壹號幹線

獸性釋放! Lamborghini Huracá n LP 580-2

Ads by Google

話跑車係高級消費品一定冇人會反對,而通常的潛規則都係:「愈俾得多錢就愈換取更高性能!」但偏偏,平足 60萬,刪除四驅變後驅的 Huracá n LP 580-2,反而仲正仲刺激。

 

買跑車,點都要提提數據,與四驅版 610-4(前數字為匹數,後數字為驅動模式)比較, 580-2雖採用相同引擎,但為遷就後驅駕駛特性,動力刻意調低 30匹及 2kgm扭力,而且拆除四驅裝置後亦令前後比重由 48:52變成 40:60,不過車重大減 33kg, 0-100km/h及 0-200km/h只慢了 0.2秒( 3.4秒及 10.1秒),極速亦由 325km/h變成 322km/h,但其實 99%車主都難以揸得出有乜分別,再者, 580-2的真味,操控遠勝速度。
最緊要好玩
售價:$3,580,000
引擎: 5,204c.c., V10;中置,後輪驅動
馬力: 580匹/8000rpm
扭力: 55.1kgm/6500rpm
波箱: 7前速雙離合器附+/-模式
長/闊/高: 4459mm/1924mm/1165mm
重量: 1389kg
耗油量: 11.9L/100km(公路及市區綜合計算模式)
0-100km/h: 3.4秒
極速: 322km/h
查詢: Lamborghini Hong Kong
網址: http://www.lamborghini-hongkong.com

讚一讚:指向感癲準繩,尾轆動態生鬼,專為彎路而設的另類林寶。車價平一截,樂趣高一班。
彈一彈:外形改動太輕手,唔講唔知唔覺係後驅版;駕駛技術要求較高,「生手」免問。


意大利人素來作風都是「靚嘢就唔需要再改」,所以車廂 0%改動亦好合理;再望真啲,裝嵌手工有同系奧迪一貫嚴謹水準,嫌未夠辣的話,原廠有大量碳纖飾件恭候。


ANIMA駕駛模式亦針對後驅設定重新調校,對應 Strada(街道)、 Sport(運動)及 Corsa(賽道)模式。其中 Sport及 Corsa只會保留 60-70%的循跡系統介入,後軸於呼油出彎時較傾向外移(甩尾),自問技術一般,或是不熟救車程序的,還是長着 Strada為妙。


一件過車製成的鋁合金撥片,既有設計亦不失功能性,不會跟隨軚盤轉動的用意,是要駕駛者入彎前做好降檔動作。


12.3TFT虛擬屏幕能切換成多種操作模式,毫無 time-lag情況,要專注睇轉數、睇速度抑或睇導航,隨你話事。


前 8後 4活塞卡鉗,配鑽孔通風金屬碟,當然可加錢變陶瓷碟,不過行街其實已夠停有餘。另外,為加強走彎靈活性,輪圈亦由 20吋改為 19吋,胡亂為靚換大軨,未必係好事。


除前氣入風位重新設計外(變成上下兩層),尾燈下散熱網亦改為蜂巢狀,不過一般人都係好難辨別。


座椅坐落夠包身又舒服,車身同色車線亦都係「低調型」的高明設計,若想再坐得穩陣點,中央部分可換成 Alcantara物料。


極「玩嘢」的波箱槽, M(手動模式)及 P都是按掣式, R波卻要像手掣般抽起整個銀色扳手才進入;至於參考戰鬥機揭蓋着偈的 engine-start鍵,若你指頭細的話,其實直接㩒掣都得。


正當法拉利及保時捷都轉投 turbo陣營,林寶仍堅持以自然吸氣引擎作動力核心,其實各有各好處,冇話邊個至係絕對正確答案,不過純講把聲,自然吸氣引擎在高轉下,真係嘶叫得轟烈好多。


交車標準就係呢塊黑色引擎蓋,幾靚都好,出面睇唔到副靚偈就「勢係假」,價值$140,395(連稅)的玻璃引擎蓋連碳纖引擎艙修飾 kit,點都唔慳得。


講性能,四驅版 Huracá n無疑較強,走彎俾到你無比信心及穩定性,只要控制好速度,幾乎乜彎都殺得入。
至於平足 60萬的後驅版,感覺好唔同,最明顯分別是車頭負重輕好多,指向反應更敏感又直接,若出彎前提早俾油,後軸迅即向外橫移,以龐大扭力「甩住」幫手推部車出彎。坦白講玩味及刺激性都比四驅版濃厚好多,但要揸出真味,就好講求油門、轉向以及制動時重心轉移的互相配合,技術要求高,真正「上級者向」超跑。
談談後驅細牛
Huracá n前身 Gallardo亦曾推出過後驅型號 550-2及 560-2,其中最有紀念價值可算是專為向退休試車員 Valentino Balboni而致敬的 LP 550-2 Balboni特別版。另外,落場版 LP 620-2 Super Trofeo亦是採用後驅布局。

撰文:廖宏俊
攝影、攝錄:方保山
features@nextdigital.com.hk

文章標籤

tvb4life 發表在 痞客邦 留言(0) 人氣()