中環人語

索羅斯個腦諗乜?

Ads by Google

全球股、匯、債翻天覆地,唔少外媒都重溫索羅斯 Reflexivity(反射)概念,九七年亞洲金融風暴後,索羅斯出版過一本書《 The Crisis of Global Capitalism》,小宗經歷過金融風暴後都買咗本書嚟定吓驚,「 Reflexivity Theory」(反射理論)源自社會學,索羅斯應用喺金融市場,即係話價格跌,人就驚恐,咁個價就跌多啲。

 


本週一在立法會金管局總裁攞命陳識得「應牌」,謂「香港人要沉住氣,唔好自己嚇自己,如果以為自己唔穩健,沽埋港元,就會有問題。」索羅斯嘅投資理念,更見諸其一九六九年成立的量子基金( The Quantum Fund), Quantum源自德國物理學家 Werner Heisenberg的量子力學定律,佢係二戰納粹德國核武研究的領導人。無論係反射理論也好,量子力學也好,索羅斯洞悉市場的不確定性,再於死穴上強攻而賺大錢,咁香港人就要睇吓,信年薪一千萬嘅陳德霖還是身家二百四十億美元嘅索羅斯。

索羅斯一九九八年出版的《 The Crisis of Global Capitalism》,內容講述他如何睇準九七年亞洲貨幣及經濟的死穴。

到底陳德霖叫香港人「唔好自己嚇自己」還是「唔好自己呃自己」?
《蘋果日報》圖片

一九三二年三十一歲的物理學家 Werner Heisenberg獲諾貝爾物理學獎,以表揚他在量子力學研究的貢獻。
錢志健去柬埔寨洗頭

老錢農曆年帶埋全家,去柬埔寨金邊同細路洗頭。

小宗收到料,唔係吳亮星爆㗎,金融界人士錢志健農曆年帶埋老婆阿仔,飛去柬埔寨搵細路仔洗頭,咦!照睇佢應該立即人間消失喎,年初七竟然安全返港,哦,原來老錢新年行善,去柬埔寨幫一個非政府組織叫 Children at Risk Project,其中一環就係幫細路仔洗頭,嗰度有唔少被遺棄,住喺貧民窟嘅小朋友屬高危一族,佢哋成長過程好容易學壞,阿錢帶埋個仔去見識吓,讓他明白幸福非必然㗎。
中環寸嘴:「龍地」與「農地」有別
工廈大王楊耀松長子,遊走高級酒店、銀行,及知名食肆,與各路人士打交道,透過美酒佳餚,察看人生百態,讓讀者「嗒」落有味。
有個老友來電,問我做乜 promote得四季酒店啲年糕咁緊要,嗱,講你都唔信,今年四季冇送年糕俾我喎,係四季開張到而家,首次過年冇心意表示,我做人秉公辦事嘅。唔怕同你講,今年間間幫襯開嘅食肆都送兩底糕我歎,福臨門、家傳七福、天龍軒、美心都有,係四季酒店冇送,係我現兜兜買嚟食,事實上佢底沙葛年糕又幾有特色嘅。
我喺四季酒店留低唔少腳毛,𡃁仔時在多倫多大學讀書,一行出去左邊唐人街,右邊就係四季酒店,呢間係全北美洲第一間四季酒店,家陣由 Bill Gates老婆揸大股。嗱,同啲麻甩仔就去唐人街食例湯雙拼飯,同異性朋友就去四季酒店 coffee shop歎茶,要抄人哋功課或 notes,就踎學校 canteen囉,食飯都要睇形勢做人呀!
呢個世界唔怕你唔識貨,最怕你貨比貨,過年前梗係搵啲碌柚葉沖吓涼,叫個老友喺佢新界塊地摘啲碌柚葉,大家交換一下,老友嗰啲「黃琴琴」嘅,拍埋我自家後園摘嗰「手貨」度,相形見絀,都係碌柚葉,佢嗰塊係「農地」,我嗰塊係「龍地」,呢啲就係有靈氣同冇靈氣嘅分別囉!

楊國佳

多倫多呢間四季酒店,我𡃁仔時已經喺佢 coffee shop蒲。

我塊「龍地」人傑地靈,啲碌柚葉都肥壯過人。
本週緬懷
老富昌 Le Fauchon一樣執,老富昌得肥彭幫襯而走紅,如今落得如斯收場,能不令人神傷?
唔通冇咗鬼佬真係唔得!

Le Fauchon是最早進駐史丹頓街一帶的高級食肆,那時蘇豪區才初崛起。此照片攝於九十年代。

餐廳外貼上結業告示。
表現花紅向後看

跳槽到金沙中國出任總裁的王英偉,年度酬金有$230萬美元,另最多達$150萬美元酌情花紅,折合共$3000萬年薪,舊東家依舊送上可換股債券,名副其實打工皇帝。

究竟打工仔起咗老闆飛腳,點樣令舊東家送錢過你使呢?咁,就要問吓前新昌營造( 404)主席王英偉,去年九月已過檔為金沙中國總裁嘅王英偉認真把炮,今年初,新昌營造向佢老兄發三千四百萬可換股債券( Convertible Bond, CB),以作為佢去年一月至十月期間擔任新昌主席兼行政總裁嘅表現花紅,呢批 CB仲可隨時轉讓套現。新昌股權易手後,內部都有唔少人事變動及傳言,如果呢批 CB可以令王英偉為舊公司美言幾句,咁都物有所值嘅。
(宗菁華)
centralman@nextmedia.com

    tvb4life 發表在 痞客邦 留言(0) 人氣()