阿 Bun(左)、楊英偉(中)負責諗橋和對外溝通, Wilson(右)就專責扭波,三個人分工合作,鮮有爭執。

壹盤生意

扭波贏「奧斯卡」  Party planner友情價吸生意

Ads by Google

扭氣球,一直都被定位為小丑工具,用來氹小朋友開心,難登大雅之堂。直至今個月初,有港人參加世界氣球大賽,贏到冠軍。原來扭氣球,不單只普通扭花、劍、狗的造型咁簡單。
今次的世界氣球大賽其中一個參賽港人彭思泰( Wilson),在一年多前
和朋友楊英偉和潘景恒(阿 Bun),合力創辦 Surprise Party Planner,將氣球布置當作壹盤生意。 Wilson高超的扭氣球技術,開業一年幾,憑荔園的氣球動物園、貿發局的花車巡遊等大型活動,聲名大噪,風光背後,原來他們並非個個月有生意做,今年頭三個月更食白果,但他們深信,氣球展覽生意有得做,只是發圍時機未到。

 

 

Wilson和隊友以希臘神話「海王」為題材,用氣球扭出霸氣的海王,配以燈光和音效,奪得世界氣球比賽的冠軍。

世界氣球大賽,相等於氣球界的奧斯卡,每兩年一屆, Wilson和隊友今年以「海王」出賽,在音效和燈光的配合下,勇奪冠軍。然而, Wilson未成為氣球師之前,是一個魔術發燒友。六年前,他仍是一個讀 marketing學生,發現自己對魔術有濃厚興趣,故一邊讀書,一邊開設自己公司,售賣魔術用具和教人玩魔術。畢業後,順理成章,成為全職魔術師,後來更因魔術這個喜好,認識到楊英偉和阿 Bun兩位知音。
「當時我去 Wilson公司買魔術道具,發覺呢個人都幾好禮貌,又靚仔,所以咪推介俾楊英偉認識。」阿 Bun無諗過,三個人見面後相當投契,食大牌檔時隨口講一句:「不如一齊開間公司。」之後就每人夾三萬蚊,兩個月後,三人借用楊英偉在牛頭角的一個工廈單位作為公司,開設氣球布置公司。
荔園氣球動物園起朵
香港地,生意難撈,三位老闆都深明這個道理,故身兼多職, Surprise Party Planner只是他們其中一門生意。楊英偉和阿 Bun,一個是 TVB和 HKTV前藝員,又身兼舞台劇演員,另一個是舞台監製和創作總監,憑住二人的人脈,負責幫公司搵客接生意、對外溝通和諗橋; Wilson則專責畫設計圖和扭氣球。兩位拍檔笑說:「我哋扭波只是處於理論層面,完全唔識扭,我哋都想學㗎,但 Wilson成日都收收埋埋,可能怕教識徒弟無師傅啦!」雖然 Wilson要一個人扭晒所有氣球,但他享受扭氣球的過程,亦絲毫無埋怨拍檔唔識扭。
去年的荔園氣球動物園,正正是 Surprise Party Planner的代表作,亦是靠楊英偉的人脈傾回來的生意。「我三、四年前幫過邱達根的仔女搞生日會,所以今次佢搞荔園,都有搵我幫手,我就向佢 sell氣球展覽。」這個氣球動物園佔地約二十米乘二十米,用超過六萬個氣球扭成,有各種氣球動物擺設。原來,當時在製作上遇到不少的困難。 Wilson憶起當時的畫面,「嗰陣我哋只有三日時間,要扭好晒所有動物,只好日以繼夜咁扭。加上天氣熱,當時帳幕的溫度較高,令不少氣球容易爆開,所以我哋都要不停補。」由於 Surprise Party Planner沒有僱用任何員工,舉行大型的氣球展覽時, Wilson都會臨時請一班「師奶兵團」作為助手,她們都是曾經跟 Wilson學扭氣球的學生,荔園動物園就請了二十多位學徒,同 Wilson夜以繼日不停扭氣球。

氣球布置的生意,最重要的物資就是氣球。
在 Surprise Party Planner內,有多個長身的高櫃,每個小櫃桶都裝滿不同尺寸和顏色的氣球。

Surprise Party Planner曾經幫荔園搞過
「吹脹動物園」,由於天氣不穩,他們要在三日內趕工,用氣球砌成各種動物。

Wilson每次扭新的氣球公仔時,都會先繪畫設計圖,預計要使用邊種 size和顏色的氣球,才會真正落手去扭。
缺乏宣傳途徑

楊英偉是 TVB和 HKTV前藝人,人脈廣之餘,亦好有諗頭。他認為氣球不單只可以用作場地布置,亦可用作粵劇製作。圖中他所佩戴的是粵劇常用的鳳冠。

去年, Surprise Party Planner接過近十個不同的氣球 show,有貿發局的花車巡遊,為巡遊小朋友製作氣球衣服;亦曾幫港大教授辦氣球生日會,氹得一班大人、細路的歡心。雖然 Wilson扭氣球扭到出神入化,惟今年 Surprise Party Planner卻食白果,生意慘淡。記者發現, Surprise Party Planner除 facebook和媒體報導外,並無其他宣傳途徑,就只靠楊英偉和阿 Bun的人脈去搵生意,有時又會俾「友情價」,每單生意有時只是賺一萬幾千,生意自然難做。
而今次 Wilson獲獎後,或許是一個契機,讓大家重新認識氣球藝術和宣傳公司。 Wilson指,獲獎至今,有不少媒體相約做訪問,「我好多謝香港媒體大肆報導香港人得獎,真係好衷心感謝。」雖然媒體採訪接踵而來,暫時未惠及其生意,但他們絲毫不擔心,「如果為咗錢,咁我哋就做金融、炒樓,唔會入呢行啦。」他們相信靠 Wilson扭氣球的技術和他們的人脈,多少都可以接到生意。他們認為扭氣球是一門藝術,不單只搞生日會氹人開心咁簡單,和商場合作搞氣球展覽亦絕對「有得做」,楊英偉說:「一般商場的展覽都要一百幾十萬,如果同我哋合作,幾十萬已經夠,我哋仲可以度身訂造,設計獨一無二的氣球展。」故他們只是等「機會」。
幸好,他們整盤氣球生意的成本低,鋪位是自置物業,每個氣球一蚊左右,加上氣球師的手工,令氣球變成一門藝術和展覽品。加上他們沒有聘請全職員工,整盤生意的開支不大,接一個訂單足夠回本,兼有少少利潤。三位老闆只是兼職咁做,有訂單就接,成本唔高,缺乏宣傳下仍可勉強維生。
苦練扭波

Wilson的主要架生是電泵,圖中一款是
手提式,可以用作吹長條氣球。

Wilson早在幾年前,只是醉心於魔術表演,完全唔識扭氣球。他說:「有一次,有個客的小朋友開生日會,他叫我扭埋波,但我嗰陣完全唔識,想嘗試配合吓,不過氣氛就好尷尬。」自此之後,他就積極學扭氣球,試過上 YouTube睇片學,亦有請教身邊識扭氣球的朋友,不停咁練習,終於學識晒基本功。後來仲識點樣扭卡通人物,自覺好滿足。「直至有一次我去到陽明山莊,一個小朋友的生日 party,當時我見到門口有隻四米高的暴龍,成隻都係用氣球扭出來,好誇張,嗰陣先發現原來自己識嘅嘢好少。」之後,他就開始報讀氣球專業課程,試過去天津和日本學師,每年總有兩、三次出外進修,終於在今次世界賽上吐氣揚眉,取得冠軍。
開業成本( 10/2014)
鋪租:$0*
人工:$0#
入貨:$40,000
雜項:$20,000
總投資:$60,000

營業資料( 03/2016)
鋪租:$0*
人工:$0#
入貨:$15,000
營業額:$0^
虧損:$15,000

*(楊英偉自置物業)
#(三人沒有聘請員工,只有接 show時才聘請 freelance。)
^( Surprise Party Planner並非每個月有收入)
撰文:蔡璿驩
攝影、攝錄:關永浩
ed_bn@nextdigital.com.hk

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()