Webber

認真去玩實有路行  Smallb

Ads by Google

家陣拍親 YouTube都俾人鬧廢青,又有人話 YouTuber已經飽和,網片冇得做,偏偏有啲後生就覺得拍片為開心,唔使理人點睇。 Smallb就係兩者之間,搵埋成班朋友拍片,但唔係 hea拍,有晒台前、幕後,仲搵埋贊助,自己開心之餘,亦要玩得認真。態度勝於一切,去到邊都有得撈啦!

Smallb
YouTube: Smallb Channel
訂閱人數:約 36,925
總觀看次數:約 2,724,250

認真去玩 求認同


RecNow第一集玩「 NonStop接力賽」,成班後生仔遊走全香港,跑到索哂氣,幾好笑!

正因為唔想俾人睇死做「廢青」,所以約埋一班 YouTuber朋友開咗另一個頻道「 RecNow」,專拍攝形式類近《 Running Man》嘅遊戲綜藝節目,想話俾人知其實香港都可以做到出色嘅綜藝節目,唔使齋睇大台:「我唔想俾人覺得我哋呢班後生仔齋玩冇建樹,所以每集玩之餘,都會加啲 message俾大家,例如有一集我哋搵咗間 Salon贊助,一班 YouTuber入去學師,想話俾人知做 Salon唔係讀唔成書嘅人先去做,其實都係一門專業。」 Smallb已經冇理自己頻道,全心全意經營 RecNow:「我希望用一年時間去做呢件事,已經諗好晒題目,亦搵到晒台前、幕後和贊助。」

份工要我開 Channel拍打機片

90後嘅 Smallb,性格和言行一啲都唔似外界所言嘅「廢青」:「其實拍片前我加入咗一間遊戲公司,公司之後叫我拍打機片擺上 YouTube,但其實我最想拍嘅唔係打機片,只係工作需要。」家陣因為打機片泛濫,搞到社會人人鄙視 YouTuber, Smallb坦言自己都有聽過批評,所以,喺佢嘅頻道入面仲有好多其他片,例如 Vlog:「我嘅 Vlog叫《 9Vlog》,擺明係亂拍,呢個就係我嘅 style。」不過,小孩你唔好以為佢亂拍,實情佢密謀另起爐灶,重新出發!




RecNow會預計拍 12集,期望每月出到一集,每集都會大約 20至 30分鐘,覺得有質素製作,唔擔心太長會冇人睇。


RecNow嘅認真製作何止拍攝上?連主題曲都有,仲係租舒文嘅錄音室錄,夠認真喇?! 朋友多 一呼百應


雖則 Smallb話自己頻道嘅片係「 9Vlog」亂拍,但拍時都有諗過拍咩會吸引觀眾。偷拍沖涼呢家嘢,大台點會出吖?!

Smallb強調, RecNow雖然係佢做搞手,但成舊嘢係屬於大家,所以都好慶幸一班朋友肯唔講錢幫手:「大家都要覺得舊嘢係自己,先會用心做好。」 Smallb亦因為 RecNow而大碌友情牌,搵來不同牌子幫手贊助,即使冇錢落袋,齋有場地提供已經好開心,明符其實蝕錢都要做:「因為有啲牌子嘢,先會吸引到人去睇。」雖然只出咗一集,但咁認真去拍攝, hitrate依然唔係咁高:「其實我成日覺得我嘅訂閱數字與人氣不合比例,大家認識我都係源自我出現喺其他 YouTuber頻道,所以我上年去動漫節,已經俾一班粉絲圍住,阻街成粒鐘,最終仲俾保安鬧㗎。」果然朋友多,真係唔同啲。

撰文:陳可兒
攝影:黎韋邦

    tvb4life 發表在 痞客邦 留言(0) 人氣()