娛樂偵訊

陳凱琳走漏眼 鄭嘉穎破戒煲煙

Ads by Google

半百中坑鄭嘉穎去年拍攝劇集《殭》,搞掂又靚又有米的九十後港姐陳凱琳( Grace)。以往歎慣散餐的鄭嘉穎,難得今次玩認真,拍拖一年已心急逼婚。
據知過往奉行男尊女卑的鄭嘉穎,仲一反常態,為女友戒煙、戒蒲、戒粗口,仲返埋教會,表面上改邪歸正。但早前趁女友開工,鄭嘉穎約朋友 high tea,冇王管馬上現形,臨走前破戒匿後巷煲煙。

 


跟埋信主
僅得廿四歲的陳凱琳,近日出席活動承認有同嘉穎傾結婚:「大家傾過有共識,可以慢慢嚟……計劃會有家庭同小朋友。」仲話諗定要返加拿大擺酒,恨嫁恨到出晒口!
口口聲聲話自己守身如玉,兼且係虔誠基督徒的 Grace,搭上鄭嘉穎後,就瞞住老豆去男友屋企過夜,搞到陳父大呻「蝕本」。為保住貞節牌坊, Grace拉埋嘉穎一齊洗底,約法三章要男友戒煙、戒蒲、戒粗口,最近仲成功勸掂男友跟埋信主返教會。
「嘉穎同 Grace原本就係兩個世界嘅人, Grace屋企好嚴,細細個就好守規矩,嘉穎都知 Grace嘅父母唔會咁容易會接受佢,所以佢都肯為 Grace戒緊啲壞習慣,等大家距離近啲。」嘉穎身邊人透露。

離開鋪頭時,鄭嘉穎兩頭望,之後一個箭步走入後巷煲煙。

過馬路時,鄭嘉穎輕扶友人手臂,有風度!

近日鄭嘉穎同陳凱琳經常孖住出席新劇《殭》的宣傳活動。
後巷扯煙
講就容易!早前趁住女友有工開,鄭嘉穎相約女伴 high tea。當日下晝四點,嘉穎同友人現身中環的士丹頓街,過馬路時,嘉穎仲好有風度捉住對方手臂,之後二人走入近期好 hit嘅「 lobster central」歎龍蝦包。食完之後,嘉穎走出門口,鬼鬼祟祟兩頭望,之後就摩打腳匿入後巷,同友人齊齊點煙,吸完之後,齊齊上車離開。

日前,陳凱琳在赤柱大街拍飲食節目,擺 pose俾工作人員任影唔嬲。

NG再 NG,陳凱琳依然笑晒口冇怨言,果然世界女。

唔使埋位,陳凱琳拎住電話搏命㩒,唔知係咪 check實男友行蹤。

陳凱琳全程同對手雞啄唔斷,好 talk得!
另一邊廂,啱啱去溫哥華放完大假的陳凱琳,日前就現身赤柱大街一間西餐廳拍飲食節目,出名世界女的 Grace,對住工作人員時時刻刻都保持四萬笑容,就算 NG都毫無怨言,交足戲!一唔使埋位, Grace就拎住部電話搏命篤。嘉穎咁鬼馬, Grace真係要 check實啲,唔好走漏眼呀!

去年,陳凱琳瞞住老豆同鄭嘉穎遊法國,回港後亦未有回家直上男友位於大坑寓所宿一宵。

日前陳凱琳出席活動,承認同鄭嘉穎已有結婚計劃,仲話會返加拿大擺酒。

二人為劇集《殭》拍嘴戲,鬼妹仔陳凱琳主動唔扭擰,難怪鄭嘉穎嗒糖。

陳凱琳父親一直反對女兒同鄭嘉穎拍拖,得知男方逼婚,陳父更大呻「蝕本」。

鄭嘉穎拖着陳凱琳出席胡杏兒婚禮,有指當晚嘉穎趁機向女友逼婚。
打動另一半
圈中出現不少虔誠教徒,甚至可以打動另一半,決志信主,有共同目標及信仰,特別夾。


商天娥 李偉誠
10年,與燈飾商人男友李偉誠( Patrick)結婚,婚前二人已開始同居生活,但男友 Patrick亦尊重基督教的娥姐,同居不同床,其後 Patrick更決意信主。


鄭秀文 許志安
07年 Sammi受洗成為基督徒,而她的心願是希望另一半亦是教徒, 11年, Sammi與安仔復合,本來信佛的安仔亦被打動決志,參加教會查經班;早年,在 Big Four演唱會拜神儀式,安仔未有上香,只是站在一旁低頭祈禱。


趙頌茹 周永恒
與基督徒的趙頌茹同居多年,終被阿 Yu感染, 06年,周永恒成為基督徒,孖住一齊返教會,上查經班,可惜後來掟煲收場。
撰文、攝影、攝錄:娛樂組

文章標籤

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()