現時 CUFFS的中環店有 4名 stylist為客人提供造型意見,客人可在網上預約 stylist,或留意他們的駐場時間。

創業通

訂造恤衫西裝逐樣揀

Ads by Google

坊間度身訂造西裝及恤衫的專門店,形象老土,對初次接觸的年輕人更不知該如何入手, 80後的 Ian因覺得難買合身恤衫,認為度身訂造恤衫有市場,故在 11年開設 CUFFS,將訂造衣物簡潔及程序化,再請來設計師加入潮流元素,受不少年輕及外國客歡迎,更在 15年於中環開設新分店,推出個人造型設計服務,將裁縫業年輕活力化。

步入中環的 CUFFS,你會看到牆上有 Shirt Bar、 Chinos、 Suit Bar等字眼,有指示牌列明訂造恤衫西裝的流程, CUFFS的創辦人 Ian表示:「可能關自己讀工程系事,鍾意啲嘢清晰有步驟,好似說明書咁,雖然話裁縫店行緊年輕化,但好多第一次去訂衫嘅後生仔都唔知點做,我哋會清楚展示成個度身訂造嘅流程,只要跟住指示牌 step by step,自選布料、衣領、袖、鈕、襟逐樣揀,最後度身就可以完成。」
CUFFS是一間恤衫及西裝訂造的裁縫店,在銅鑼灣及中環設有分店,主打年輕上班一族的市場,店內設計及程序都以簡潔為主,恤衫售價由$430至$1,200不等,西裝則由$4,200至$12,000。
Ian說:「我哋嘅設計由韓藉設計師 Steve Seong主理,每季都會推出新系列嘅恤衫同西裝,好似今季就用咗日本風嘅布料作拼布恤衫,款式較新穎,平時出街都可以着。 Steve仲會選出 150款較受客人歡迎及推薦嘅布款擺喺店面,縮短客人揀選嘅時間,好似近來比較流行大格仔、大間條嘅 pattern。」




Ian(左)不時會與韓籍設計師 Steve討論來季的設計,希望推出新潮而又符合客人口味的恤衫。


店內有 Ian與設計師一同設計的指示牌,讓客人可以清楚了解訂造恤衫及西裝的步驟。


CUFFS的銅鑼灣店約有 700呎,需不大,但有 180度櫥窗,令空間感夠大。 未畢業已想創業


Ian(左)不時會向裁縫師傅請教恤衫訂造的學問,「好似度衫長要睇個人比例,唔可以齋睇數字,例如瘦嘅就預短啲,肥嘅就長啲,望落會 fit身啲。」

Ian在英國劍橋大學修讀製造業工程系學位及碩士,但他的心中有一個創業夢, 03年畢業回港後,曾到咖啡連鎖店擔任市場推廣,希望學懂如何經營一門生意,「自己冇創業經驗,想喺其他創業者身上學點做生意,返到嚟入咗間咖啡連鎖店做品牌顧問,從中學到選鋪、人事管理及成本控制等,最重要係創業者嘅想法,唔好話之前未試過就覺得冇可能先,真係要去試先知得唔得,呢樣對我之後創業嘅路有好大幫助。」
有創業念頭但沒有路向的 Ian,決定以切身需要考慮,最後決定開設訂造恤衫店,「我返工出街都會着恤衫,但我膊頭橫腰圍細,去買衫就得膊位又就唔到腰身,望落好似唔啱身咁,有次行過一間舊式裁縫店就試吓度身訂造恤衫,雖然件衫好 fit,但事前要睇過千款布辦,布料選擇多但花紋款式少,好多地方都係裁縫師傅話點就點,其實唔太知領口可以點改,鈕又唔知改唔改得,咁不如試吓將訂造恤衫程序簡單化,同時加入時裝元素,可以吸引更多年輕人。」

上門求教

在開店前, Ian花了近 1年時間籌備,如了解裁縫店的運作,找設計師及鋪位等,最後在 11年 12月成立 CUFFS,「膽粗粗去過唔同裁縫店求教,但冇乜人理我,我好多謝灣仔裁縫店老闆楊伯,佢見難得有後生仔有興趣,唔介意教我點樣度身、揀布料、喺邊入貨,仲介紹裁縫師傅畀我識,真係幫咗我好多。設計師就係朋友介紹,而鋪位選擇上,地鋪租金太貴一定負擔唔起,但又想開喺人流旺及多上班人士嘅地方,最後搵到銅鑼灣利園山道嘅樓上鋪,有 180度嘅開揚櫥窗, 7百呎租金 4萬都算合理。」
做過市場推廣的 Ian,明白找傳媒宣傳夠快和直接,開業不久便聯絡不同報刊雜誌,務求爭取見報率,「樓上鋪要有人知就要夠 noise,搵咗公關朋友幫手引薦,睇吓有冇版位適合介紹我哋,結果開張兩星期,《蘋果日報》副刊搵埋萬寧哥哥沈志明做 model上嚟影相介紹間鋪,之後一星期起碼有 3、 4百個客人嚟幫襯,可能當時訂造新潮恤衫算係 gimmick,之後陸續有時裝版介紹我哋,多咗曝光率。」




CUFFS可以訂造不同顏色的扯布褲,內裏可以選擇不同的布款。由$880起


褲腳的內裏加布款要額外加$80。


褲袋位的內裏加布款要額外加$160。 推出西裝訂造

最初 CUFFS只有恤衫訂造服務,現時更提供西裝訂造,店內亦有不同的配飾售賣,「最初係想做好一樣嘢先,所以頭兩年都只係得訂造恤衫,之後有好多客人要求,所以提供埋西裝訂造。另外,我搵咗唔同品牌嚟寄售西裝會用到嘅配飾,例如袖口鈕、袋及頸巾等,令客人易啲配襯到啱自己嘅裝扮。」
CUFFS業務漸上軌道, Ian開始着手擴充業務, 15年在中環開設分店,同時找來 stylist合作,即場為客人提供造型意見,「客路主要係返工要着恤衫嘅人士,中環係一個唔錯嘅地點,最後喺威靈頓街搵到個啱嘅樓上鋪。我想突顯為客人度身訂造嘅服務,搵咗 4名 stylist合作,不時會喺店內駐場為客人提供個人嘅服裝意見,客人都可以喺我哋網站同 stylist約時間,𠵱家呢個服務係免費。」



(左) Formal的穿着,適合見工及上班。
深藍色細條紋西裝外套連褲$4,200
大八領藍色恤衫$430
腰果紋領呔$280
黑色 loafer皮鞋$1,480

(右) Friday Night的穿着,上完班後可以直接與朋友去酒吧喝兩杯。
藍色細格仔紋羊毛西裝外套$2,900
深藍色棉質西褲$1,400
白色套頭式民族花紋恤衫$650
啡色 Brogue皮鞋$1,480



(左)表現 playful的形象,玩味性大。
深藍色細波點拼布前袋恤衫$560
深藍色拉鏈袋白色波點棉褲$960

(右)舒服悠閒,適合平時出街穿着。
日本系列迷彩布恤衫$750
深藍色扯布褲$980



客人 Robert:
當時想搵間鋪整西裝,喺網上見到佢哋全部係香港製造,而且款式幾特別,於是就試吓,覺得成個訂造過程幾簡單易明,自己幾鍾意啲衫嘅剪裁及設計。

造衫 step by step

 




step 1選擇布款及衣服設計( CUFFS店內有明確指引,方便第一次訂造的人士。)


step 2選擇袖口鈕,如單鈕、雙鈕或雙袖等。


step 3選擇衣領款式,如一字領、大八領、圓領等, Ian表示:「返工用嘅多會用大八領或中八領,而咀鈕領同圓領就比較啱出街着。」


step 4前襟亦有不同選擇。(左)暗同,有布條遮住鈕扣(右)光同,鈕扣顯露出來


step 5店內有 20款鈕扣讓客人可自行配搭,有基本款及一些如木鈕的特別款式,特別款式要另加$30至$60。


step 6最後度身就可以完成整個程序。

開業成本:
租金 $120,000(2按 1上)
入貨 $70,000
宣傳 $10,000
裝修 $200,000
雜費 $50,000
總投資 $450,000

每月收支:
營業額 $600,000
租金 $90,000( 2店)
人工 $230,000( 12名員工+1名老闆)
入貨 $200,000
雜費 $30,000
盈利 $50,000

CUFFS
網址: http://www.cuffs.hk 
地址:
中環威靈頓街 27-29號元益大廈 2樓
銅鑼灣利園山道 27號 2樓

撰文:曾志恒
攝影:陳嘉元、陳子禮(部分圖片由被訪者提供)
Models: Eugene

 

    tvb4life 發表在 痞客邦 留言(0) 人氣()