壹號幹線

頭豹威威!  Jaguar XF 25T R-SPORT

Ads by Google

新「姨仔」出咗但冇咁快到,「吳繫」同「唉陸」又未有動靜,積架選擇喺呢個時間推出全新 XF,誓要殺對手一個措手不及,話冇計過度過,真係點講都唔相信。
不過話分兩頭說,賺盡天時,也贏了地利(已到港)的 XF,事實上又出奇好揸又好坐,猴年第一大驚喜是也。

 


壹號幹線
魅力是沒法擋

近代積架好勤於鍛鍊「下盤功夫」,新 XF車架有高達 75%鋁合金成分,重量比上代鋼製品輕足 190kg,剛度也提升 28%。懸掛採用以 F-Type為基礎的前雙搖臂、後多連桿設定,前後比重 50:50,後軸亦設獨立煞車扭力控制系統,所以揸落操控感特別紮實又寧靜,指向比例準又保留到適當溝通感,尤其在濕滑路面上穩定性喜出望外,有樂趣,亦安心。
〈行政車,自然要行政價〉
售 價:$658,000
引 擎: 1999c.c.,直 4,渦輪增壓;前置,後輪驅動
馬 力: 240匹/5,500rpm
扭 力: 34.7kgm/1750-4000rpm
波 箱: 8前速自動(附+/-模式)
長/闊/高: 4954mm/2091mm/1457mm
重 量: 1590kg
0-100km/h加速: 7.0秒
極 速: 248km/h
耗油量: 7.5L/100km(公路及市區綜合計算模式)
查 詢:積架汽車
網 址: http://www.jaguar.com.hk

讚一讚:行車紮實穩重,盡展英倫豪華轎車氣派;彎路身手靈活,濕路表現更是嘖嘖稱奇。後座膝部空間理想,坐姿舒適自然,做老細車勝任有餘。
彈一彈:外形太似上代又似 XE,一般人唔講唔知唔覺係全新車;接近 66萬車價,難以心動,也難衝動。


第二代 XF真係一部「全、全、全新車」,何解咁似上代?仲似剛推出的放大版 XE?嗯……廠方話真係刻意去延續 XF傳統喎,另外,好的設計亦毋須過分「雕龍雕鳳」,頭冚上簡單四條流暢弧線,就已經是氣勢了。同意嗎?至少,相比起 XE, XF的車尾真係順眼好多囉,而且風阻系數才不過 Cd0.26,難怪咁靜。


兩公升引擎有 turbo幫手「谷到」 240匹馬力,加上低轉低扭頗強( 34.7kgm/1750-4000rpm),起步絕不拖泥帶水,中後段加速力亦有一定程度推背感,而且全程表現順暢寧靜,有 power又不失高貴氣派。


中控台布局似足放大版 XE,冇乜新鮮感,但勝在皮料用量更為重手,睇到摸到的,的確更為高級。


前座相當舒服,電動調校仔細並附多組記憶功能;受車頂線條影響,天窗面積已盡大,勿介意。


新車軸距拉長多 51mm,後座空間甚有睇頭,廠方更強調 XF擁有同級最長 87mm膝部空間,坐得出的確零舍闊落,個人反而仲欣賞其坐姿,椅背夠斜又呈少少窩狀,成個背脊可以釀晒落去,而且雙腳又唔會太屈曲或太直,總之就係好歎好舒服。


伸縮「 8速波餅」已成積架「例牌菜」,新買家應該仲覺新奇,不過我對咗幾年,冇乜感覺了。另外, 8吋輕觸屏幕操作介面幾人性化,若面積再大一點,其實仲好。
行政車始終有需要講求少少私隱度,後側窗及尾窗都設拉簾,合情合理。



有尾車行李箱自然有睇頭,深度比上代增加 61mm,總容量達 540公升,吞吐量驚人。


預設偏航警示,巡航時一踩界軚盤便會震動,夠安全。


積架素來鍾意同冷氣「搞搞新意思」,繼 F-Type之後, XF兩側冷氣出風口在着車後才會翻出來,實際作用當然冇乜,純粹綽頭而已。
醒多句
兩公升 XF 25T另有賣$498,000元的 Prestige版,機械布局相同,但取消了全車擾流、運動型避震、十方位電座、電軚盤、金屬門檻、 18吋輪圈等設備。
賣相同 package係稍遜一籌,不過平足 16萬,睇落仲抵。
撰文:廖宏俊
攝影、攝錄:方保山
features@nextdigital.com.hk

    文章標籤

    Jaguar XF 25T R-SPORT

    全站熱搜

    tvb4life 發表在 痞客邦 留言(0) 人氣()