專題 Log In

重新上路  Suzuki Vitara& Honda Vezel 1.5

Ads by Google

近 10年好鬼流行嘅小型 SUV,似乎只得歐洲車廠玩,日本車廠好似靜晒咁,好可惜呀!話晒廿幾年前日本車廠已經掀起 RV熱,當年嘅 Suzuki Vitara、 Toyota RAV4及 Honda CR-V可以話紅到爆!個個後生仔都以擁有一部為榮。
當 RAV4同 CR-V都發大車身變成中型 SUV時,最新一代 Vitara竟然重拾初代嘅車身大小,配上悅目外形設計及豐富設備,最重要係仍然用四驅!令已有 28年歷史嘅車系即時 young晒!而且新車優惠價仲平到$229,900!同級對手實在唔多,較新款只得 Honda HR-V嘅後代 Vezel,同樣賣前衞外表,新一代車迷都唔會嫌老土。



Honda Vezel 1.5 Spec.(圖左)
引擎: 1,497c.c.直四
馬力: 120ps/6,600rpm
扭力: 14.8kgm/4,600rpm
傳動:無段變速自動、附+/-模式
車身: 4,294× 1,772× 1,605( mm)
軸距: 2,610mm
車重: 1,224kg
耗油: 15.8km/L
車價:$248,882
查詢:合群汽車( 2827 8622)

Suzuki Vitara Spec.(圖右)
引擎: 1,586c.c.直四
馬力: 118ps/6,000rpm
扭力: 15.9kgm/4,400rpm
傳動: 6前速自動、附+/-模式
車身: 4,175× 1,775× 1,610( mm)
軸距: 2,500mm
車重: 1,250kg
耗油: 17.5km/L
車價:$229,900
查詢:香島汽車( 2332 0091)

車頭有型夠粗獷

對於香港人嚟講, Vitara嘅花名更親切易記,有邊個唔識「維他奶」?呢個名實在幫咗 Vitara唔少,起碼車迷更易記住 Vitara,就算沉寂咗十幾年,一講就記起。反而 Vezel要重新認識,因為 Honda刻意將日本國內稱為 HR-V出口改為 Vezel,話就話新鮮感,但其實更易混淆。
其實喺日本市場都冇 Vitara,因為日本會用 Escudo呢個名,好熟口面?全因打機經常出現快到癲嘅 Escudo Rally戰車! Vitara嘅轉款週期特別長,第 2代最短命都玩咗 8年,其餘第 1及第 3代都玩足 10年,所以縱然 Vitara已經有 28年歷史,但眼前最新款都只係第 4代。喺 2014年巴黎車展初現嘅第 4代 Vitara還原基本步,車身由上代長 4,470mm,大幅縮短到 4,175mm,回到接近第 2代嘅水平,所以亦同當年嘅對手如 RAV4及 CR-V脫鉤,反而同 Honda最新嘅 Vezel車身 size接近。車身縮短之餘,新車外表都加入唔少概念車味,如黑色、白色或同車身色車頂,總共混合出 10個車身顏色選擇,當中不乏大膽色,如今次試車嘅金屬藍及金屬橙,啱晒「好色」車主。
新 Vitara全車最靚係車頭,電鍍鬼面罩、銀藍色燈殼、塑料泵把同高級嘅旅行頂架,都令 Vitara望落前衞得嚟又有粗獷味,比同場嘅 Vezel更吸引!不過 Vezel有一點好成功,就係將車身腰線由車頭至車尾緩緩向上揚,再將後座門手挽隱藏喺 C柱,營造 Coupe線條! Vitara車尾就比較平凡,尤其尾燈同頭燈冇乜首尾呼應感覺,如果唔係底部有雙色泵把,觀感更乏味。




Vitara車頭設計絕對係全車焦點,而且罕有用藍色殼頭燈。


尾泵把用黑、灰雙色配襯,令車尾更有層次感。


新一代 Vitara大玩多色車身,夾埋大相試車共有 10色選擇。 用料普通設備齊

以前當紅嘅初代 Vitara,其實設備簡陋,舒適性亦都麻麻,之所以大紅,係因為賣一份不羈感覺,好似好浪子咁,再加上大量改裝件,個個車主都可以搞到部車有個人風格。今時今日仍食老本 sell不羈、 sell型格?只有死路一條!家吓嘅車主比以前多要求,設備少啲、賣相差啲,分分鐘都被 out!進入新 Vitara車廂,第一時間發覺中控台冇 Vezel咁前衞,而且據代理表示,拍攝車所用嘅一體化車機會換成 KENWOOD大面板,實在有啲失落……不過設備真係幾齊料,有 Engine start掣、停車自動熄匙、 ESP及泊車鏡頭等,淨係軚盤上嘅掣都夠晒多、夠嚇鬼!可以遙控音響系統、定速巡航、加減波,連藍牙電話撥號都得,拍得住歐洲車。
除此之外, Vitara嘅車廂都同 Vezel用唔同方法粉飾, Vitara用上大量格仔暗花仿金屬飾板,中控台上方仲扮晒高級咁加個指針時鐘,令成個車廂都高級晒。 Vezel就用仿皮物料包住整個中控台,而且冷氣同音響都係黑色面板輕觸式設計,波棍台下面又中空,有型!不過由於兩部車都只係賣廿萬多啲,用料其實着重視覺多過質感,開閂門就會發覺頗多部件都輕飄飄,質感同歐洲有啲距離。




Vezel(左)嘅尾箱較深,容量有 393L,比 Vitara嘅 375L更大。


Vitara(右)車身造型比較方,似越野車,反而 Vezel車身流線形,似揭背跑車。


Vezel表板以速度表為中心,而且外圈有變色功能。


Vitara表板中置顯示屏,清晰簡潔。 乘坐舒適空間足

Vitara雖然車身比上代短,軸距亦同時縮短,但仍可維持喺 2,500mm水平,但對比 Vezel嘅 2,610mm就輸蝕咗啲。兩車都未有用全真皮座椅, Vitara用仿皮加仿猄皮; Vezel則用仿皮加布料。老實講,筆者對仿猄皮有偏愛,全因手感及防滑效果較好,但準買家要考慮到仿猄皮會因手摸過留有手印,而且日子有功會起鏡面,如果介意,都係選 Vezel嘅布料座位較好。
後座空間方面, Vezel嘅膝部空間比 Vitara稍為寬敞,而且因應車身設計令坐姿較斜,空間有限但舒適性總算不俗。 Vitara後座比 Vezel落本,除 3個位都用 3點安全帶外,更 3個位都有頭枕,安全性更好。此外,雖然 Vitara後座坐姿比較直身,但天幕車頂為車廂空間感加分,有需要時仲可以開一半,呢啲清涼天氣一流,比開冷氣更好。由於 Vitara有四驅系統,車尾底部要留有較大差速器,再加上後座坐墊唔可以翻起,令到尾箱空間唔及 Vezel。不過唔緊要,旅行頂架已 ready,只需買合適配件即可使用。




Vezel嘅駕駛艙設計其實好有型,冷氣風口歸左邊,中間音響同冷氣操作面板都採用輕觸式,靚!


Vezel後座坐姿較 Vitara好,缺點係中間位冇頭枕及冇天窗。


Vezel座位主要由布料及仿皮組成,觀感唔錯。


Vitara嘅駕駛艙設計賣相高級,中控台上方更有小時鐘。


Vitara後座靠背比較直,舒適性一般,好彩有大天窗加強空間感。


仿猄皮物料手感一流,但會留有手印,唔係人人 like。 四驅系統任我行

當年 Vitara賣粗獷外表,骨子裡其實都唔簡單,四驅系統係標準設備,當年嚟講算幾巴閉。多年來 Vitara都冇忘本,四驅系統依然係基本,全新 ALLGRIP 4WD系統可以簡易地用一個扭掣操作,分 SNOW、 AUTO、 SPORT及 LOCK模式,基本上全由電子系統集中處理引擎、波箱及四驅系統,即係話用者自主性其實唔大。唯獨遇上爬泥坡時, LOCK模式可固定四輪扭力輸出,就算個別車輪打滑都可以輕易脫險。此外,有上坡總有落坡, Vitara新增落山車速控制,開啟後可以唔使落迫力自動牽制車速,好有用!




Vitara嘅 6速波箱表現出色,而且可以操作+/-模式。


Vezel採用 CVT波箱,稍欠一點勁度,但波棍外表靚仔,底部更有中空設計。


Vitara嘅四驅模式為扭掣式,而 LOCK模式就要另外㩒掣。


Vezel嘅泊車掣為電子掣,而且設有 Brake Hold功能。

Vezel冇四驅系統,面對崎嶇路面當然投降,但前驅特點係輕量化,加上 Vezel用上 120匹引擎,比 Vitara嘅 118匹引擎多 2匹,起步加速力度比 Vitara稍強,可以話 on-road Vezel較好, off-road就 Vitara較強。兩車唔單只驅動及引擎有別,連波箱都唔同款, Vezel用上 Honda近年力推嘅 CVT無段變速,表現滑溜但少咗份 kick-down轉波快感。 Vitara則用最傳統嘅 6速自動波,筆者覺得佢表現出色,運作出奇地寧靜又暢順,有 CVT嘅順滑,又留有 kick-down加速嘅推背惑,好!




Vitara雖然用 1.6公升引擎及身附四驅,但廠方表示耗油量低至 17.5km/L,相信受惠於 6速波箱。


Vezel嘅 1.5公升引擎源自上代 Jazz,可做出 15.8km/L耗油量。


Vitaza(左)車身比 Vezel高,令駕駛感都更似正宗越野車。


當年豪邁

初代 Vitara由 1988年生產到 1998年,可謂開創小型 SUV先河,當年代理引入 3門及 5門版,而且更有 3門開篷版,車價由$169,000至$195,000,冧盡當年潮男。初代來港嘅 Vitara只配 95匹、 1.6公升引擎, 5前速手波亦令到唔少女士卻步。男人玩 Vitara最鍾意大改,頭泵把、射燈、升高、頂架及腳踏等等,都係必改項目,當年養活唔少四驅改裝鋪。

對手即減

雖然 Vitara同 Vezel屬同級車,但講到定位最接近,其實係已經有 6年款嘅 Mitsubishi ASX。 ASX採用 139匹、 1.8公升引擎,配有四驅系統,車身比 Vitara稍大,而且車內擁有無敵大天幕,吸引力絕對唔弱。或者因為車款比較舊,所以趁 Vitara推出, ASX都即時減價應戰,由$228,800減到$208,800,抵食夾大件!

撰文:袁國基
攝影:葉偉豪

 

    文章標籤

    Suzuki Vitara& Honda Vezel 1.5

    全站熱搜

    tvb4life 發表在 痞客邦 留言(0) 人氣()