陳君宜 點心店姊妹淘

「玩具城」老闆鄭躬明嘅太太、前名模陳君宜(Qinnie),雖然有個十個月大嘅囝囝鄭嵐升(Ayden)要悉心照顧,但係鍾意創業嘅佢,就決心要家庭、事業兩兼得。繼之前喺尖沙咀開咗「蛋黃哥」點心店之後,最近,佢再下一城,喺中環再開萬人迷「Little Twin Stars」點心店。

Ads by Google

日前,Qinnie就請埋班好姊妹一齊試食,東姑有囗福成為坐上客,四位靚女、靚太,包括:陸詩韻、朱慧敏、麥家瑜、余詩敏,坐埋一齊就傾到雞啄唔斷,仲大談扮靚嘅心得;而呢方面,陸詩韻就最耍家,因為佢剛啱開咗一間網店賣護膚品,所以佢對乜嘢皮膚都好有研究,聽到成班人津津樂道。

一班靚女、靚太就即刻大笑咁話,佢哋似足拍緊無綫J2台嘅《姊妹淘》咁款,點知此時此刻,《姊妹淘》嘅主持莊思敏忽然殺入嚟,原來佢亦都係呢度老闆之一,梗係要成日嚟巡視下業務啦!成餐飯,一班靚女、靚太影相多過食,其實啲點心質素好過好多大酒樓,東姑就唔客氣,食埋佢哋嗰份啦!

呢日,老闆娘陳君宜(Qinnie)請咗四位好姊妹陸詩韻、朱慧敏、麥家瑜、余詩敏嚟試菜,食咗三個鐘,就傾足三個鐘。

臨走前,陸詩韻仲買咗一對杯走,佢話希望可以快啲搵到真命天子,一齊用喎。

見到咁可愛嘅點心,自拍一定係指定動作,朱慧敏率先示範。

    全站熱搜

    tvb4life 發表在 痞客邦 留言(0) 人氣()