Moei精心製作獲金獎的走馬燈蛋糕(左)。她創業兩年,接過 Pandora、 Shiseido等大公司訂單,謝安琪有兩年的生日蛋糕都由她做,趙頌茹、陳瀅等明星也有跟她上課。

坦白講

整色整餅

Ads by Google

Moei, 27歲,糖花蛋糕設計師。兩年前唔做空姐,獨自開蛋糕工作室,在香港及台灣開班教人,亦會接訂單做生日和結婚蛋糕,特點是用人手精製,把不同類型的糖變成不同顏色的蛋糕花紋,每個售千元以上。
她近日贏得英國一年一度國際蛋糕比賽( Cake international)金獎,在一百位世界各地參賽者中脫穎而出。

我今次得獎嘅蛋糕,係一個中國燈籠,由構思到成形足足用咗大半年。蛋糕骨架用曲奇餅做,外皮係透明質地嘅糖,喺上面畫水墨畫和寫書法,裡面放咗盞燈,就變成一個走馬燈蛋糕。全場得我做到呢個效果,評審因為咁而俾金獎我。
我個花燈側邊仲有個糖繡球花,每一組需要百幾塊花瓣,總共整咗七百幾塊,我逐塊逐塊用人手壓出嚟再上色,更有漸變效果。整花瓣最麻煩,因為乾咗之後會好似薯片咁脆,搭飛機途中都爛咗幾塊,我就帶埋材料到英國補做。
有啲人訂糖花蛋糕只係貪佢靚,攞嚟影相當擺設,唔會食。我有個幾層嘅糖花結婚蛋糕,擺咗兩年都未溶。要保住個蛋糕,夏天要長時間開冷氣和抽濕機。做蛋糕也有好多技巧,例如糖就有七至十種,每款唔同質地,我更加自創咗一種糖,叫 Moei Sugar Paste,能夠做到紙巾咁薄,方便我做花瓣。
由零開始自己設計,到一手一腳整個蛋糕出嚟,好有滿足感。試過有客人叫我,照住張相整個蛋糕,但我唔鍾意有呢啲限制。每個蛋糕都係我精心做出嚟,我整過最貴嘅,係一個萬幾蚊嘅七層結婚蛋糕,就好似一盆牡丹花。

天空

我以前做空姐,飛完一輪喺酒店休息,第二日諗去邊度玩。返屋企後,休息幾日先再返工。不過做咗四年,覺得每日都派餐、收餐,好悶。我利用放假時間學整糖花蛋糕,之後有朋友跟我訂,我就諗係咪可以發展成事業。當時我剛升職,但我好清楚自己唔想要刻板生活。
初初創業乜都唔識,好驚賺唔到錢,一有單就接,試過連續兩、三日,不眠不休咁做,最多返屋企沖個涼後,又返嚟繼續做。當時每日不停整一模一樣嘅花,工作室得我一個,做到對住啲蛋糕喊,好大壓力又脾氣暴躁,抑鬱咗成個月都唔知。康復後,我就接少啲單,唔想再有情緒病。不過經歷創業嘅困難,令我由一個飯來張口嘅女仔,變得更獨立成熟。
我投資咗近五十萬元搞工作室,開咗一年已經回本,不過我無賺大錢。最開心,係唔做空姐,都可以有自己嘅一片天空。

撰文:關卓凌
攝影、攝錄:高仲明
mailto:news@nextdigital.com.hk

 

文章標籤

全站熱搜

tvb4life 發表在 痞客邦 留言(0) 人氣()