中環人語

認清福布斯

Ads by Google

年僅廿五歲的賭王四太梁安琪女兒何超盈,入選了財經雜誌《福布斯》 2016最矚目亞洲女強人之一,香港區唯獨她一人,認真威水。

 

活躍股壇的任德章,曾任保良局總理及仁愛堂董事局主席,前年夥拍台灣華碩創辦人之一謝偉琦的財團,以四億美元買起《福布斯》。《蘋果日報》圖片

不過,今天嘅《福布斯》已非屬於福布斯家族所擁有,《福布斯》早於二○一四年易手,買家是股壇猛人任德章牽頭的財團本匯鯨媒體,換咗老闆,近年當選《福布斯》的 50位商界女強人,「澳門味」亦漸濃厚,四太梁安琪多次入榜,殼后「朱太」亦然,仲有鄭家純個女鄭志雯亦榜上有名。所以話,邊個話紙媒唔值錢,任德章個財團以四億美金買起《福布斯》,分五至七年付款,雖然雙方就着支付利息仍對簿公堂;每年以《福布斯》個朵選吓商界人士入榜,皆大歡喜,好過鍍金,呢種榮耀,有錢都買唔到㗎,四億美金,抵吖!
一億八谷唔起快樂
由老董、梁愛詩和鄭維健牽頭成立嘅團結香港基金,去年十月成立,當時香港班闊佬都踴躍捐輸,每人三球,有成六十名闊佬扲荷包,共一億八。被人揼完心口,有些闊佬都好關心到底團結基金過去做過乜呢?啲錢又點使呢?小宗睇過團結基金嘅公司註冊章程,嗱,其中一個目的係 promoting the harmony, feel-good factors and improving the happy planet index of the people of Hong Kong。以 Happy Planet Index( HPI)地球開心指數計數, 2014年香港喺 151個國家之中排第 84,最新排行為 102,咁即係肥佬囉!有數據你參考。咁又難怪班闊佬有嘢講,錢就捐咗,香港人冇 happy咗喎。

鄭維健(左)、梁愛詩(中)及董建華(右)是團結基金的創辦成員。

團結基金辦公室由南豐大廈十一樓搬上十九樓,物業由南豐集團持有。(關永浩攝)
中環寸嘴:要大大聲叫莫 auntie
工廈大王楊耀松長子,游走高級酒店、銀行,及知名食肆,與各路人士打交道,自認有 jet set生活方式,透過美酒佳餚,察看人生百態,把「生平絕學」不吐不快與粉絲分享。
嗰晚落去「家傳七福」食飯,咁啱撞正莫 auntie(註:已故股聖莫應基二太太莫何少貞),見到長輩怕佢撞聾,我梗係大大聲震驚全場走上前叫「莫 auntie」,咁先顯得佢仲有江湖地位。莫 auntie都認得我呢個「楊仔」,莫應基貴為香港交易所主席,都係上一代中環寸人,日頭去文華中菜廳,夜晚就去福臨門,成功人士莫 uncle梗係有啲「娜啦」,如果唔係點做歷屆滙豐大班嘅御用經紀呀?莫 uncle不時請我哋𡃁仔食飯,等兩代人交接好啲,佢股票行咪實有生意做嘛。
「家傳七福」唔知係咪人手唔夠,出菜甩甩漏漏,食到我趕頭趕命,夜晚去灣仔老上海食消夜先掂,好耐都冇去過老上海,要 update吓。以前呢間嘢叫老正興,沙士之後老正興班伙記同李明治個女一齊做先改名叫老上海,吖!俾我喺個酒櫃𥄫到「自調」香雪花雕,二百二十蚊,平過天香樓三倍呀!攞嚟啷吓口都抵啦!雖然唔係大閘蟹季節,門口個雪櫃「空寥寥」唔夠氣勢喎,放幾樽酒糟,湯圓盒都放多啲。裝吓假狗嘛!

楊國佳

自調香雪花雕,$220,啷口都抵。

莫 auntie(中)都識飲識食,開咗支 White Burgundy,好嘢嚟㗎!
大浪西翻版
唔少金融界人士都羨慕 TVB主席陳國強,經常有明星相伴,閃閃生輝,最近傳出他想買起清水灣騎術學校塊地,擬建私人直升機坪,學得蒙古能源主席魯連城,喺大浪西整個私人後花園咁。小宗打聽過,啲地產經紀確實去「搵」過陳國強,但呢單交易都唔容易做。話說,騎術學校涉及六幅地皮,當中最大份係由一間叫 CWB Land Ltd持有,當中股權都幾分散,既有英國醫生、愛爾蘭商人,又有澳洲銀行家,要傾得成都唔係咁易,咁,騎術學校暫時都可以保得住,否則又成為大浪西翻版。

陳國強(右)任 TVB主席後,出入都有星相伴,羨煞不少金融界人士。

清水灣騎術學校位於龍蝦灣,是居港外籍人士的世外桃源,佔地六萬平方呎。(林志謙攝)
(宗菁華)

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()