隱居中山　李司棋古法延壽大追蹤

現年六十五歲的李司棋（司棋姐），拍罷劇集《水髮胭脂》後，去年決定不再續約，跟無綫結束四十幾年的賓主關係。

Ads by Google

錢銀事少，身子事大，有指她有感年紀唔細，為免拍劇捱更抵夜太過操勞，所以寧願回復自由身，鍾意做就做，唔鍾意做就閉關休息，過半退休的生活。

本刊發現，現時長駐國內中山的司棋姐，的確養尊處優，經常出入當地一間養生醫館接受調理之外，閒時則逛超市打發時間，生活極之悠哉游哉！

司棋姐多數時間居於中山，閒時則被發現出入當地一間中醫館，接受身體調理，好識養生之道。

中醫推拿有助通經活絡，對司棋姐養生美容極有療效。

司棋姐與醫館職員表現熟絡，面見醫師前，先跟職員們大談保健知識。

不續約無綫

李司棋去年毅然離開娘家，最大原因都是為自己的健康着想。無綫開劇工廠模式製作，通常外景接廠景，一拍就十幾個鐘冇得停。後生當然捱到，但她自知年紀唔輕，加上又曾患子宮頸癌，以及因化療令致骨枯，若一把年紀仍不錫身捱更抵夜，真係好易命仔都短幾年。

據悉，司棋姐曾向無綫開出續約條件，就是一日工作不得超過八小時；無奈講足兩年都冇結果，惟有「自求多福」，自己選擇離開無綫。

現時，偶爾開工為有線主持節目《食得有法「補」》以外，已大大減少在港露面的司棋姐，有傳身體狀況麻麻，更被人影到出入肝腸胃專科診所，懷疑求診治病，實情只是美麗的誤會。近來，她不知幾精神爽利，少「蒲頭」只因在中山三鄉買了一幢四層高連花園的豪華別墅，供自己養老過半退休生活。目前，大部分時間居於中山的她，生活十分悠哉游哉，可以用「歎世界」形容。日日無事忙，便是在家中五百呎的花園打理花花草草。