何君堯九年前干犯不小心駕駛罪,出庭時承認冇跟路牌右轉,係違反道路標誌,但唔等同有不小心駕駛,咁都得?《蘋果日報》圖片

眾人諸事

交通案歪理自辯 何君堯習慣性死撐

Ads by Google

律師會前會長何君堯最近喺法院範圍自拍,被網民圍插知法犯法,留言問佢個牌係咪淘寶淘番嚟。佢事後死撐冇違法,話影相純粹抒發感受。記者發現,原來何律師九年前已有死撐前科,涉及一宗不小心駕駛案件。


司法機構已將法院自拍事件轉交警方跟進,何君堯話警察未有聯絡佢,並拒絕回應事件,認為依家講呢啲無補於事喎。(何君堯 facebook圖片)

案發於○七年三月十日下午,時任律師會副會長嘅何君堯揸車返屋企途中,喺干諾道西西行線,路牌指明要右轉入中景道,點知佢直行,搞到左線直行嘅的士被迫煞停,好彩冇撞車,但被後面騎警發現斷正。
何律師出庭解釋話,明知左線先可以直行,但認為左線好多車,「我猶豫咗一陣,直覺唔想轉右。」就繼續直行,反指的士司機無小心留意交通情況,應預期有人唔遵守交通標誌。咁解釋法,裁判官梗係判佢輸啦,佢之後上訴,高院法官一樣唔接納佢嘅理據。有律師搵番案件判詞出嚟翻佢舊賬,笑佢連不小心駕駛嘅基本原則同定義都矇查查,仲執迷不悟上訴,浪費納稅人金錢。
記者問過何律師呢件事,佢第一句就話「好多時都有不小心駕駛嘅嘢發生」,堅稱當年有理據,最緊要係努力為理念去爭取,喺法庭施展渾身解數辯論,佢自稱有體育精神,接納法庭裁決,呢個就係香港人精神。明白晒嘅何律師,記者上淘寶網睇吓先。
《明報》呂家明下旨「封天窗」
《明報》總編輯鍾天祥以削減開支為由,兩星期前炒咗執行總編輯姜國元,引起公憤,連續幾日都有專欄作家「開天窗」抗議。不過最騎呢嘅係《明報》加東版竟然用漫畫大師豐子愷嘅作品「封窗」,下款仲變咗做作者名字嘅諧音「愚若微」、「吾子心」、「塵識之」,做法非常小學雞。
記者打聽到,加東版兩名編輯部管理層都唔敢刪改專欄嘅稿件,兩星期前香港《明報》第一日開天窗,編務董事呂家明捉住該兩名高層睇住專欄個版傾嘢,然後其中一名編輯好緊張咁攞住個版入去排版部,結果翌日出現封窗事件,估計好大機會係呂家明落柯打。
呂家明一四年七月主理香港《明報》期間,曾繞過編輯部既定程序,以自己方式將頭版有關七一遊行嘅標題改版。今年初呂家明參加中國駐多倫多總領事館聯誼活動,佢話會「配合形勢發展」,加強同總領事館嘅合作。唔知佢想配合大陸啲咩形勢呢?

香港《明報》專欄作者為撐姜國元而開天窗,但《明報》加東版則被「封窗」,嚟自遠洋嘅消息指相信係呂家明落柯打,因為當日佢拎住開天窗個版同編輯部傾咗一輪。

一四年初,《明報》編務董事呂家明(中)力撐鍾天祥(右)做老總。
列陣不成 參選人單拖去馬

本來「眾志」同「列陣」喺五區合作選立會,例如眾志嘅羅冠聰(左)去港島,列陣嘅岑敖暉(右)去九西,但岑敖暉唔想領軍,想做支援,所以唔會出選,只為其他人站台。《蘋果日報》圖片

之前有傳土地正義聯盟朱凱迪、小麗民主教室劉小麗等人將組成「香港列陣」,出選九月立法會選舉,但一直只聞樓梯響,更加有指學聯前副秘書長岑敖暉決定棄選九西。
最新消息話,岑敖暉唔想以領軍角色參選,而係想做支援,所以佢仍會為朱凱迪、劉小麗站台拉票,小麗會返「老巢」九西,皆因佢喺傘後一直喺九西舉辦小麗民主教室或桂林日市等社區活動,吸納到唔少中年人或者上咗年紀嘅群眾。
功能組別方面,舊年挑戰中西區區議會敗選嘅傘兵伍永德,九月有意參選飲食界;中大地理與資源管理學系副教授姚松炎則放棄申請續約中大,或參選建築界;而一直積極呼籲體育、演藝、文化及出版界人士登記功能組別選民嘅音樂監製周博賢,則對本刊表示正考慮參選該界別。
組成「列陣」出選原來係佢哋最初嘅諗法,查實各人主要以個人名義宣傳同拉票,亦繼續同有共同理念嘅人商討點樣合作。各人都有本身特色,唔用組織捆綁模式參選,可能發揮空間更大。
光復行動撻 Q 陳雲金金雙贏
多個本土派團體包括北區水貨客關注組,趁五一勞動節假期發起「光復上水」行動,但臨門一腳俾關注組發言人「金金大師」梁金成煞停,話收到風有陳雲支持者滲透,驚有人搞事演變為年初一旺角衝突場面,究竟滲透有幾真?
本刊事後搵番「金金大師」問個究竟,佢話上週六晚見到陳雲喺 facebook出文,透露有人會混入行動人群中搞事,呼籲支持者唔好參與,大師本來不以為然,但當日起步前幾分鐘再收到消息,所以最終決定安全至上。
不過,光復行動撻 Q更加可能係同立法會選舉有關。「金金大師」週日自爆有意九月出戰,估計揀喺自己地頭新界東出選,但同陳雲撞區,難怪光復行動流產,「金金大師」順水推舟將矛頭直指陳雲,但有陳雲支持者認為「金金大師」係想抹黑政敵;不過,陳雲「成功爭取」光復行動取消,同樣獲支持者認為係佢神機妙算,結果雙方各取所需。

反水貨示威者得幾丁友,但現場有幾十個警察,難怪「金金大師」(右圖)覺得勢色唔對取消行動。(莫智謙攝)

撰文:巫不言
news@nextdigital.com.hk

全站熱搜

tvb4life 發表在 痞客邦 留言(0) 人氣()