亞中鏡業的鎮店招牌,由阿鍾生前親手撰寫,鍾太為記念丈夫,會永遠留它在身邊。店內也有生招牌貓咪「金仔」,牠近日悶悶不樂,「可能牠知道鋪頭快要結業了。」

坦白講

念夫

Ads by Google

鍾李艷容,七十三歲,元朗東堤街「亞中鏡業」老闆娘,六十年代和丈夫阿鍾一同創業,鋪頭賣玻璃和神主牌,也出售由阿鍾創作、獨一無二的對聯。
阿鍾九年前突然患上肺炎過身,鍾太獨力守住店鋪多年,可惜古老行業敵不過時代變遷,她為止蝕忍痛於本月底結業,卻止不住思念丈夫的眼淚。


我老公姓鍾,啲人叫佢「阿鍾」,佢就改鋪頭名叫「亞中」,常用「亞」、「中」二字開頭作對聯。舊時啲人每逢新居入伙、擺大壽、過時過節,都會請阿鍾作副對聯,有時更加入屋企人名。我記得老公寫過「庭前綠水迎春至 戶外青山接福來」、「龍騰碧海 鳳立丹山」等,佢用毛筆寫好之後,每對可以賣到五十至一百蚊,當時係個好價錢。
阿鍾係才子,但我就唔係好識字,佢有教我睇報紙,但書法我就真係搞唔掂。我細個屋企窮,無書讀要幫手耕田。阿鍾當年喺大陸落嚟香港,喺我以前上水住嗰條村幫人補習英文,朋友介紹我哋認識。我屋企人欣賞佢老實勤力又知書識禮,佢公公以前喺內地教書,因此自細熟讀古書,更寫得一手好書法,創作對聯更加係佢嘅嗜好。
我哋拍拖幾年後結婚,我做衣服繡花,阿鍾自學做玻璃,幫人整窗門搵食。後來儲到啲錢,用三千蚊開咗「亞中鏡業」,賣鏡賣玻璃啦、又幫人整神主牌,當然仲有阿鍾拿手好戲寫對聯。阿鍾做到無停手,朝朝天未光就起身,做到凌晨先收工。我嗰時見佢咁辛苦,好想幫輕吓佢,因此申請小販牌,朝朝五點起身,拎啲玻璃和相框帶埋仔女去元朗街邊賣,一賣就十年,一心諗住只要每晚可以令佢做少一個鐘就好。
大志
後來我哋生意好到一人開一間鋪,熟客大多係圍村人,年年都搵我哋做三、四套神主牌,有時做到凌晨三、四點,食飯都唔得閒。直到三十年前,我哋搬嚟東堤街現鋪。做玻璃呢行好辛苦,我雙手大部分傷痕都係俾玻璃𠝹損,而家經常手痛,要定期睇醫生食止痛藥。阿鍾試過𠝹斷手腕一條血管,要留院一個月。即使係咁,我從來無聽過佢埋怨過一句,賺到嘅錢仲會攞嚟幫有需要嘅親戚朋友。
二十年前我哋生意好,每個月賺到近兩萬蚊,月租只係二千蚊。但呢幾年生意愈來愈差,因為後生仔都唔再買拜神用品。上年開始好幾個月無接到單,但每個月要俾過萬蚊租,咁蝕落去唔係辦法,我五個仔女都叫我唔好再做。
但我總覺得,自己守唔住間鋪好無用、好對唔住老公。「亞中」有好多我同阿鍾嘅回憶,望住鋪入面一塊塊鏡,仲有老公生前寫落嘅對聯,我知道,才子從來都無嫌棄我呢個文盲,一直俾我喺背後,默默為佢完成人生大志。
撰文:關卓凌
攝影、攝錄:高仲明
news@nextdigital.com.hk

tvb4life 發表在 痞客邦 留言(0) 人氣()