億計。



酒店闊少
前任老外男友 Kenneth De Trazegnies,是意法混血兒,在比利時長大,家族做紡織生意,是宜家傢俬其中一個供應商。 07年, Kenneth隻身來港,九龍灣有自置 office,並持有市值四千多萬何文田半山一號單位自住,各地都有生意的他,在比利時有投資開酒店。

露點脫貧

現年 31歲的袁嘉敏,在澳洲墨爾本大學修讀傳理系,香港大學文學士畢業,初入行是做電影發行,曾在陳可辛的公司任職, 09年選香港小姐,是老闆娘吳君如做提名人,得「最上鏡小姐」後簽約無綫做主持,成為經理人合約藝人,不過演出劇集不多,最為人識是在《潛行狙擊》中演情婦。
離開 TVB,袁嘉敏才有運行!去年接拍王晶《鴨王》露點成功脫貧,由租住中環山腳愈搬愈高,近年在內地登台不斷吸金的她,稍後計劃推出超性感寫真。

撰文、攝影、攝錄:娛樂組

tvb4life 發表在 痞客邦 留言(0) 人氣()