何佩嫻說,粉嶺鶴藪幾年間,有近五十棵土沉香被斬,有村民因為太嬲,幫被斬樹木塗保護油時,寫上「」字,以洩心頭之憤。

坦白講

守護沉香

Ads by Google

何佩嫻,五十四歲,大澳居民,五年前成立土沉香生態及文化保育協會,組織五百名行山友巡邏隊,用民間力量捉拿斬樹賊,誓要保衞土沉香這「香港之樹」,連《經濟學人》都俾 like。

香港之所以叫香港,因為土沉香,但咁有歷史價值嘅珍貴樹木,五年來被斬掉逾千棵,現時估計全港只剩下一百棵。土沉香係香港人嘅根,但斬樹黨一直以嚟都無收手,因為土沉香可變成貴價香料、藥品,甚至雕刻珍品,每克木材可賣貴至七萬蚊。
五年前,有東涌村民向我舉報,發現東涌一帶的土沉香幾乎被斬清光,但警方馬虎了事,無心追查。我覺得保育土沉香只能靠自己,於是成立協會並開網頁,其後全港各地區都有人向我舉報,包括西貢、粉嶺、大埔等,至今我已去過二百個斬樹地方視察。
我細閱警方拘捕斬樹賊嘅記錄,發現佢哋多數係廣東茂名市電白縣人,但也有香港人參與,我估一定係有組織犯罪集團。有一次,我親眼見到香港人負責帶路和認樹,身後跟住幾個大陸女人,帶住一袋二袋懷疑係斬咗嘅土沉香,喺元朗八鄉出現,我立即報警。又有一次,我見到六個可疑男人喺東涌山邊爬上嚟,用唔係香港人腔調嘅廣東話向我問路。最後警方根據我提供嘅線報,從大澳水路攔截七個人並搜出沉香,當中包括一個大澳人。但令我最驚訝嘅係,海關過去截獲非法偷運土沉香出口數字,竟然係零。

靠自己

斬樹黨手法層出不窮,試過用紅絲帶、紙巾、畫箭嘴等標示土沉香位置。賊人會先斬傷棵樹,由於樹有自癒能力,受真菌感染後會分泌出有香味的樹脂,等半年至一年後凝結為沉香,再返嚟採集。
此外,要從樹皮挑出香脂好費功夫,整個工序要大約一個月先完成,呢段時間賊人會喺附近紮營留宿。我哋嘅義工就發現過好多次,每次都有報警,但警方行動緩慢,結果放虎歸山,我哋眼白白睇住沉香被大量砍伐運走,真係好心痛。
我哋協會五百個義工自組巡邏隊,大部分係行山友,但畢竟能力有限。有次我喺粉嶺,見到兩個講普通話嘅可疑男人,拎住手機周圍影相,我一直跟到佢哋上車,影佢哋車牌,點知被發現,佢哋開車掉頭嚟追我。嗰時我好驚,幸好行出大街時有其他村民,架車就無再跟住我。
舊年林村最後一棵百年老沉香樹被砍傷,我好肯定佢被斬樹黨睇中,立即通知漁護署要求起圍欄,但拖咗半年政府話唔得,話起圍欄有礙觀瞻。政府靠唔住,惟有靠自己,我哋計劃籌錢幫全港剩低一百棵樹加圍欄,大約五千蚊一個,守護沉香、守護香港。

撰文:關卓凌
攝影:葉漢華
攝錄:曾春南

文章標籤

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()